ក្នុងការអធិប្បាយដែលផ្សាយដោយកាសែតអាល្លឺម៉ង់ Bild am Sonntag អគ្គលេខាធិការណាតូ Jen Stoltenberg បានលើកឡើងពីភាពចាំបាច់ក្នុងការត្រៀមខ្លួនសម្រាប់សង្រ្គាមនៅអ៊ុយក្រែនដែលអាចអូសបន្លាយយូរទៅ និងការបន្តផ្គត់ផ្គង់អាវុធទំនើបៗឱ្យប្រទេសនេះ ដែលវានឹងជួយដល់ការដណ្ដើមទឹកដីមកពីវិញផងដែរ។

 

«យើងត្រូវត្រៀមសម្រាប់ការពិតដែលសង្រ្គាមអ៊ុយក្រែនអាចប្រើពេលយូរឆ្នាំ។ យើងមិនអាចបន្ធូរការគាំទ្រសម្រាប់អ៊ុយក្រែនឡើយ ទោះត្រូវចំណាយខ្ពស់ក្ដី តែក៏មិនសម្រាប់តែផ្នែកយោធាឡើយ ព្រោះក៏ត្រូវដោះស្រាយការឡើងថ្លៃទំនិញ និងថាមពលដែរ។» ប្រមុខណាតូបញ្ជាក់បែបនេះ។

 

នេះមិនមែនជាលើកទីមួយឡើយដែលក្រុមលោកខាងលិចព្រមានពីការអូសបន្លាយសង្រ្គាមនៅអ៊ុយក្រែនដែលផ្ទុះឡើងក្រោយរុស្ស៊ីឈ្លានពាននៅថ្ងៃទី២៤ ខែកុម្ភៈមកនោះ។ សព្វថ្ងៃ រុស្ស៊ីកំពុងសង្រ្គប់វាយដណ្ដើមតំបន់ភាគកើតដែលមានសាធារណរដ្ឋផ្ដាច់ខ្លួនពីរ។ ទីក្រុង Sievierodonetsk នៃតំបន់ភាគខាងកើត ជាគោលដៅធំនៃប្រតិបត្តិការយោធារុស្ស៊ី ដែលចង់គ្រប់គ្រងតំបន់លូហានទាំងស្រុង។ បើតាមយោធាអ៊ុយក្រែន កាំភ្លើងធំ និងរ៉ុក្កែត ត្រូវបានបាញ់ផ្តក់ដាក់ទីក្រុងនេះ។

 

ខណៈរងការវាយប្រហារកាន់តែខ្លាំង អ៊ុយក្រែន ក៏ឈានបានមួយជំហានទៀតក្នុងការក្លាយជាសមាជិកសហភាពអឺរ៉ុប។ គណៈកម្មការអឺរ៉ុប បានផ្ដល់អនុសាសន៍ឱ្យទទួលយកអ៊ុយក្រែនជាបេក្ខភាពរួចហើយ មុនកិច្ចប្រជុំក្រុមប្រឹក្សាអឺរ៉ុបនៅសប្ដាហ៍ក្រោយ។ ក្នុងករណីទទួលបានភ្លើងបៃតងទៀតនោះ អ៊ុយក្រែន អាចចាប់ផ្ដើមចរចាជាមួយសហភាពអឺរ៉ុបលើលក្ខខណ្ឌដើម្បីក្លាយជាសមាជិកតែម្ដង៕