យោងតាមសេចក្ដីជូនដំណឹងរបស់ ក្រសួងកសិកម្ម រុក្ខាប្រមាញ់ និងនេសាទ ការដាំដុះស្រូវវស្សាឆ្នាំនេះមានសភាពយឺតយ៉ាវ។ ជាក់ស្ដែង មកដល់ពេលនេះ ការដាំដុះស្រូវវស្សាអនុវត្តបាន ៧៦២ ៥៤២ហិកតា ស្មើ ២៩ភាគរយនៃផែនការ ២៦១ ៩៥០០ហិកតា ធៀបនឹងឆ្នាំ២០២១ ថយចុះប្រមាណ ៦៥០ ០០០ហិកតា។
 

ក្នុងស្ថានភាពដ៏លំបាកនេះ ក្រសួងកសិកម្ម បានប្រាប់ឱ្យអគ្គនាយកដ្ឋានកសិកម្ម សហការជាមួយមន្ទីរកសិកម្មខេត្តនានា ជួយភ្ជួររាស់ និងរំដោះទឹកចេញពីស្រែជូនកសិករ ដែលរងផលប៉ះពាល់ដោយសារជំនន់ទឹកភ្លៀង ជាពិសេសគ្រួសារក្រីក្រ។ តំបន់ដែលមានការដាំដុះយឺត ត្រូវផ្សព្វផ្សាយបច្ចេកទេសដាំដុះឱ្យសមស្របទៅតាមលក្ខខណ្ឌនៃប្រព័ន្ធក្សេត្របរិស្ថានដំណាំស្រូវ។
 

អគ្គនាយកដ្ឋានកសិកម្ម និងមន្ទីរកសិកម្មខេត្ត ត្រូវសហការជាមួយមន្រ្តីជំនាញ និងអាជ្ញាធរមូលដ្ឋាន ចុះផ្ទៀងផ្ទាត់តួលេខល្បឿនការងារ បង្កបង្កើនផលជាក់ស្ដែង ដើម្បីកំណត់មូលហេតុចម្បងដែលបណ្ដាលឱ្យការងារបង្កបង្កើនផលស្រូវយឺតយ៉ាវ។ ជាពិសេស ត្រូវចេញវិធានការបន្ទាន់ ដោះស្រាយបញ្ហារាំងស្ទះដល់ការងារបង្កបង្កើនផលក្នុងភូមិសាស្រ្តរៀងៗខ្លួន។ 
 

មន្ទីរកសិកម្មខេត្ត ត្រូវសហការជាមួយអង្គភាពពាក់ព័ន្ធ និងអាជ្ញាធរមូលដ្ឋាន វាយតម្លៃ ផលស្រូវដែលខូខាតដោយសារជំនន់ទឹកភ្លៀងឱ្យបានរួសរាន់ ហើយត្រូវដាក់សំណើរទៅកាន់លេខាធិការដ្ឋានប្រព័ន្ធស្បៀងបម្រុងកម្ពុជា នៅក្រសួងសេដ្ឋកិច្ច និងហិរញ្ញវត្ថុ ដើម្បីសុំគ្រាប់ពូជស្រូវសម្រាប់ស្ដារឡើងវិញឱ្យបានទាន់ពេលវេលា។ 
 

ក្រសួងកសិកម្ម បង្ហាញក្ដីបាម្ភថា ស្ថានភាពស្រូវខូចខាត និងការដាំដុះយឺតយ៉ាវនៅពេលនេះ អាចប៉ះពាល់ដល់ផែនការផលិតកម្មប្រចាំឆ្នាំ និងសន្តិសុខស្បៀង ជាពិសេសគោលនយោរបស់រដ្ឋាភិបាលក្នុងការជំរុញផលិតកម្មដំណាំស្រូវ និងការនាំចេញអង្ករផងដែរ៕