ក្រោមគំនិតផ្តួតផ្តើម «Partners in the Blue Pacific» អាម៉េរិក ជប៉ុន អូស្រ្តាលី អង់គ្លេស និងនូវែលសេឡង់ បានបញ្ជាក់ពីការប្តេជ្ញាស្វែងរកចំណាត់ការប្រកបដោយប្រសិទ្ធភាព ដើម្បីដោះស្រាយបញ្ហាប្រឈម នៅក្នុងតំបន់ប៉ាស៊ីហ្វិក។ ក្នុងសេចក្តីថ្លែងការណ៍រួម ប្រទេសទាំង ៥ បានចាត់ទុកបញ្ហាប្រឈមទាំងនោះ ធ្វើឱ្យប៉ះពាល់ដល់សណ្តាប់ធ្នាប់អន្តរជាតិសេរី និងបើកចំហ។

 

«ដោយប្រទេសយើង...បន្តគាំទ្រវិបុលភាព ការងើបឡើងវីញនៃសេដ្ឋកិច្ច និងសន្តិសុខក្នុងតំបន់ប៉ាស៊ីហ្វិក យើងត្រូវតែប្រើប្រាស់កម្លាំងសមូហភាពតាមរយៈកិច្ចសហប្រតិបត្តិដ៏ជិតស្និទ្ធ»។ អាម៉េរិក ជប៉ុន អូស្រ្តាលី អង់គ្លេស និងនូវែលសេឡង់ បានបញ្ជាក់នៅក្នុងសេចក្តីថ្លែងការណ៍រួម ចេញថ្ងៃទី២៤ ខែមិថុនាបែបនេះ។ 

 

នៅក្នុងកិច្ចសហប្រតិបត្តិការនោះ ប្រទេសទាំង៥ នឹងធ្វើឡើងជាមួយបណ្តាប្រទេសប៉ាស៊ីហ្វិកដូចជាហ្វ៊ីជី មីក្រូណេស៊ី និងតុងហ្កា ពាក់ព័ន្ធនឹងបម្រែបម្រួលអាកាសធាតុ, ការដឹកជញ្ជូន, សន្តិសុខសមុទ្រ, សុខាភិបាល និងអប់រំជាដើម។ 

 

ការសម្ពោធគំនិតផ្តួចផ្តើមថ្មីនេះ ធ្វើឡើងបន្ទាប់ពីទស្សនកិច្ចរបស់លោកវ៉ាង យី រដ្ឋមន្រ្តីការបរទេសចិន ទៅប្រជុំកោះប៉ាស៊ីហ្វិក ដោយបានចុះកិច្ចប្រជុំជាច្រើនពាក់ព័ន្ធពាណិជ្ជកម្ម សេដ្ឋកិច្ច សុខាភិបាលជាមួយបណ្តាប្រទេសប្រជុំកោះនៅតំបន់ប៉ាស៊ីហ្វិក។ កន្លងមក អាម៉េរិក និងអូស្រ្តាលី បានបង្ហាញក្តីបារម្ភជុំវិញវត្តមានមូលដ្ឋានយោធានៅកោះសូឡូម៉ុង៕