មតិយោបល់ សំណូមពរ​ និងបញ្ហានានា ដែលប្រជាពលរដ្ឋបានស្នើទៅសម្ដេច ស ខេង សុំជួយអន្តរាគមន៍ និងដោះស្រាយនោះ មានចំនួន៣២ ករណី នៅក្នុងខែឧសភា ។ 

ក្នុងនោះក្រុមការងារសម្ដេច ស ខេង បានជួយដោះស្រាយ៨ករណី។ ដោយឡែកក្រុមការងារសម្ដេច ស ខេង ក៏កំពុងត្រួតពិនិត្យ និងដោះស្រាយបញ្ហាពលរដ្ឋនៅសល់សេសសរុប១៣២ករណីទៀត។

 

ជុំវិញបញ្ហានេះ សម្ដេច ស ខេង បានស្នើដល់មន្រី្តពាក់ព័ន្ធយ៉ាងដូច្នេះ៖​ «ខ្ញុំសុំឲ្យថ្នាក់ដឹកនាំ និងមន្ត្រីពាក់ព័ន្ធដែលស្ថិតក្រោមសមត្ថកិច្ចក្រសួងមហាផ្ទៃទាំងអស់ គប្បីខិតខំពន្លឿនការដោះស្រាយ ហើយការដោះស្រាយទាំងអស់នោះត្រូវតែធានាឱ្យបានល្អគ្រប់ជ្រុងជ្រោយពិតប្រាកដនៃបញ្ហា និងចប់ចុងចប់ដើម ដោយមិនគ្រាន់តែធ្វើជាលិខិតស្នាមបញ្ជាតាមបែបបទរដ្ឋបាលនោះទេ»។ 

 

ជាមួយគ្នានេះ រដ្ឋមន្រី្តក្រសួងមហាផ្ទៃ បានលើកទឹកចិត្តឲ្យពលរដ្ឋដែលជួយប្រទះបញ្ហានោះ ដាក់សំណូមពរមកសម្ដេច តាមហ្វេសប៊ុកបែបនេះ ដើម្បីរួមគ្នាដោះស្រាយបញ្ហាទាំងនោះ ក្រៅប្រព័ន្ធតុលាការ។ បើតាមសម្ដេច ស ខេង ការធ្វើបែបនេះ គឺជាផ្នែកមួយជួយសម្រួលជីវភាពរស់នៅរបស់ពលរដ្ឋ និងរួមគ្នាអភិវឌ្ឍន៍សង្គមជាតិ។

 

ដោយឡែក គណនីដែលនៅសល់ក្នុងឆ្នាំ២០២១ ក្រុមការងារសម្ដេច នឹងដោះស្រាយបន្តទៀត ហើយក៏ស្នើសុំការយោគយល់ និងអធ្យាស្រ័យពីប្រជាពលរដ្ឋផងដែរ។ សំណុំរឿងក្នុងឆ្នាំ២០២១ មានមិនទាន់បានពិនិត្យ៦៥០គណនី, កំពុងពិនិត្យដោះស្រាយមាន៥២២គណនី និងបានដោះស្រាយរួម១២៨គណនី។ នេះបើតាមរបាយការណ៍ក្រុមការងារសម្ដេច ស ខេង ៕