អន្តរជាតិ
សមាជិកណាតូ ចុះហត្ថលេខាលើពិធីសារចូលជាសមាជិករបស់ស៊ុយអែតនិងហ្វាំងឡង់ រដ្ឋមន្ត្រីការបរទេសហ្វាំងឡង់ អគ្គលេខាធិការណាតូ និងរដ្ឋមន្រ្តីការបរទេសស៊ុយអែត ក្នុងជំនួបនៅទីស្នាក់ការណាតូ។ រូបថត AFP
× សមាជិកសម្ព័ន្ធយោធាណាតូទាំង៣០ នៅថ្ងៃទី៥ ខែកក្កដា បានចូលរួមចុះហត្ថលេខាលើពិធីសារចូលជាសមាជិកសម្រាប់ហ្វាំងឡង់ និងស៊ុយអ៊ែតនៅទីស្នាក់ការកណ្ដាលក្នុងទីក្រុងព្រុចសែលទឹកដីបែលហ្ស៊ិក។ ប៉ុន្តែប្រទេសទាំងពីរនៅត្រូវការសភាប្រទេស សមាជិកនីមួយៗផ្ដល់សច្ចាប័នទៀតទើបអាចចូលជាសមាជិកបានពេញលេញ។
អំឡុងសន្និសីទកាសែតនៅថ្ងៃទី៥ ខែកក្កដាបន្ទាប់ពីការចុះហត្ថលេខាលើពិធីសារសម្រាប់ហ្វាំងឡង់ និងស៊ុយអ៊ែត អគ្គលេខាធិការសម្ព័ន្ធយោធាណាតូ Jens Stoltenberg ថ្លែងថា នេះជាព្រឹត្តិការណ៍ប្រវត្តិសាស្ត្រ ហើយជាមួយសមាជិក៣២ប្រទេសជុំវិញពិភពលោក សម្ព័ន្ធយោធាណាតូនឹងកាន់តែខ្លាំងជាងមុន។ លោក Stoltenberg ក៏បានជំរុញឱ្យ សម្ព័ន្ធមិត្តទាំងអស់ផ្ដល់សច្ចាប័នរហ័សសម្រាប់ប្រទេសអឺរ៉ុបខាងជើងទាំងពីរផងដែរ។
«សន្តិសុខរបស់ហ្វាំងឡង់ និងស៊ុយអែតមានសារសំខាន់សម្រាប់សម្ព័ន្ធយោធារបស់យើងរួមទាំងក្នុងពេលដំណើរការផ្តល់សច្ចាប័នផងដែរ»។ លោក Stoltenberg លើកឡើងបែបនេះរួចបញ្ជាក់ថា សម្ព័ន្ធមិត្តជាច្រើនបានប្ដេជ្ញាចិត្តយ៉ាងច្បាស់លាស់ចំពោះសន្តិសុខរបស់ហ្វាំងឡង់ និងស៊ុយអែត ហើយសម្ព័ន្ធយោធាណាតូក៏បានបង្កើនវត្តមាននៅក្នុងតំបន់រួមទាំងការធ្វើសមយុទ្ធជាច្រើនទៀត។
ការចុះហត្ថលេខាលើពិធីសារចូលជាសមាជិកនេះមានន័យថា ស៊ុយអ៊ែត និងហ្វាំងឡង់អាចចូលរួមនៅក្នុងកិច្ចប្រជុំនានារបស់សម្ព័ន្ធយោធាណាតូ ហើយក៏អាចមានសិទ្ធិចូលប្រើប្រាស់ព័ត៌មានសម្ងាត់របស់សម្ព័ន្ធយោធាមួយនេះកាន់តែទូលាយផងដែរ។ ប៉ុន្តែប្រទេសទាំងពីរនឹងមិនត្រូវបានការពារដោយច្បាប់ដែលចែងពីការការពារគ្នាទៅវិញទៅមកឡើយ លុះត្រាតែសភាប្រទេសសមាជិកទាំងអស់យល់ព្រមផ្ដល់សច្ចាប័នសិន។ ការផ្ដល់សច្ចាប័ននេះកន្លងមក ចំណាយពេលរហូតដល់មួយឆ្នាំឯណោះ។
នៅថ្ងៃដដែល រដ្ឋមន្ត្រីការបរទេសស៊ុយអ៊ែតលោកស្រី Ann Linde បានបង្កោះសារលើបណ្ដាញសង្គម Twitter ជាមួយការអរគុណដល់ការគាំទ្ររបស់សម្ព័ន្ធយោធាណាតូ ហើយលោកស្រីក៏ទន្ទឹងរង់ចាំធ្វើការជាមួយសម្ព័ន្ធណាតូដើម្បីចូលរួមធានាសន្តិសុខជារួមផងដែរ។
ការចុះហត្ថលេខាលើពិធីសារនេះបានធ្វើឡើងបន្ទាប់ពីមានកិច្ចព្រមព្រៀងមួយរវាងតួកគី និង ស៊ុយអ៊ែត និងហ្វាំងឡង់កាលពីសប្តាហ៍មុននៅទីក្រុងម៉ាឌ្រីដ។ តួកគីបានយល់ព្រមដកការវ៉េតូរបស់ខ្លួន បន្ទាប់ពីប្រទេសទាំងពីរបានធានានឹងចាត់វិធានការបន្ថែមទៀតដើម្បីប្រយុទ្ធប្រឆាំងនឹងអំពើភេរវកម្ម និងក្រុមសកម្មប្រយុទ្ធដែលតួកគីចាត់ទុកថាបង្កអសន្តិសុខសម្រាប់ខ្លួន។
យ៉ាងណាមិញ កាលពីថ្ងៃទី៣០ ខែមិថុនា ប្រធានាធិបតីតួកគី Recep Tayyip Erdogan ព្រមានថា ប្រសិនបើស៊ុយអ៊ែត និងហ្វាំងឡង់មិនធ្វើតាមការសន្យានៃកិច្ចព្រមព្រៀងគ្នាខាងលើនោះទេ នោះការផ្តល់សច្ចាប័នឱ្យប្រទេសទាំងពីរចូលជាសមាជិកនឹងមិនត្រូវបានបញ្ជូនទៅសភាតួកគីឱ្យសម្រេចនោះឡើយ៕
Tag:
ណាតូ
ស៊ុយអែត
ហ្វាំងឡង់
© រក្សាសិទ្ធិដោយ thmeythmey.com