ជាតិ
នយោបាយជាតិ
អ្នកនាំពាក្យការពារជាតិចិន៖«កិច្ចសហការគ្រប់វិស័យរវាងកម្ពុជា-ចិន គឺបើកចំហ មានតម្លាភាព និងស្របច្បាប់» លោក ថាន់ ខឺហ្វី អ្នកនាំពាក្យក្រសួងការពារជាតិចិន (រូបពីគេទំព័ររបស់ក្រសួងការពារជាតិចិន)
× ឆ្លើយតបនឹងចោទប្រកាន់ថា ចិន ដាក់មូលដ្ឋានកងទ័ពជើងទឹកនៅកម្ពុជា អ្នកនាំពាក្យក្រសួងការពារជាតិចិន បកស្រាយថា អ្វីៗ ដែលកម្ពុជា-ចិន ធ្វើជាមួយគ្នា គឺស្របតាមច្បាប់នៃប្រទេសទាំង២ និងច្បាប់អន្តរជាតិ ហើយគ្មានការគំរាមកំហែងដល់ភាគីណាឡើយ។
ក្នុងសន្និសិទកាសែត កាលពីថ្ងៃទី៣០ ខែមិថុនា ឆ្នាំ២០២២ លោកវរសេនីយ៍ឯកពិសេស ថាន់ ខឺហ្វី (Tan Kefei) អ្នកនាំពាក្យក្រសួងការបរទេសចិន ត្រូវបានអ្នកកាសែតឈ្លេចសួរពីការចោទប្រកាន់របស់រដ្ឋបរទេសខ្លះ លើករណីចិន សម្ងំកសាងមូលដ្ឋានកងទ័ពជើងទឹកដោយសម្ងាត់ នៅមូលដ្ឋានកងទ័ពជើងទឹករាម ក្នុងខេត្តព្រះសីហនុ។
លោក ថាន់ ខឺហ្វី ពុំបានឆ្លើយឲ្យចំថា ចិន បានកសាងមូលដ្ឋានសម្រាប់កងទ័ពចិនឈរជើងនៅមូលដ្ឋានកងទ័ពជើងទឹករាមរបស់កម្ពុជា ឬក៏អត់នោះទេ ប៉ុន្តែលោក បានបង្ហាញជារួម អំពីភាពត្រឹមត្រូវលើអ្វីៗដែលកម្ពុជា-ចិន ធ្វើជាមួយគ្នា។ អ្នកនាំពាក្យក្រសួងការពារជាតិចិនរូបនេះ បញ្ជាក់ដូច្នេះថា៖«ចិន និងកម្ពុជា ជាដៃគូយុទ្ធសាស្រ្តគ្រប់ជ្រុងជ្រោយ ហើយកិច្ចសហប្រតិបត្តិការលើគ្រប់វិស័យរវាងប្រទេសទាំង២ គឺបើកចំហ មានតម្លាភាព និងស្របច្បាប់»។
ជាមួយគ្នានេះ លោក ថាន់ ខឺហ្វី បានរំលេចពីគម្រោងជួសជុលនិងធ្វើឲ្យប្រសើរឡើង នៅមូលដ្ឋានកងទ័ពជើងទឹករាម ដែលជាជំនួយរបស់ចិន។ តាមរយៈគម្រោងនេះ កាលពីថ្ងៃទី៨ ខែមិថុនា ឆ្នាំ២០២២ កម្ពុជា បានបើកការដ្ឋានសាងសង់រោងជាងជួសជុល និងផែសំចត នៅមូលដ្ឋានសមុទ្ររាម ក្នុងគោលដៅលើកកម្ពស់សមត្ថភាពបច្ចេកទេសលើវិស័យកងទ័ពជើងទឹកកម្ពុជា។ ពិធីបើកការដ្ឋាននេះ ប្រព្រឹត្តទៅក្រោមអធិបតីភាពរបស់សម្តេច ទៀ បាញ់ ឧបនាយករដ្ឋមន្រ្តី-រដ្ឋមន្រ្តីក្រសួងការពារជាតិកម្ពុជា និងលោក វ៉ាង វិនទៀន (Wang Wentian) ឯកអគ្គរដ្ឋទូតចិនប្រចាំកម្ពុជា។
