ជាតិ
លោកស្រី ឱម យុវណ្ណឌី ដំឡើងរបាំឆ្មា ដែលពុំសូវមានអ្នកបានឃើញ
× ភ្នំពេញ៖ លោកស្រី ឱម យុវណ្ណឌី ដែលជាទីប្រឹក្សាក្រសួងវប្បធម៌ និងវិចិត្រសិល្បៈ បានដំឡើងរបាំឆ្មា ដែលក្មេងជំនាន់ក្រោយពុំសូវមានអ្នកបានឃើញ។ បើតាមអ្នកស្រី ឱម យុវណ្ណឌី របាំឆ្មាជារបាំលើកសរសើរព្រះមហាក្សត្រ ក្នុងសម័យសង្គមរាស្ត្រនិយម ក៏ដូចជាលើកសរសើរព្រះមហាក្សត្រ ដែលមានទសពិធរាជធម៌គ្រប់សម័យកាល។
សូមអស់លោក លោកស្រី អ្នកនាងកញ្ញា អញ្ជើញទស្សនាបទសម្ភាស រវាងកញ្ញា ប៉ូ សាគុន ជាមួយលោកស្រី ឱម យុវណ្ណឌី ទីប្រឹក្សាក្រសួងវប្បធម៌ និងវិចិត្រ ដោយក្ដីរីករាយ៖
លោកស្រី ឱម យុវណ្ណឌី ជាទីប្រឹក្សាក្រសួងវប្បធម៌ និងវិចិត្រសិល្បៈ បានប្រាប់សារព័ត៌មានថ្មីៗថា របាំឆ្មាត្រូបបានបង្កើតឡើង ក្នុងសម័យសង្គមរាស្ត្រនិយម។ លោកស្រីបន្ថែមថា សាច់រឿងទាំងមូលរបស់របាំឆ្មា គឺនិយាយពីការលើកសរសើរព្រះមហាក្សត្រ ព្រះបាទនរោត្តម សីហនុ ព្រះបរមរតនៈកោដ្ឋ ដែលបានទាមទារឯករាជពីប្រទេសបារាំង និងសរសើរដល់ព្រះមហាក្សត្រគ្រប់ជំនាន់ ដែលបានកសាងប្រទេសឱ្យរុងរឿង និងមានទសពិធរាជធម៌។
ក្រោយសម័យសង្រ្គាមប៉ុលពតដួលរលំ របាំឆ្មាបានសម្ដែងត្រឹមតែ២ដងប៉ុណ្ណោះ ដោយម្ដងសម្ដែងនៅឆ្នាំ២០១៥នៅក្រសួងវប្បធម៌ ហើយម្ដងទៀតសម្ដែងក្នុងអំឡុងឆ្នាំ២០២២នេះ ក្នុងឱកាសនៃការសម្ដែងរបាំរឿង “ព្រះបាទជយវរ្ម័នទី៧" នាពេលថ្មីៗកន្លងទៅនេះ។
លោក ស្រី ឱម_ យុវណ្ណឌី ទីប្រឹក្សា_ក្រសួង_វប្បធម៌ និង_វិចិត្រសិល្បៈ
ទីប្រឹក្សាក្រសួងវប្បធម៌ និងវិចិត្រសិល្បៈ លោកស្រី យុវណ្ណឌី អះអាងដូច្នេះ៖«កាលនោះព្រះមហាក្សត្រីយ៉ានី ស៊ីសុវត្ថិ កុសុមៈ នារីរ័ត្នសេរីវឌ្ឍនា សព្វព្រះទ័យនឹងព្រះបាទ នរោត្តម សីហនុ ដែលទ្រង់បានទាមទារឯករាជពីបារាំង សម្ដេចម៉ែក៏និពន្ធបទចម្រៀង និងដំឡើងរបាំឆ្មានេះឡើង។ ក្រោយពីសម្រិតសម្រាំងរើសកុមារទៅហាត់រាំ ក្នុងនោះក៏មានខ្ញុំម្នាក់ដែរ។ កាលនោះខ្ញុំអាយុប្រហែល៦ទៅ៧ឆ្នាំ។ ខ្ញុំមិនស្មានដល់សោះ ថាពេលនេះខ្ញុំអាយុ៦៥ឆ្នាំហើយ ខ្ញុំនៅចាំរបាំនេះបានទាំងអស់»។
សូមបញ្ជាក់ថាក្រៅពីរបាំឆ្មា នៅមានរបាំមាន់ របាំមេអំបៅ និងរបាំជាច្រើនទៀត ដែលមានតាំងពីបុរាណ ហើយមិនទាន់បានដំឡើងជាថ្មី ដើម្បីផ្សព្វផ្សាយឱ្យសាធារណជន និងក្មេងជំនាន់ក្រោយបានឃើញ៕
Tag:
របាំ
របាំបុរាណ
វប្បធម៌
សិល្បៈ
© រក្សាសិទ្ធិដោយ thmeythmey.com