អាចារ្យប្រមាណ១៥០នាក់ទៀត នឹងទទួលបានការបណ្តុះពីតួនាទី ភារកិច្ច និងក្រមសីលធម៌

ជាតិ

អាចារ្យប្រមាណ១៥០នាក់ទៀត នឹងទទួលបានការបណ្តុះពីតួនាទី ភារកិច្ច និងក្រមសីលធម៌

18, Jun 2022 , 6:59 pm

រូបភាព

ដោយ: ប៉ូ សាគុន

ភ្នំពេញ៖ ក្រសួងធម្មការ និងសាសនា នឹងបើកវគ្គបណ្ដុះបណ្ដាលតួនាទី ភារកិច្ច និងក្រមសីលធម៌អាចារ្យខ្មែរជំនាន់ទី៣៨ ចំនួនប្រមាណ១៥០រូប នៅទីស្ដីការក្រសួងធម្មការនិងសាសនា។ វគ្គបណ្ដុះបណ្ដាលនេះ នឹងប្រព្រឹត្តទៅនៅថ្ងៃចន្ទទី០៤-១០ ខែកក្កដា ឆ្នាំ២០២២។

លោក ញាណ ភឿន រដ្ឋលេខាធិការក្រសួងធម្មការ និងសាសនា បានប្រាប់សារព័ត៌មានថ្មីៗថា ការបើកវគ្គតួនាទី ភារកិច្ច និងក្រមសីលធម៌អាចារ្យខ្មែរនេះឡើង ក្នុងគោលបំណងឱ្យអាចារ្យ ដឹងពីទំនៀមប្រពៃណី ខ្មែរ ដោយយកទៅគោរពប្រតិបត្តិជាគោល ក្នុងការធ្វើពិធីណាមួយ។ ទោះជាយ៉ាងណា លោក ញាណ ភឿន ក៏បានបញ្ជាក់ផងដែរថា ការបណ្ដុះបណ្ដាលនេះ ទុកដូចជាការណែនាំទៅអាចារ្យក្នុងប្រទេសកម្ពុជា ប៉ុន្តែសម្រាប់ការអនុវត្តវិញ លោកពុំអាចរំពឹងទុកថា អាចារ្យទាំងអស់នឹងធ្វើតាមការណែនាំទាំងស្រុងនោះឡើយ។

រដ្ឋលេខាធិការក្រសួងធម្មការ និងសាសនា ពន្យល់បន្ថែម៖«វគ្គបណ្ដុះបណ្ដាលនេះ និងប្រាប់អាចារ្យពីការកកើតទំនៀមប្រពៃណីរបស់ខ្មែរយើងតាំងពីពេលណា ហើយគេធ្វើអ្វីខ្លះ។ យើងចង់ឱ្យអាចារ្យទាំងអស់ធ្វើតាម ទំនៀមប្រពៃណីល្អៗ និងកែទំនៀមធ្វើតៗគ្នាដែលអាក្រក់ចេញ។ វគ្គបណ្ដុះបណ្ដាលនេះ ទុកដូចជាការណែនាំ។ មិនអាចរំពឹកថា អាចារ្យទាំងអស់នឹងធ្វើតាមមួយរយភាគរយឡើយ ប៉ុន្តែយើងនៅតែបន្តបណ្ដុះបណ្ដាលជាបន្តបន្ទាប់ទៀត។ យើងមិនអាចបង្កើតជាច្បាប់បានភ្លាមៗទេ គឺយើងធ្វើសឹមៗសិន»។

វគ្គបណ្ដុះបណ្ដាលតួនាទី ភារកិច្ច និងក្រមសីលធម៌អាចារ្យខ្មែរនេះ ជ្រើសរើសអាចារ្យស្ម័គ្រចិត្ត នៅតាមវត្តនីមួយៗ ទាំងវត្តខាងគណៈមហានិកាយ និងវត្តខាងគណៈធម្មយុត្តិកនិកាយ។ សិក្ខាកាមត្រូវដោះស្រាយកន្លែងស្នាក់នៅ និងអាហារដោយខ្លួនឯង។ ទោះជាយ៉ាងណា ក្រសួងធម្មការ និងសាសនា ស្នើដល់មន្ទីរធម្មការ និងសាសនា ស្វែងរកកិច្ចសហការបន្ថែម ដើម្បីរកកន្លែងសម្រាប់សិក្ខាកាម តាមរាជធានី/ខេត្ត របស់ខ្លួនស្នាក់នៅ(ក្រសួងមិនមានកន្លែង សម្រាប់សិក្ខាកាមស្នាក់នៅទេ)៕