គណបក្សប្រជាជន​កម្ពុជា នឹងរៀបចំពិធីប្រារព្ធខួបកំណើត៧១ឆ្នាំ នៅវិមាន៧មករា ដែលជាទីស្នាក់ការកណ្តាលរបស់ខ្លួន នៅព្រឹកថ្ងៃទី២៨ ខែមិថុនា ឆ្នាំ២០២២ ក្រោមវត្តមានសម្តេច ហ៊ុន សែន។ គណបក្សប្រជាជនកម្ពុជា បានកំណត់យកថ្ងៃទី២៨ ខែមិថុនា ឆ្នាំ១៩៥១ ជាថ្ងៃកំណើតរបស់ខ្លួន។ ដោយឡែក ចំពោះការបោះឆ្នោតឃុំ-សង្កាត់អាណត្តិទី៥ ដែលទើបបញ្ចប់ទៅ កាលពីថ្ងៃទី៥ ខែមិថុនា ឆ្នាំ២០២២ គណបក្សប្រជាជនកម្ពុជា ទទួលបានអាសនៈជាង៩,៣ពាន់អាសនៈ ដែលជាចំនួនច្រើនដាច់គេ បើប្រៀបធៀបនឹងចំនួនអាសនៈរបស់គណបក្សដទៃដែលទទួលបាន។ 

 

សម្តេច ហ៊ុន សែន បានអរគុណលោក ង្វៀន ភូជុង ដែលបានហៅទូរស័ព្ទទៅសម្តេចដោយផ្ទាល់ ដើម្បីអបអរសាទរខួប៧១ឆ្នាំ នៃថ្ងៃបង្កើតគណបក្សប្រជាជនកម្ពុជា និងអបអរសាទរលទ្ធផលជាវិជ្ជមាននៃការបោះឆ្នោតឃុំ-សង្កាត់ ដែលគណបក្សប្រជាជនកម្ពុជាទទួលបាន។ 

 

ក្នុងជំនួបតាមទូរស័ព្ទ សម្តេច ហ៊ុន សែន និងលោក ង្វៀន ភូជុង បានអបអរសាទរគ្នាទៅវិញទៅមក ក្នុងការទប់ស្កាត់ជំងឺកូវីដ-១៩ ហើយបានបើកដំណើរការប្រទេស និងស្តារសេដ្ឋកិច្ចឡើងវិញ។ ទំព័រហ្វេសប៊ុករបស់សម្តេច ហ៊ុន សែន បានសរសេរដូច្នេះថា៖«សម្តេចតេជោ និងឯកឧត្តម ង្វៀន ភូជុង បានឯកភាពគ្នាបន្តជំរុញកិច្ចសហប្រតិបត្តិការលើគ្រប់វិស័យសម្រាប់ប្រទេសទាំង២ ឲ្យកាន់តែរឹងមាំ និងរីកចម្រើនទ្វេឡើងថែមទៀត»៕