ដោយ៖ ញឹក សំអូន
 

ក្នុងជំនួបនេះ លោក សុខ លូ អភិបាលខេត្តបាត់ដំបង បានថ្លែងថា ពលរដ្ឋក្នុងខេត្តបាត់ដំបង ទន្ទឹងរង់ចាំគម្រោងមួយនេះ បញ្ចប់សាងសង់ជាស្ថាពរនាដើម្បីបង្ការជំនន់ទឹកភ្លឿងនៅក្នុងក្រុងបាត់ដំបង។ ក្រៅពីស្នើពន្លឿនការសង់ស្ថានីយ៍អាងប្រព្រឹត្តិកម្មទឹកកខ្វក់ អភិបាលខេត្តបាត់ដំបង ក៏លើកឡើងពីកង្វល់របស់ខ្លួន ជុំវិញបញ្ហាសំរាមក្នុងក្រុងដែរ។ លោក សុខ លូ បញ្ជាក់ថា សំរាមដែលកើនឡើងពីមួយថ្ងៃទៅមួយថ្ងៃ គឺជាបញ្ហាប្រឈម ដែលទាមទារឱ្យមានការដោះស្រាយជាបន្ទាន់ ខណៈបច្ចុប្បន្នការទុកដាក់សំរាម និងដឹកជញ្ជូនសំរាមមានភាពយឺតយ៉ាវ។

 

លោក វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង ក៏បានណែនាំដល់រដ្ឋបាលខេត្តបាត់ដំបង រៀបចំបង្កើតយន្តការនៃគណៈកម្មការមួយដើម្បីគ្រប់គ្រងទីលានចាក់សំរាមឱ្យបានត្រឹមត្រូវបន្ទាប់ ពីទីលានចាក់សំរាមស្ដង់ដារអន្តរជាតិមួយនេះ ត្រូវបានដាក់ដំណើរការប្រើប្រាស់នាពេលខាងមុខ។ 

 

ជាមួយគ្នានេះ ប្រតិភូនៃធនាគារអភិវឌ្ឍន៍អាស៊ី (ADB) ក៏បានសន្យាផ្ដល់ការបណ្ដុះបណ្ដាលជំនាញគ្រប់គ្រង និងអំពីការបែងចែកញែកសំរាម ឱ្យបានស្របតាមលក្ខណៈស្ដង់ដារបច្ចេកទេស។
 

សូមជម្រាបថា ទីលានចាក់ និងកប់សំរាមដែលមានលក្ខណៈតាមស្ដង់ដារអន្តរជាតិនេះ ត្រូវបានសាងសង់នៅលើផ្ទៃដីទំហំ ២៥ហិកតា ស្ថិតនៅភូមិប៉ោយស្វាយ ឃុំតាគ្រាម ស្រុកបាណន់ ខេត្តបាត់ដំបង។ ជាគម្រោងកែលំអគ្រប់គ្រងបរិស្ថានក្រុង ជុំវិញបឹងទន្លេសាបជំហាន២ ក្រោមកម្ចីឥណទានសម្បទាន របស់ធនាគារអភិវឌ្ឍន៍អាស៊ី (ADB) មានតម្លៃប្រមាណ ៦,៥ លានដុល្លារ៕