ប្រជុំកោះនៅសមុទ្រចិនខាងកើតដែលចិនហៅថា Diaoyu ខណៈជប៉ុនហៅ Senkaku ជាចំណុចជម្លោះដ៏រ៉ាំរ៉ៃរវាងក្រុងប៉េកាំង និងក្រុងតូក្យូ។ កោះ Senkaku ដែលគ្រប់គ្រងដោយជប៉ុនតាំងពីឆ្នាំ១៨៩៥ ត្រូវបានចិនទាមទារជាកម្មសិទ្ធិនៅឆ្នាំ១៩៧០ ដោយសម្អាងលើប្រវត្តិសាស្រ្ត។ ភាពតានតឹងជុំវិញប្រជុំកោះនេះកាន់តែកើនឡើងចាប់តាំងពីឆ្នាំ ២០១២ នៅពេលរដ្ឋាភិបាលជប៉ុនបានទិញកោះ៣នៃប្រជុំកោះជម្លោះនេះពីប្រជាជនជប៉ុន។ 

 

បើតាមការផ្សាយរបស់ទូរទស្សន៍ជប៉ុន NHK នាវាល្បាតចិន បានចូលទៅកៀកប្រជុំកោះនេះជាលើកទីមួយតាំងពីឆ្នាំ ២០១៨មក។ ក្នុងសេចក្តីថ្លែងការណ៍របស់ក្រសួងការពារជាតិជប៉ុន នៅថ្ងៃទី៤ ខែកក្កដាប្រហែលម៉ោង ៧ :៤៤នាទីព្រឹក នាវាកងទ័ពជើងទឹកចិន ត្រូវបានសង្កេតឃើញចូលក្នុងដែនទឹកជប៉ុន។ 

 

«​យើងព្រួយបារម្ភយ៉ាងខ្លាំង ហើយបានដាក់ពាក្យបណ្តឹងទៅភាគីចិនតាមរយៈផ្លូវការទូត ព្រមទាំងជំរុញឱ្យពួកគេបញ្ចៀសកុំឱ្យមានឧបទ្ទវហេតុស្រដៀងនេះកើតឡើជាថ្មី»។  លោក Seiji Kihara អនុប្រធានខុទ្ទកាល័យជប៉ុនប្រាប់អ្នកកាសែតបែបនេះ ដោយបន្ថែមថា ប្រជុំកោះទាំងនេះគឺជាទឹកដីរបស់ជប៉ុនដោយផ្អែកទាំងតាមប្រវត្តិសាស្រ្ត និងច្បាប់អន្តរជាតិ។

 

ទន្ទឹមនេះ ទីភ្នាក់ងារព័ត៌មានជប៉ុន NHK, Jiji Press និងប្រព័ន្ធផ្សព្វផ្សាយជប៉ុនផ្សេងទៀតរាយការណ៍នៅថ្ងៃដដែលថា នាវាកងទ័ពជើងទឹករុស្ស៊ីក៏ត្រូវបានគេប្រទះឃើញនៅដែនទឹកក្បែរកោះជម្លោះនោះដែរ។ ប៉ុន្តែ រឿងនេះមិនទាន់មានការបញ្ជាក់ពីក្រសួងការពារជាតិជប៉ុននោះទេ។

 

កាលពីខែឧសភា យន្តហោះចម្បាំង និងយន្តហោះទម្លាក់គ្រាប់បែករបស់រុស្ស៊ី​ និងចិន ក៏បានល្បាតរួមគ្នាលើសមុទ្រជប៉ុន និងសមុទ្រចិនខាងកើត ខណៈជប៉ុនកំពុងធ្វើជាម្ចាស់ផ្ទះរៀបចំកិច្ចប្រជុំជាមួយមេដឹកនាំបណ្តាប្រទេសសន្តិសុខចតុភាគី (Quad) ដែលមានអាម៉េរិក អូស្ត្រាលី ឥណ្ឌា និងជប៉ុន។ បើទោះជាការល្បាតយន្តហោះនោះមិនបានបំពានដែនអាកាសជប៉ុនក៏ដោយ ក្រុងតូក្យូចាត់ទុកចាត់ទុកទង្វើនោះ ជាការបង្ករឿង៕