តៃវ៉ាន់ដែលចិនចាត់ទុកថាជាផ្នែកមួយនៃទឹកដីរបស់ខ្លួន មិនមែនជាសមាជិកអង្គការសហប្រជាជាតិ(UN)ទេ ហើយវត្តមានតៃវ៉ាន់នៅក្នុងព្រឹត្តិការណ៍ពិភពលោកជាច្រើនត្រូវបានចិនជំទាស់ជានិច្ច។ សន្និសីទស្តីពីសមុទ្ររបស់ UN ដែលរៀបចំនៅព័រទុយហ្កាល់ក៏ដូចគ្នា ដោយចិនជំទាស់មិនទទួលស្គាល់ប្រតិភូតៃវ៉ាន់៣រូបដែលមានឈ្មោះចូលរួមក្រោមបញ្ជីប្រតិភូរបស់ទូវ៉ាលូឡើយ។ 

 

បើតាមវិទ្យុនូវែលសេឡង់ RNZ លោក Simon Kofe រដ្ឋមន្រ្តីការបរទេសទូវ៉ាលូបានដកខ្លួនចេញពីសន្និសីទនេះ ដើម្បីបង្ហាញការមិនពេញចិត្តចំពោះទង្វើចិនដែរ។ សន្និសីទស្តីពីសមុទ្ររបស់ UN កំពុងដំណើរការនៅទីក្រុងលីស្បោន ចាប់ពីថ្ងៃទី២៧ ខែមិថុនា ដល់ថ្ងៃទី០១ កក្កដា។ អ្នកចូលរួមប្រមាណ ៧ ពាន់នាក់ត្រូវបានរំពឹងថា នឹងមានវត្តមាននៅសន្និសីទដោយរាប់ចាប់ពីប្រមុខរដ្ឋរហូតដល់សកម្មជនបរិស្ថាន។

 

ជុំវិញរឿងនេះ ក្រសួងការបរទេសតៃវ៉ាន់បានអរគុណទូវ៉ាលូចំពោះការគាំទ្រខ្លួន ហើយក៏បានរិះគន់ចិនចំៗវិញដែរ។ 

 

«សម្ពាធតាមតែអំពើចិត្តរបស់ចិនដែលដាក់ទៅលើរដ្ឋសមាជិក UN គ្រាន់តែបង្ហាញឱ្យឃើញពីសន្ដានដ៏អាក្រក់របស់ខ្លួនជាថ្មីតែប៉ុណ្ណោះ»។ នេះបើតាមក្រសួងការបរទេសតៃវ៉ាន់។

 

ចំណែក អ្នកនាំពាក្យក្រសួងការបរទេសចិនលោក Zhao Lijian បានតបតទៅវិញដោយបញ្ជាក់ពីជំហររបស់ក្រុងប៉េកាំងជាថ្មីថា តៃវ៉ាន់គ្រាន់តែជាខេត្តមួយរបស់ចិនដែលបាត់ទៅប៉ុណ្ណោះ។

 

«ការប៉ុនប៉ងរបស់អាជ្ញាធរតៃវ៉ាន់ក្នុងការចូលរួមនៅក្នុងសន្និសីទ UN ស្តីពីសមុទ្រ និងច្បាប់សមុទ្រ ដោយចូលរួមលើឆាកអន្តរជាតិ ឬដើរតួជាអ្នកអបពីក្រោយប្រទេសដទៃ នឹងគ្រាន់តែបង្អាប់មុខខ្លួនឯងប៉ុណ្ណោះ»។ លោក Zhao ថ្លែងបែបនេះអំឡុងសន្និសីទសារព័ត៌មាននៅក្រុងប៉េកាំង។ 

 

ជាកោះប៉ាស៊ីហ្វិកដែលមានប្រជាជន ១២ ០០០នាក់ ទូវ៉ាលូស្ថិតក្នុងចំណោមប្រទេស១៤ទៀតដែលនៅមានទំនាក់ទំនងការទូតផ្លូវការជាមួយតៃវ៉ាន់។ កោះប៉ាស៊ីហ្វិកនេះបន្តមានទំនាក់ទំនងការទូតជាមួយតៃវ៉ាន់តាំងពីឆ្នាំ១៩៧៩ មកម្ល៉េះ៕