បន្ទាប់ពីចាកចេញពីអ៊ុយក្រែន លោក ចូកូ វីដូដូ ប្រធានាធិបតីឥណ្ឌូណេស៊ី បានធ្វើទស្សនកិច្ចនៅរុស្ស៊ីដើម្បីជួបជាមួយលោក វ្ល៉ាឌីមៀ ពូទីន ប្រធានាធិបតីរុស្ស៊ី ក្នុងថ្ងៃទី៣០ ខែមិថុនា ដើម្បីស្វែងរកកិច្ចចរចាសន្តិភាពរវាងក្រុងកៀវ និងក្រុងមូស្គូ។

 

ក្នុងសន្និសីទសារព័ត៌មានរួមគ្នាជាមួយប្រធានាធិបតីរុស្ស៊ី លោក វីដូដូ បានអះអាងថា ឥណ្ឌូណេស៊ី បានត្រៀមខ្លួនជាស្រេច ក្នុងការជួយប្រធានាធិបតីរុស្ស៊ី និងអ៊ុយក្រែនចាប់ផ្តើមទំនាក់ទំនងជាមួយគ្នា។ យ៉ាងណាមិញ ប្រធានាធិបតីឥណ្ឌូណេស៊ី មិនបានផ្តល់ការលម្អិតជុំវិញការលើកឡើងបែបនេះឡើយ។ កន្លងមក វ៉ូឡូឌីមៀ ហ្សេលេនស្គី ប្រធានាធិបតីអ៊ុយក្រែន បានទទូចចង់ជួបចរចាដោយផ្ទាល់ជាមួយលោកពូទីន ជាច្រើនលើក។ នេះបើតាមសេចក្តីប្រកាសព័ត៌មានរបស់វិមានក្រេមឡាំងចេញនៅថ្ងៃទី៣០ ខែមិថុនា។ 

 

ស្របគ្នានេះ លោកវីដូដូ ដែលជាប្រធានផ្លាស់វេនក្រុមប្រទេសមានសេដ្ឋកិច្ចរីកចម្រើនទាំង ២០ (G20) ផងនោះ បានបន្តថា លោកក៏បានបញ្ជូនសារពីលោកហ្សេលេនស្គី ទៅប្រាប់លោកពូទីនផង ជុំវិញការចរចាសន្តិភាព។ 

 

នៅចំពោះមុខលោកពូទីន ប្រធានាធិបតីឥណ្ឌូណេស៊ី ដែលត្រូវស្គាល់ថា លោក ចូកូវី នោះ បានយល់ថា បើទោះស្ថានភាពក្នុងពេលបច្ចុប្បន្នមានភាពលំបាក ប៉ុន្តែការដោះស្រាយជម្លោះប្រកបដោយសន្តិភាព គឺសំខាន់ណាស់ ក្នុងការឆ្ពោះទៅមុខ ខណៈច្រកទ្វារសម្រាប់កិច្ចចរចានៅតែបន្តបើកចំហរ។ 

 

បើតាមមេដឹកនាំឥណ្ឌូណេស៊ី ដែលបានចាត់ទុកទស្សនកិច្ចខ្លួនជាបេសកកម្មនាំសន្តិភាពសម្រាប់ក្រុងកៀវ និងក្រុងមូស្គូ បានបន្ថែមថា រដ្ឋាភិបាលក្រុងហ្សាការតា ចង់ឃើញសង្រ្គាមបញ្ឈប់ក្នុងពេលឆាប់ៗ និងច្រវាក់ផ្គត់ផ្គង់ប្រភពថាមពល ជី និងអាហារ អាចចាប់ផ្តើមវិញភ្លាមៗ។ សង្រ្គាមនៅអ៊ុយក្រែន​បានធ្វើឱ្យគ្រាប់ធញ្ញជាតិជាច្រើនតោនត្រូវជាប់គាំង និងមិនអាចនាំចេញបាន។ 

 

ចំណែកលោកពូទីនវិញ បានចាត់ទុកជំនួបជាមួយលោក វីដូដូ ថា ទទួលបានផ្លែផ្កាល្អ។ មេដឹកនាំរុស្ស៊ីបានបន្ថែមថា កិច្ចព្រមព្រៀងដែលសម្រេចដោយប្រទេសទាំងពីរ នឹងជួយពង្រឹងទំនាក់ទំនងក្រុងហ្សាការតា និងក្រុងមូស្គូបន្ថែមទៀត។​ 

 

យ៉ាងណាមិញ ក្នុងសន្និសីទសារព័ត៌មាននេះ លោកពូទីន មិនបានលើកឡើងពីស្ថានការណ៍នៅអ៊ុយក្រែនច្រើនឡើយ។ ប៉ុន្តែមេដឹកនាំរុស្ស៊ី បានប្រាប់លម្អិតពីស្ថានការណ៍នៅអ៊ុយក្រែនក្នុងជំនួបជាមួយមេដឹកនាំឥណ្ឌូណេស៊ី។ 

 

បន្ថែមពីបញ្ហាអ៊ុយក្រែន មេដឹកនាំរុស្ស៊ី និងឥណ្ឌូណេស៊ី ក៏បានពិភាក្សាពីពាណិជ្ជកម្មទ្វេភាគី ការអភិវឌ្ឍទំនាក់ទំនង ការកាន់តំណែងជាប្រធានក្រុមប្រទេសG20 របស់ឥណ្ឌូណេស៊ី ជំងឺកូវីដ-១៩ និងបញ្ហាផ្សេងទៀត៕