ជាតិ
នយោបាយជាតិ
បក្សសំបុកឃ្មុំរបស់លោក ម៉ម សូណង់ដូ បន្តបានកៅអីជំទប់ទី២នៅឃុំតាំងក្រសាំង លោក ម៉ម សូណង់ដូ ប្រធាន គណបក្សសំបុកឃ្មុំសង្គម ប្រជាធិបតេយ្យ
× គណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ ទទួលបានអាសនៈជំទប់ទី២ នៅឃុំតាំងក្រសាំង ស្រុកបាធាយ ខេត្តកំពង់ចាម សម្រាប់ការបោះឆ្នោតក្រុមប្រឹក្សាឃុំ-សង្កាត់អាណត្តិទី៥។ ជាអាសនៈតែមួយគត់ដែលគណបក្សនេះទទួលបាន ដូចជាការបោះឆ្នោតកាលពីឆ្នាំ២០១៧ យ៉ាងដូច្នោះដែរ។
សម្រាប់ការប្រកួតប្រជែងឆ្នាំ២០២២នេះ គណបក្សសំបុកឃ្មុំសង្គមប្រជាធិបតេយ្យ ដែលជាបក្សចំណាស់មួយ បានឈរឈ្មោះនៅឃុំ-សង្កាត់ចំនួន២៣ក្នុង១០រាជធានី-ខេត្ត។ តាំងក្រសាំង ក្លាយជាមូលដ្ឋានតែមួយគត់ដែលសំបុកឃ្មុំ ទទួលបានអាសនៈ។
ក្នុងចំណោមអាសនៈចំនួន៧នៅតាំងក្រសាំង លោក យឹម យី នៃគណបក្សសំបុកឃ្មុំសង្គមប្រជាធិបតេយ្យ បានតំណែងជាជំទប់ទី២ ពីរអាណត្តិជាប់គ្នា ខណៈលោក សុន ក្រិប ពីគណបក្សប្រជាជនកម្ពុជា ជាប់ជាមេឃុំ និងលោក អៀង ប៉ុច ពីគណបក្សភ្លើងទៀន ជាប់ជាជំទប់ទី១។ សមាជិក៤នាក់ទៀត មាន លោក ភឿន ស៊ន, លោក ទុយ អ៊ីម, អ្នកស្រី ស៊្រីម នាថ ពីគណបក្សប្រជាជនកម្ពុជា និងលោក ហាយ ធឿន ពីគណបក្សភ្លើងទៀន។
យោងតាមលទ្ធផលផ្លូវការ គណបក្សចំនួន៩ក្នុងចំណោម១៧ បានទទួលអាសនៈក្នុងអណត្តិទី៥នេះ ដោយក្នុងចំណោម១១៦២២អាសនៈនៃ១៦៥២ឃុំ-សង្កាត់ គណបក្សប្រជាជនកម្ពុជា ទទួលបានទៅដល់ ៩៣៧៦អាសនៈ គណបក្សភ្លើងទៀន បាន ២១៩៨អាសនៈ។
គណបក្សហ៊្វុនស៊ិនប៉ិច ស្ថិតនៅលេខ៣ ដោយបាន១៩អាសនៈ បន្ទាប់មកគណបក្សខ្មែររួបរួមជាតិ បាន១៣អាសនៈ។ គណបក្សប្រជាធិបតេយ្យមូលដ្ឋាន បាន៦អាសនៈ គណបក្សខ្មែរស្រឡាញ់ជាតិ បាន៥អាសនៈ គណបក្សយុវជនកម្ពុជា បាន៣អាសនៈ គណបក្សកម្ពុជានិយម បាន១អាសនៈ និងគណបក្សសំបុកឃ្មុំសង្គមប្រជាធិបតេយ្យ បាន១អាសនៈ។
បើតាមគ.ជ.ប ពលរដ្ឋចេញទៅបោះឆ្នោត មានជិត៧,៤លាននាក់ ដែលស្មើនឹង៨០,៣២ភាគរយ ខណៈសន្លឹកឆ្នោតបានការមានជាង៧,២លានសន្លឹក និងមិនបានការមានជិត១៦ម៉ឺនសន្លឹក៕
Tag:
បោះឆ្នោត
សំបុកឃ្មុំសង្គមប្រជាធិបតេយ្យ
ម៉ម សូណង់ដូ
© រក្សាសិទ្ធិដោយ thmeythmey.com