គណបក្សទាំង៣ ដែលដង្ហែក្បួនឃោសនានោះ​ រួមមាន គណបក្សប្រជាជនកម្ពុជា គណបក្សភ្លើងទៀន និងគណបក្សខ្មែររួបរួមជាតិ។ គណបក្សប្រជាជនកម្ពុជា បានជួបជុំសមាជិក សមាជិកា និងអ្នកគាំទ្របក្សខ្លួននៅកំណាត់មហាវិថីសម្ដេចតេជោហ៊ុន សែន ឬផ្លូវ ៦០ ម៉ែត្រ ឆ្ពោះទៅសង្កាត់ នៅតាមខណ្ឌនានាក្នុងរាជធាននីភ្នំពេញ។ មនុស្សរាប់រយពាន់នាក់ អមជាមួយម៉ូតូ និងរថយន្តជាច្រើនគ្រឿង បានដង្ហែលើដងផ្លូវយ៉ាងត្រៀបត្រា រួមទាំងសម្រែកឃោសនាយ៉ាងគគ្រឹកគគ្រេង។
 

ដោយឡែកគណបក្សភ្លើងទៀនវិញ ក៏មានដង្ហែក្បួនជួបជុំអ្នកគាំទ្របក្សជាលក្ខណៈទ្រង់ទ្រាយធំដែរ។ គណបក្សប្រឆាំងមួយនេះ បានជួបជុំអ្នកគាំទ្រនៅក្នុងសង្កាត់និរោធ ខណ្ឌច្បារអំពៅ ដោយដង្ហែក្បួនឆ្ពោះទៅកាន់សង្កាត់ជ្រោយចង្វាររាជធានីភ្នំពេញ។ គណបក្សភ្លើងទៀន បានដាក់បេក្ខជនឈ្មោះបោះឆ្នោតឃុំ-សង្កាត់ ចំនួន១៦២៣ ប្រហាក់ប្រហែលគណបក្សប្រជាជនកម្ពុជា ដែលដាក់បេក្ខជនឈ្មោះទូទាំងរាជធានីខេត្ត ១៦៥២ តែម្ដង។
 

 

មិនខុសពីគណបក្សទាំងពីរខាងលើទេ គណបក្សខ្មែររួបរួមជាតិ ដែលដឹកនាំដោយលោក ញឹក ប៊ុនឆៃ នោះ ក៏បានដង្ហែក្បួនធំ នៅថ្ងៃឃោសនាបោះឆ្នោតចុងក្រោយនេះដែរ។ អ្នកគាំទ្ររាប់រយនាក់ បានកាន់ទង់ និងស្លាកសញ្ញាគណបក្ស ធ្វើដំណើដោយម៉ូតូ រថយន្ត និងយាន្តជំនិះគ្រប់ប្រភេទ អមជាមួយការស្រែកឃោសនាតាមឧគ្ឃោសនសព្ទ ចេញពីរង្វង់មូលសុវណ្ណមច្ឆា នៅខណ្ឌជ្រោយចង្វារ ទៅខណ្ឌឫស្សីកែវ និងទៅខណ្ឌទួលគោក រាជធានីភ្នំពេញ។ គណបក្សខ្មែររួបរួមជាតិ ដាក់បេក្ខជនឈ្មោះបោះឆ្នោតឃុំ-សង្កាត់ ចំនួន ៥៦៩ ក្នុងចំណោម១៦៥២ ទូទាំងរាជធានី-ខេតុ្ត។