ចាប់តាំងពីរដ្ឋប្រហារយោធានៅមីយ៉ាន់ម៉ា ក្នុងខែកុម្ភៈឆ្នាំ២០២១ ចិន មិនធ្លាប់ចេញសេចក្តីថ្លែងការណ៍រិះគន់របបសឹកឡើយ ដោយគ្រាន់តែជំរុញឱ្យភាគីពាក់ព័ន្ធក្នុងប្រទេសអាស៊ីអាគ្នេយ៍មួយនេះ ដោះស្រាយជម្លោះដោយសន្តិភាព។ មិនតែប៉ុណ្ណោះ ខណៈមីយ៉ាន់ម៉ា កំពុងស្ថិតនៅឯកោពីសហគមន៍អន្តរជាតិ លោក វ៉ាង យី រដ្ឋមន្រ្តីការបរទេសចិន ក៏ធ្វើទស្សនកិច្ចទៅមីយ៉ាន់ម៉ាថែមទៀត។ នេះជាទស្សនកិច្ចរបស់មន្រ្តីជាន់ខ្ពស់ចិនទៅមីយ៉ាន់ម៉ាជាលើកដំបូង ចាប់តាំងយោធាទម្លាក់រដ្ឋាភិបាលស៊ីវិល។ 

 

ក្នុងជំនួបជាមួយសមភាគីមីយ៉ាន់ម៉ា Wunna Maung Lwin នៅទីក្រុងបូរាណ Bagan នៅថ្ងៃទី៣ ខែកក្កដា ប្រមុខការទូតចិន បានថ្លែងថា ទំនាក់ទំនងចិន-មីយ៉ាន់ម៉ា បានទទួលការគាំទ្រយ៉ាងខ្លាំងពីសាធារណៈ ដោយបានឆ្លងកាត់ឧបសគ្គជាច្រើន ប៉ុន្តែនៅតែបន្តរឹងមាំ។ 

 

«ចិនផ្តល់តម្លៃមិត្តភាពប្រពៃណីរវាងប្រទេសទាំងពីរ ហើយនឹងបន្តអនុវត្តគោលនយោបាយមិត្តភាពចំពោះមីយ៉ាន់ម៉ា និងប្រជាជនមីយ៉ាន់ម៉ា»។ លោក វ៉ាង បានសង្កត់ធ្ងន់បែបនេះ ដោយបន្តថា ក្រុងប៉េកាំង នឹងសហការរួមគ្នាជាមួយក្រុងណៃពិដោ ដើម្បីពង្រឹងបន្ថែមទៀតលើសសរស្តម្ភទាំងបួន ដូចជាទំនុកចិត្តនយោបាយទៅវិញទៅមក, កិច្ចសហប្រតិបត្តិការផ្តល់ប្រយោជន៍រួម, ទំនាក់ទំនងប្រជាជន និងប្រជាជនរួមទាំងការផ្លាស់ប្តូរវប្បធម៌។

 

ក្នុងជំនួបដដែល មន្រ្តីជាន់ខ្ពស់ចិនរូបនេះ​ បានបន្ថែមថា ចិនគាំទ្រមីយ៉ាន់ម៉ា ក្នុងការស្វែងរកដំណើរការអភិវឌ្ឍដែលស្របតាមលក្ខខណ្ឌជាតិរបស់ខ្លួន រួមទាំងការការពារប្រយោជន៍ច្បាប់ និងសេចក្តីថ្លៃថ្នូរជាតិនៅលើឆាកអន្តរជាតិ។ នេះបើតាមការចុះផ្សាយរបស់ទីភ្នាក់ងារព័ត៌មាន Xinhua។ 

 

ចំណែករដ្ឋមន្រ្តីការបរទេសនៃរដ្ឋាភិបាលយោធាមីយ៉ាន់ម៉ា វិញ បានឆ្លើយតបថា ក្រុងណៃពិដោ ពេញចិត្តមិត្តភាពចិន-មីយ៉ាន់ម៉ា ដែលតែងគោរពគ្នាទៅវិញទៅមក និងយកចិត្តទុកដាក់ដោយស្មើភាព។ មិនតែប៉ុណ្ណោះ លោក Wunna Maung Lwin បានអះអាងថា មីយ៉ាន់ម៉ាគាំទ្រជំហររបស់ចិនលើបញ្ហាតៃវ៉ាន់ ហុងកុង ទីបេ និងស៊ីនជាំង។ ទន្ទឹមនេះ ក្រុងណៃពិដោ បានត្រៀមខ្លួនជាស្រេចក្នុងការធ្វើការជាមួយចិនដោយជិតស្និទ្ធ ដើម្បីពង្រឹងសហគមន៍ចិន-មីយ៉ាន់ម៉ាជាមួយអនាគតរួមគ្នា។

 

បន្ថែមពីបញ្ហាខាងលើ ភាគីទាំងពីរ ក៏បានពិភាក្សាពីស្ថានការណ៍នៅមីយ៉ាន់ម៉ាផង។ បើតាមលោក Wunna Maung Lwin មីយ៉ាន់ម៉ាប្តេជ្ញាក្នុងការអនុវត្តដំណើរការ៥ចំណុច ដែលដាក់ចេញដោយរដ្ឋាភិបាលយោធាមីយ៉ាន់ម៉ា និងការឯកភាពទាំង៥ របស់អាស៊ាន ដែលបានដាក់ចេញនាពេលកន្លងមក។

 

ប្រមុខការទូតនៃរបបសឹកបានលើកឡើងថា ក្រុងណៃពិដោ នឹងជំរុញដំណើរការអន្តរកាលទៅរកប្រជាធិបតេយ្យ។​ ជាការឆ្លើយតប លោកវ៉ាង បានបង្ហាញក្តីសង្ឃឹមថា មីយ៉ាន់ម៉ា នឹងអាចរកឃើញការបង្រួបបង្រួមនយោបាយ, សន្តិភាព និងស្ថិរភាព តាមរយៈកិច្ចពិភាក្សា ដែលមានចែងក្នុងរដ្ឋធម្មនុញ្ញ និងនីតិវិធីច្បាប់៕