ក្រសួងការបរទេសអាម៉េរិក ក្នុងថ្ងៃទី៨ ខែមិថុនា បានផ្តល់ភ្លើងបៃតងលើគម្រោងលក់គ្រឿងបរិក្ខារថែទាំនាវាចម្បាំង ក្នុងទំហំ ១២០លានដុល្លារទៅឱ្យតៃវ៉ាន់។ ការឯកភាពពីសំណាក់អាម៉េរិកបែបនេះ ត្រូវបានក្រសួងការបរទេសចិន ថ្កោលទោស និងជំទាស់យ៉ាងដាច់អហង្ការ​នៅ។ 

 

«អាម៉េរិកគួរតែគោរពគោលការណ៍ចិនតែមួយ...លុបចោលគម្រោងលក់អាវុធ និងបញ្ឈប់ការលក់អាវុធ រួមទាំងផ្តាច់ទំនាក់ទំនងយោធាជាមួយតៃវ៉ាន់»។ លោក Zhao Lijian អ្នកនាំពាក្យក្រសួងការបរទេសចិន បានឆ្លើយតបនឹងនឹងអ្នកសារព័ត៌មានបែបនេះ ជុំវិញសំណួរទាក់ទិននឹងការលក់គ្រឿងថែទាំនាវាចម្បាំងឱ្យកោះតៃវ៉ាន់។ 

 

ក្នុងសន្និសីទសារព័ត៌មានប្រចាំថ្ងៃទី៩ ខែមិថុនា អ្នកនាំពាក្យក្រសួងការបរទេសចិន បានចាត់ទុកគម្រោងខាងលើជាការបំពានគោលការណ៍ចិនតែមួយ និងបទបញ្ញត្តិដែលមានចែងក្នុងសេចក្តីប្រកាសរួមរវាងអាម៉េរិក-ចិនកន្លងមក។ បន្ថែមពីនេះ​ ការលក់សម្ភារនាវាចម្បាំងនោះ បានធ្វើឱ្យប៉ះពាល់យ៉ាងខ្លាំងដល់អធិបតេយ្យ រួមទាំងផលប្រយោជន៍សន្តិសុខចិន ហើយថែមទាំងបំផ្លាញទំនាក់ទំនងរវាងរដ្ឋាភិបាលក្រុងវ៉ាស៊ីនតោន-ក្រុងប៉េកាំង និងសន្តិភាព ស្ថិរភាពនៅច្រកសមុទ្រតៃវ៉ាន់ផង។ 

 

គម្រោងលក់គ្រឿងបរិក្ខារនាវាចុងក្រោយនេះ ជាការលក់អាវុធលើកទី៤ របស់អាម៉េរិក ទៅឱ្យតៃវ៉ាន់ ចាប់តាំងពីលោក ចូ បៃឌិន ប្រធានាធិបតីអាម៉េរិក ចូលកាន់តំណែង នៅដើមខែមករា ឆ្នាំ២០២១ និងជាការលក់អាវុធលើកទី៣ ចាប់តាំងពីដើមឆ្នាំ២០២២។ 

 

គួររំឭកថា នៅក្នុងខែកុម្ភៈ ក្រសួងការបរទេស បានយល់ព្រមលក់គ្រឿងបរិក្ខារ និងសេវាថែទាំប្រព័ន្ធការពារមីស៊ីល Patriot ក្នុងទំហំប្រមាណ ១០០លានដុល្លារ។ នៅក្នុងខែមេសា ក្រសួងការបរទេស បានឯកភាពលក់គ្រឿងបរិក្ខារប្រព័ន្ធការពារមីស៊ីលដដែល ក្នុងទំហំប្រមាណ ៩៥លានដុល្លារ៕