ប៉ុន្មានឆ្នាំចុងក្រោយ កូរ៉េខាងត្បូង បានទាមទារឱ្យជប៉ុនគិតគូរពីសំណងជុំវិញការចាប់បង្ខំកម្លាំងពលកម្ម និងការបំពានផ្លូវភេទលើប្រជាជនកូរ៉េខាងត្បូង ក្នុងសម័យសង្រ្គាមលោកលើកទីពីរ។ បើទោះមានកិច្ចព្រមព្រៀងដោះស្រាយក្ដី បញ្ហាបន្សល់ទុកពីប្រវត្តិសាស្រ្តនេះ នៅតែលងបន្លាចប្រទេសជិតទាំងពីរ។

 

ដោយមើលឃើញការធ្លាក់ចុះទំនាក់ទំនងទ្វេភាគី​រវាងក្រុងសេអ៊ូល និងក្រុងតូក្យូ ប្រធានាធិបតីកូរ៉េខាងត្បូងថ្មី យូន សុកយ៉ល បានអំពាវនាវទៅកាន់ជប៉ុនឱ្យពិភាក្សាបញ្ហាប្រវត្តិសាស្រ្ត និងអនាគតរួមគ្នា ដើម្បីអាចឈានទៅដល់ការដោះស្រាយជម្លោះប្រវត្តិសាស្រ្តរវាងប្រទេសទាំងពីរ។ 

 

«...បញ្ហាប្រវត្តិសាស្រ្ត និងបញ្ហាអនាគតរបស់ប្រទេសទាំងពីរ គួរតែលើកទៅដាក់លើកតុមួយ និងដោះស្រាយរួមគ្នា»។​ ប្រធានាធិបតីកូរ៉េខាងត្បូង បានប្រាប់អ្នកសារព័ត៌មានបែបនេះ នៅលើយន្តហោះពិសេសចេញពីអេស្ប៉ាញទៅមាតុប្រទេសវិញ។

 

ក្នុងសន្និសីទសារព័ត៌មាននោះ លោក យូន បានបន្តថា ក្រុងតូក្យូ និងក្រុងសេអ៊ូល គួរតែបដិសេធចំពោះចំណាត់ការដែលគ្មានប្រសិទ្ធភាពលើបញ្ហាប្រវត្តិសាស្រ្ត ព្រោះវិធានការបែបនោះ មិនអាចពិភាក្សាពីបញ្ហាបច្ចុប្បន្ន រួមទាំងអនាគត។ បើតាមលោកយូន ប្រទេសទាំងពីរអាចលើកយកបញ្ហាមកពិភាក្សាជាមួយគ្នា ហើយលោកជឿថាបើកូរ៉េខាងត្បូង និងជប៉ុនអាចធ្វើការជាមួយគ្នានៅពេលអនាគត ជម្លោះប្រវត្តិសាស្រ្តក៏អាចដោះស្រាយបានដែរ។ 

 

ការទទូចឱ្យមានការពិភាក្សាលើបញ្ហាប្រវត្តិសាស្រ្ត និងអនាគតពីសំណាក់មេដឹកនាំកូរ៉េខាងត្បូងបែបនេះ ធ្វើឡើងស្របពេលកូរ៉េខាងជើង កំពុងបង្កការគំរាមកំហែង តាមរយៈការសាកល្បងមីស៊ីលជាច្រើនលើក រួមទាំងលទ្ធភាពសាកល្បងនុយក្លេអ៊ែរជាថ្មីផង បើគិតចាប់ពីឆ្នាំ២០១៧។ 

 

គួររំឮកថា បន្ទាប់ពីជំនួបនៅក្នុងក្រុងម៉ាឌ្រីដ លោកយូន បានប្រាប់អ្នកសារព័ត៌មានថា លោក គីស៊ីដា ហ្វូមីអូ នាយករដ្ឋមន្រ្តីជប៉ុន អាចក្លាយជាដៃគូ ក្នុងការដោះស្រាយបញ្ហារវាងប្រទេសជិតខាងទាំងពីរ និងអភិវឌ្ឍទំនាក់ទំនងទ្វេភាគី៕