លោកវរសេនីយ៍ឯកពិសេស ថាន់ ខឺហ្វី ថ្លែងថា គម្រោងជុសជុលនិងធ្វើឲ្យប្រសើរឡើងនៅមូលដ្ឋានកងទ័ពជើងទឹករាម កើតចេញពីលទ្ធផលនៃការគោរពគ្នាទៅវិញទៅមក និងការពិភាក្សាគ្នាដោយស្មើភាពរវាងប្រទេសទាំង២។ លោក បន្តថា គម្រោងនេះ ស្របតាមច្បាប់នៃប្រទេសទាំង២ផង និងស្របតាមច្បាប់អន្តរជាតិផង ហើយមិនប្រឆាំងនឹងប្រទេសជាភាគីទី៣ណាមួយឡើយ។
អ្នកនាំពាក្យក្រសួងការពារជាតិចិន លើកឡើងដោយមិនបញ្ចេញចំឈ្មោះប្រទេសណាមួយថា អ្នកខ្លះ តែងគិតលម្អៀតលើអ្នកដទៃ ដូច្នេះ គ្មានអ្វីដែលគួរឲ្យឆ្ងល់នោះទេ ដែលពួកគេ តែងមើលឃើញអ្វីៗ ជាការខ្វះតម្លាភាព ហើយពួកគេ តែងសង្ស័យលើអ្នកដទៃ ថាប្រឆាំងនឹងពួកគេ។ លោក បង្ហាញការចង់បានរបស់ចិនបែបនេះថា៖«យើង ទទូចឲ្យអ្នកទាំងនោះ បញ្ឈប់ការធ្វើអត្ថាធិប្បាយដែលគ្មានការទទួលខុសត្រូវ បញ្ឈប់ការនិយាយបំផ្លើសថា មានការគំរាមកំហែងពីកងទ័ពចិន ហើយផ្ទុយមកវិញ ត្រូវចូលរួមធ្វើកិច្ចការទាំងអស់គ្នា ដើម្បីការពារសន្តិភាព និងស្ថិរភាពក្នុងតំបន់»។
គួរដឹងថា ការចោទប្រកាន់ជុំវិញករណីចិន កសាងអគារផ្សេងៗ សម្រាប់ឲ្យកងទ័ពចិន ឈរជើងនៅមូលដ្ឋានកងទ័ពជើងទឹករាម ជាទូទៅចេញមកពីសហរដ្ឋអាម៉េរិក ដោយពេលខ្លះចេញពីមាត់របស់មន្រ្តីក្នុងជួងរដ្ឋាភិបាល ពេលខ្លះចេញពីស្ថាប័នស្រាវជ្រាវឯកជន និង ពេលខ្លះចេញពីសារព័ត៌មាន។ ពេលរដ្ឋាភិបាលកម្ពុជា បកស្រាយថា គ្មានកងទ័ពចិនលើទឹកដីកម្ពុជា សហរដ្ឋអាម៉េរិក ក៏ស្ងាត់ទៅវិញ តែមិនស្ងាត់រហូតឡើយ ដោយមួយរយៈក្រោយមក ព័ត៌មានជុំវិញរឿងនេះ ក៏លេចចេញពីសហរដ្ឋអាម៉េរិកមកជាថ្មីទៀត។ ជារួម វិមតិស្ស័យអំពីកងទ័ពចិនលើទឹកដីកម្ពុជានេះ នៅតែជាវិមតិសង្ស័យរបស់អាម៉េរិក៕
© រក្សាសិទ្ធិដោយ thmeythmey.com