ជាតិ
ភាពយន្ត៦រឿង ដាក់បញ្ចាំងជូនសាធារណជនទស្សនា ដោយឥតគិតថ្លៃ កន្លែងមើលកុន នៅរោងភាពយន្ត Legend Premium Noro Mall
× ភ្នំពេញ៖ មហោស្រពភាពយន្តខ្លីចតុមុខ CSFF បានបង្កើតកម្មវិធី “ឡើងរោងកុន@CSFF” ដើម្បីផ្ដល់ឱកាសដល់ទស្សនិកជន បានទស្សនារឿងខ្លីជាប់ជម្រើសក្នុងមហោស្រព ចំនួន៦រឿង ដោយឥតគិតថ្លៃ។ កម្មវិធីនេះសហការរៀបចំដោយ មហោស្រពភាពយន្តខ្លីចតុមុខ និងរោងភាពយន្ត Legend។
លោក ឈីម ប៊ុននី មន្ត្រីទំនាក់ទំនងនិងយុទ្ធសាស្រ្ត នៃមហោស្រពភាពយន្តខ្លីចតុមុខលើកទី១១ បញ្ជាក់ថា កម្មវិធី“ឡើងរោងកុន@CSFF” របស់មហោស្រពភាពយន្តខ្លីចតុមុខ ក្នុងរដូវកាលទី១១ នឹងប្រព្រឹត្តទៅ នៅថ្ងៃទី០៤ ខែមិថុនា ឆ្នាំ២០២២ ចាប់ពីម៉ោង៤រសៀល រហូតដល់ថ្ងៃម៉ោង៨យប់ នៅរោងភាពយន្ត Legend Premuim ផ្សារជីប ម៉ុង នរោម៉ល។
លោក ប៊ុននី បន្ថែមទៀតដូច្នេះ«ទស្សនិកជន មិនគួរខកខានពេលវេលាដ៏ពិសេសនេះឡើយ ព្រោះនេះគឺជាលើកទីមួយហើយ ដែលមហោស្រពភាពយន្តខ្លីចតុមុខ សម្រេចបង្កើតកម្មវិធី “ឡើងរោងកុន”។ កម្មវិធីនេះ មានគោលបំណងរឹតបណ្តឹងចំណងទំនាន់ទំនង រវាងទស្សនិកជន និងយុវសមិទ្ធិករភាពយន្តថ្មីៗ។ កម្មវិធីនេះ យើងក៏មានបំណងស្វែងរកយុវជនក្នុងស្រុក ដែលមានបំណងចូលរួមប្រកួតភាពយន្តខ្លី ជាមួយមហោស្រពភាពយន្តខ្លីចតុមុខដែរ»។
សូមបញ្ជាក់ថា គិតត្រឹមថ្ងៃទី៣ ខែមិថុនានេះ គឺនៅសល់តែ១៣ថ្ងៃទៀតប៉ុណ្ណោះ នឹងដល់ថ្ងៃផុតកំណត់ឈប់ទទួលស្នាដៃរឿងខ្លី ដើម្បីប្រកួតប្រជែងពានរង្វាន់ភាពយន្តខ្លីឆ្នើមកម្ពុជា ក្នុងមហោស្រពភាពយន្តខ្លីចតុមុខ(CSFF) លើកទី១១ ឆ្នាំ២០២២ហើយ។
ភាពយន្តដែលត្រូវបានជ្រើសរើស ដើម្បីយកទៅចាក់បញ្ចាំងរួមមានរឿង “Origami Girl” ដោយ លឹម ហេង ជយលាភីរឿងខ្លីឆ្នើមបន្ទាប់ ប្រចាំឆ្នាំរដូវកាលទី១០។ រឿង “ម៉ែខ្ញុំ ម៉ែគេ” ដោយ សុខ ពិសិដ្ឋ។ រឿង “ស្នេហ៍ឆ្លងវេហា” ដោយ គីមអាន សុភស័ក្ដ។ រឿង “នារីរបាំ” ដោយ សេង ធី។ រឿង “មុនមេឃភ្លៀង” ដោយ នេត ឥន្ទនរាសុទ្ធីដ្ឋេព និងរឿង “ខ្យល់ខែកុម្ភៈ” ដោយ មុនី កណ្ណដារង្គ។
Tag:
ភាពយន្ត
សិល្បៈ
រោងកុន
© រក្សាសិទ្ធិដោយ thmeythmey.com