យោងតាមសៀវភៅ៖ ​«មគ្គុទ្ទេសក៍ស្តីពី ប្រភេទត្រីរស់នៅក្នុងដែនទឹកសាបនៃប្រទេសកម្ពុជា» បានបង្ហាញថា នៅក្នុងប្រទេសកម្ពុជា​​ មានត្រីបបែលទឹកសាប​បីប្រភេទ ​ដែលស្ថិតនៅក្នុងលំដាប់ ORDER: MYLIOBATIFORMES​ និងអម្បូរ FAMILY: DASYATIDAE​ មានដូចជា៖ ត្រីបបែលកន្ទុយខ្លី Previtrygon walga ត្រីបបែលភ្លើង Hemitrygon laosensis និងត្រីបបែលយក្ស Urogymnus polylepis កំពុងរស់នៅ។
 

ត្រីបបែលកន្ទុយខ្លី៖ Previtrygon walga ត្រូវបានគេរកឃើញម្ដងម្កាល មានរស់នៅតំបន់ទឹកភ្លាវ (ទឹកប្រៃលាយទឹកសាប) នៃតំបន់ជួរភ្នំក្រវាញ។ ត្រីបបែលប្រភេទនេះ មានប្រវែងទទឹងដងខ្លួនទូទៅ តូចជាង ៣០ ស.ម មានច្រមុះលយស្រួចទៅមុខ និងមានកន្ទុយខ្លី។

 

ត្រីបបែលភ្លើង៖ Hemitrygon laosensis គឺជាប្រភេទត្រីបបែល ដែលត្រូវបានគេរកឃើញ​មានរស់នៅតំបន់ខ្សែទឹកខាងលើ នៃទន្លេមេគង្គ ក្នុង​ប្រទេសកម្ពុជា។ គេអាចកត់សម្គាល់ត្រីបបែលប្រភេទនេះបាន​ ដោយសារវាមានសម្បុរក្រហម ​ជាយខាងមុខព្រុយទ្រូងត្រង់ មិនមានច្រមុះលយចេញឡើយ ហើយ​មានប្រវែងទទឹងដងខ្លួនទូទៅ តូចជាង ៥០ ស.ម។

 

ត្រីបបែលយក្ស៖ Urogymnus polylepis គឺជាត្រីបបែលដែលមានទំហំទទឹងដងខ្លួនធំ រហូតដល់ ២.៥ ម៉ែត្រ ឬលើសពីនេះ​ និងទម្ងន់អាចដល់ ៦០០គីឡូក្រាម។ ជាញឹកញាប់ វាត្រូវបានគេរកឃើញមានរស់នៅក្នុងខេត្តស្ទឹងត្រែង និងខេត្តក្រចេះ។ គេអាច​កត់សម្គាល់ត្រីបបែលយក្សនេះ តាមរយៈ​កន្ទុយវែងរបស់វាវែងជាងបណ្តោយដងខ្លួន ដោយភ្ជាប់ជាមួយនឹងក្រើស រាងដូចម្ជុល ដែលមានពិសខ្លាំង អាច​​បង្កគ្រោះថ្នាក់ដល់មនុស្ស និងសត្វផ្សេងៗ បាន។ ជាយផ្នែកពោះរបស់វាមានសម្បុរខ្មៅ និងច្រមុះលយចេញទៅមុខបន្តិច។

 

ពាក់ព័ន្ធនឹងត្រីបបែលយក្សនេះ នៅក្នុងទសវត្សរ៍ទី ៧០, ៨០ ខណៈពេលដែលវាមានរស់នៅច្រើនក្នុងទន្លេមេគង្គ ​ អ្នកស្រុកបានតំណាលតៗគ្នា អំពីត្រីបបែលយក្ស​សម្លាប់ក្របី ដែលហែលឬដើរឆ្លងទន្លេ​។ ធម្មតា ត្រីបបែលយក្ស តែងសម្ងំនៅនឹងខ្សាច់បាតទន្លេដើម្បីចាំចាប់ចំណី។​ ក្នុងរដូវទឹកសម្រក នៅតាមកោះ ឬតាមកាំងនានា ក្នុងទន្លេមេគង្គ ​សម្បូរទៅដោយស្មៅខៀវខ្ចី ដែលជាឱកាសល្អសម្រាប់អ្នកស្រុកដឹកក្របីរបស់គាត់ ឆ្លងកាត់ទន្លេ ទៅស៊ីស្មៅនៅទីនោះ។ ចៃដន្យ ក្នុងពេលឆ្លងកាត់ទន្លេ ក្របីបានដើរជាន់ត្រីបបែលយក្ស ដែលកំពុងក្រាបសម្ងំនៅនឹងខ្សាច់បាតទន្លេ វាក៏ស្ទុះឡើងចាក់ក្របីនឹងក្រើស ​ដែលនៅជាប់នឹងគល់កន្ទុយរបស់វា។ ពេលត្រូវពិសបបែលយក្សហើយ ក្របីមិនអាចកំរើកខ្លួនរួចឡើយ។ ខណៈនោះ ត្រីបបែលយក្ស ក៏ហែលមកគ្របពីលើ សង្កត់ក្របីចុះទៅក្នុងទឹករហូតដាច់ខ្យល់ស្លាប់។ 
 

នៅក្នុងតំបន់នេះ  អ្នកស្រុកតែងតំណាល​តៗ គ្នា អំពីវិធីសង្គ្រោះជីវិតពីត្រីបបែលយក្ស ក្នុងករណីបានជួបវា​ ដោយរាល់ពេលចុះទឹកទន្លេមេគង្គ ត្រូវតែដាក់កូនកាំបិតជាប់ខ្លួនជានិច្ច​ ប​ង្កាក្រែងត្រី​បបែលយក្សមកគ្របពីលើ ដោយប្រើកូនកាំបិតនោះចាក់វាពីក្រោមពោះបបែលយក្ស នោះទើបរួចជីវិតបាន៕