អន្តរជាតិ
នយោបាយអន្តរជាតិ
ចិនច្រានចោលសម្ដីរបស់នាយករដ្ឋមន្រ្តីនូវែលសេឡង់ដែលថាខ្លួនព្យាយាមកែច្បាប់អន្តរជាតិ នាយករដ្ឋមន្រ្តីនូវែលសេឡង់ ចាស៊ីនដា អាឌើន។ រូបថត AFP
× អ្នកនាំពាក្យស្ថានទូតចិនប្រចាំទីក្រុងវេលីងតោន នៅថ្ងៃទី៣០ ខែមិថុនា បានបដិសេធការលើកឡើងរបស់នាយករដ្ឋមន្ត្រីនូវែលសេឡង់ ចាស៊ីនដា អាឌើន អំឡុងកិច្ចប្រជុំកំពូលសម្ព័ន្ធយោធាណាតូដែលចោទថា ចិនព្យាយាមកែច្បាប់ និងបទដ្ឋានអន្តរជាតិ។ អ្នកនាំពាក្យដដែលចាត់ទុកការលើកឡើងបែបនេះជាការនាំទៅផ្លូវខុស។
អំឡុងកិច្ចប្រជុំកំពូលសម្ព័ន្ធយោធាណាតូនៅទីក្រុងម៉ាឌ្រីដនៅថ្ងៃទី២៩ ខែមិថុនា នាយករដ្ឋមន្ត្រីនូវែលសេឡង់ ចាស៊ីនដា អាឌើន បានរិះគន់ក្រុងប៉េកាំងចំៗថា បានបង្កើនកម្លាំងទ័ពរបស់ខ្លួន និងប៉ុនប៉ងកែប្រែច្បាប់ និងបទដ្ឋានអន្តរជាតិនៅតំបន់ឥណ្ឌូ-ប៉ាស៊ីហ្វិក។
មិនទុកយូរឡើយ អ្នកនាំពាក្យស្ថានទូតចិនប្រចាំក្រុងវេលីងតោនបានចេញសេចក្ដីថ្លែងការណ៍មួយ នៅថ្ងៃទី៣០ ខែមិថុនា ដោយបានច្រានចោលការអះអាងរបស់ប្រមុខរដ្ឋាភិបាលនូវេលសេឡង់ ហើយចាត់ទុកជាការអធិប្បាយនេះ ជាការខុសពីរឿងពិត ។
«យើងបានកត់សម្គាល់លើការអត្ថាធិប្បាយពាក់ព័ន្ធដែលធ្វើឡើងដោយភាគីនូវែលសេឡង់នៅការប្រជុំសម្ព័ន្ធយោធាណាតូដែលរួមមានការចោទប្រកាន់មិនត្រឹមត្រូវមួយចំនួនប្រឆាំងនឹងចិន»។ អ្នកនាំពាក្យស្ថានទូតចិន បានលើកឡើងបែបនេះរួចបន្តថាការលើកឡើងបែបនោះ នឹងមិនមានប្រយោជន៍សម្រាប់ការពង្រឹងទំនុកចិត្តទៅវិញទៅមករវាងប្រទេសទាំងពីរនោះឡើយ។
សេចក្ដីថ្លែងការណ៍ខាងលើដដែលនោះ បានហៅការអត្ថាធិប្បាយដោយលោកស្រី អាឌើន ជាការរំខាន និងធ្វើឱ្យមានអស្ថិរភាពនៅតំបន់សមុទ្រប៉ាស៊ីហ្វិកប៉ុណ្ណោះ។ ស្ថានទូតចិនបញ្ជាក់ថា ការកើនឡើងភាពតានតឹងនៅក្នុងតំបន់នោះ មិនមែនបណ្តាលមកពីកិច្ចសហប្រតិបត្តិការរបស់ចិនជាមួយដៃគូកោះដើម្បីជំរុញការអភិវឌ្ឍន៍ប្រកបដោយចីរភាពនោះទេ។
ដោយនិយាយដល់កិច្ចព្រមព្រៀងថ្មីៗរវាងចិន និងប្រទេសនៅតំបន់ប៉ាស៊ីហ្វិក អ្នកនាំពាក្យខាងលើអះអាងថា កិច្ចសហប្រតិបត្តិការនោះ មិនមានពាក់ព័ន្ធជាមួយការធ្វើយោធូបនីយកម្មនៅក្នុងតំបន់នោះឡើយ។ ប៉ុន្តែបើមានមែន វាក៏មិនមែនជាចិនដែរ។
ទោះបីជាពឹងផ្អែកខ្លាំងលើពាណិជ្ជកម្មជាមួយចិនក្ដី នូវេលសេឡង់ បានបង្កើនសំឡេងប្រឆាំងសកម្មភាពចុងក្រោយនៅតំបន់ប៉ាស៊ីហ្វិក ពិសេសការចុះកិច្ចព្រមព្រៀងសន្តិសុខជាមួយកោះសូឡូម៉ុនដែលនឹងពង្រឹងវត្តមានចិនក្នុងតំបន់កាន់តែខ្លាំង៕ © រក្សាសិទ្ធិដោយ thmeythmey.com