ក្រសួងធម្មការ រៀបចំការប្រកួតប្រជែងសូត្របាតិមោក្ខ សម្តែងធម្មទេសនា និងសូត្រធម៌បទនៅខែតុលា

ជាតិ

ក្រសួងធម្មការ រៀបចំការប្រកួតប្រជែងសូត្របាតិមោក្ខ សម្តែងធម្មទេសនា និងសូត្រធម៌បទនៅខែតុលា

18, Jun 2022 , 8:59 am

រូបភាព

សម្តេចព្រះពោធិវ័ង្ស អំ លីមហេង_ ព្រះអគ្គាធិការរងពុទ្ធិកសិក្សាជាតិ

ដោយ: ប៉ូ សាគុន

ភ្នំពេញ៖ អគ្គាធិការដ្ឋានពុទ្ធិកសិក្សាជាតិនៃក្រសួងធម្មការនិងសាសនា នឹងរៀបចំការប្រឡងប្រជែង សូត្របាតិមោក្ខ សម្ដែងធម្មទេសនា និងសូត្រធម៌បទនៅថ្ងៃអង្គារ ថ្ងៃទី៤ ដល់ថ្ងៃទី៦ ខែតុលា ឆ្នាំ២០២២។

លក្ខណៈជ្រើសរើស សូត្របាតិមោក្ខ ភិក្ខុសាមណេរ តម្រូវឱ្យបួសបាន៥វស្សាយ៉ាងតិច។ មានលិខិតបញ្ជាក់ពីព្រះចៅអធិការវត្ត (ទីលំនៅបច្ចុប្បន្ន វស្សាបួសនិងចំណេះដឹងបាតិមោក្ខ)។ មានឆាយា ឬសង្ឃដីកាត្រឹមត្រូវ។ សម្ដែងធម៌ទេសនាភិក្ខុ សាមណេរ តម្រូវឱ្យបួសបាន៥វស្សាយ៉ាងតិច។ មានលិខិតបញ្ជាក់ពីព្រះចៅអធិការ (ទីលំនៅបច្ចុប្បន្ន វស្សាបួស និងបទពិសោធន៍ទេសនា)។ មានឆាយា ឬសង្ឃដីកាត្រឹមត្រូវ។ មានវិញ្ញាបនបត្រធម្មវិន័យទាំងបីថ្នាក់ (ត្រី ទោ ឯក) ឬវិញ្ញាបនបត្រពុទ្ធិកបឋមសិក្សា (សាលាបាលីរង)។ ចំណែកសូត្រធម៌បទ បព្វជិត និងគ្រហស្ថ

តម្រូវឱ្យមានអាយុយ៉ាងតិច១៥ឆ្នាំ។ មានលិខិតបញ្ជាក់ពីព្រះចៅអធិការឬអាជ្ញាធរ (ទីលំនៅបច្ចុប្បន្ន និងបទពិសោធន៍)។ មានឆាយា សង្ឃដីកាអត្តសញ្ញាណប័ណ្ណ ឬសំបុត្រកំណើត។

លោក ញាណ ភឿន រដ្ឋលេខាធិការក្រសួងធម្មការ និងសាសនា បានបញ្ជាក់ប្រាប់សារព័ត៌មានថ្មីៗថាការបង្កើតឱ្យមានការប្រកួតប្រជែង សូត្របាតិមោក្ខ សម្ដែងធម្មទេសនានិងសូត្រធម៌បទឡើងគឺក្នុងគោលបំណងផ្សព្វផ្សាយពីឱវាទរបស់ព្រះពុទ្ធសាសនា។

លោករដ្ឋលេខាធិការ បានបន្ថែមថា ការសូត្របាតិមោក្ខដើម្បីពង្រឹងការប្រតិបត្តិ ក្នុងពុទ្ធសាសនាឱ្យបានល្អ។ចំណែកការសម្ដែងធម៌ទេសនា ត្រូវបានលោក ញាណ ភឿន ពន្យល់ថា

បានប្រយោជន៍ត្រង់ការផ្សព្វផ្សាយ ឱ្យបរិស័ទយល់ពីការមានរូបមានទុក្ខនិងវិធីរំលត់ទុក្ខ តាមរយៈព្រះធម៌ ព្រោះមានឧទាហរណ៍ដើម្បីជាការប្រៀនប្រដៅ។ រីឯការសូត្រធម៌បទវិញ

មានគុណប្រយោជន៍ទាញអារម្មណ៍មនុស្ស ឱ្យមានធម៌សង្វេកព្រោះការសូត្រធម៌បទធ្វើឡើងក្នុងបុណ្យសព។ ធម៌បទជួយឱ្យមនុស្សពិចារណា បញ្ឈប់អំពើបាប អំពើអាក្រក់ និងកើតចិត្តសាងកុសល្យផលបុណ្យឡើងដោយការពិចារណាថា រាល់រូបទាំងអស់មានសេចក្ដីស្លាប់ជាខាងចុង។

«ក្នុងព្រះពុទ្ធសាសនាសំខាន់បំផុតការគោរពធម៌វិន័យនោះហើយ។ បាតិមោក្ខគឺជាការសម្ដែងដើម្បីជម្រះនូវវិបត្តិផ្សេងៗ ដែលមានក្នុងសន្ដានព្រះភិក្ខុសង្ឃ។ ជាធម្មតាកន្លះខែព្រះសង្ឃប្រជុំសូត្របាតិមោក្ខម្ដង ដើម្បីជម្រះមន្ទិល និងឧបទ្រព»។ នេះជាការពន្យល់បន្ថែមរបស់លោក ញាណ ភឿន។

ទីកន្លែងទទួលពាក្យអគ្គាធិការដ្ឋានពុទ្ធិកសិក្សាជាតិ (ការិយាល័យរដ្ឋបាលនិងសរុប) រៀងរាល់ម៉ោងធ្វើការ។ ទទួលពាក្យចាប់ពីថ្ងៃចន្ទ ទី១៣ ខែមិថុនាឆ្នាំ២០២២។ ឈប់ទទួលពាក្យនៅថ្ងៃអង្គារ ទី២០ ខែកញ្ញា ឆ្នាំ២០២២៕