តាមការចុះផ្សាយរបស់ទីភ្នាក់ងារព័ត៌មាន Kyodo នាវាល្បាតរបស់ចិនមួយគ្រឿង នៅថ្ងៃទី៤ ខែកក្កដា បានបើកក្បែរប្រជុំ Diaoyu ខណៈនាវាល្បាតចិនចំនួន ២គ្រឿង បានដេញតាមទូកនេសាទជប៉ុននៅដែនទឹកក្បែរប្រជុំកោះនោះ។ ជប៉ុន បានដាក់ការតវ៉ាយ៉ាងខ្លាំងជាមួយចិន។​ 

 

មួយថ្ងៃបន្ទាប់ អ្នកនាំពាក្យក្រសួងការបរទេសចិន លោក Zhao Lijian បានថ្លែងការពារថា សកម្មភាពនាវារបស់យោធាចិន នៅក្បែរប្រជុំកោះ Diaoyu គឺស្របច្បាប់។ 

 

«សកម្មភាពអនុវត្តច្បាប់របស់នាវាល្បាតចិន ទាក់ទិននឹងទូកនេសាទជប៉ុន គឺស្របច្បាប់ ក្នុងការការពារអធិបតេយ្យខ្លួន»។ អ្នកនាំពាក្យក្រសួងការបរទេសចិន បានផ្តល់ចម្លើយបែបនេះ ទៅអ្នកសារព័ត៌មានដែលបានសួរ ជុំវិញវត្តមាននាវាល្បាតរបស់ចិននៅក្បែរប្រជុំកោះDiaoyu ឬជប៉ុនហៅ Senkaku ក្នុងសន្និសីទសារព័ត៌មាននៅថ្ងៃទី៥ ខែកក្កដា។ 

 

ទាក់ទិននឹងបញ្ហានេះ មន្រ្តីក្រសួងការបរទេសចិន បានបន្ថែមថា ក្នុងប៉ុន្មានឆ្នាំចុងក្រោយ ទូកនេសាទរបស់ជប៉ុនតែងចូលមកក្នុងដែនទឹករបស់ចិន ក្បែរប្រជុំDiaoyu ជាច្រើនលើក ដោយខុសច្បាប់។ បើតាមលោក Zhao កោះ Diaoyu និងកោះក្បែរនោះ ជាផ្នែកមួយនៃដែនដីចិន។ 

 

សូមបញ្ជាក់ថា កោះ Senkaku ដែលគ្រប់គ្រងដោយជប៉ុនតាំងពីឆ្នាំ១៨៩៥ ត្រូវបានចិនទាមទារជាកម្មសិទ្ធិនៅឆ្នាំ១៩៧០ ដោយសម្អាងលើប្រវត្តិសាស្រ្ត។ ជាញយៗ ប្រទេសជិតខាងទាំងពីរ តែងប៉ះសម្តីគ្នាជុំវិញភាពជាកម្មសិទ្ធិលើប្រជុំកោះនោះ៕