រដ្ឋមន្រ្តីការបរទេស និងជាទីប្រឹក្សារដ្ឋចិន លោកវ៉ាង យី ធ្វើទស្សនកិច្ចនៅថៃចាប់ពីថ្ងៃទី៥ ដល់ថ្ងៃទី៦ ខែកក្កដា មុនទៅចូលរួមកិច្ចប្រជុំក្រុមប្រទេសមានសេដ្ឋកិច្ចជឿនលឿនទាំង ២០ (G20) នៅកោះបាលី ឥណ្ឌូណេស៊ី។ ប្រមុខការទូតចិនរូបនេះ ក៏បានជួបជាមួយនាយករដ្ឋមន្រ្តីថៃ លោក ប្រាយុទ្ធ ចន្ទអូចាផង ដោយភាគីទាំងពីរបានជជែកពីបញ្ហាជាច្រើន រួមទាំងការវិនិយោគ។ 

 

តាមការបញ្ជាក់របស់អ្នកនាំពាក្យរដ្ឋាភិបាលថៃ Thanakorn Wangboonkongchana ដែលផ្តល់ការសង្ខេបនៃជំនួបខាងលើ លោក ប្រាយុទ្ធ បានប្រាប់រដ្ឋមន្រ្តីការបរទេសចិន ឱ្យបង្កើនការវិនិយោគនៅថៃដែលមានទីតាំងដ៏ល្អសម្រាប់រោងចក្រ និងដំណើរការផលិតទំនិញ។ 

 

«លោកប្រាយុទ្ធ បានអញ្ជើញចិនឱ្យបង្កើនការវិនិយោគនៅថៃ»។ អ្នកនាំពាក្យរដ្ឋាភិបាលថៃ បានបញ្ជាក់បែបនេះ ដោយបញ្ជាក់ពីសម្តីរបស់លោកប្រាយុទ្ធបន្ថែមថា ច្រកសេដ្ឋកិច្ចភាគខាងកើត (EEC) បានត្រៀមជាស្រេចសម្រាប់ការវិនិយោគរបស់ក្រុមហ៊ុនចិន ដែលមានជំនាញក្នុងផ្នែករថយន្តអគ្គិសនី និងកសិ-ឧស្សាហកម្មជាដើម។ នេះបើតាមការចុះផ្សាយរបស់កាសែតបាងកកប៉ុស្តិ៍។ 

 

ច្រកសេដ្ឋកិច្ចភាគខាងកើត ជាតំបន់អភិវឌ្ឍពិសេស ដែលស្ថិតនៅក្នុងខេត្តភាគខាងកើតរបស់ថៃចំនួន៣ មានខេត្ត Chonburi, ខេត្ត Rayong និង ខេត្តChachoengsao។

 

បើតាមលោកប្រាយុទ្ធ ទំហំពាណិជ្ជកម្មទ្វេភាគី នៅចន្លោះខែមករា និងខែមេសា ឆ្នាំ២០២២ បានហក់ឡើង ២០ភាគរយ ដែលនេះជាការវិវដ្តប្រកបដោយភាពវិជ្ជមានមួយ។ ប្រមុខរដ្ឋាភិបាលថៃរូបនេះ ក៏បានអរគុណចិន ដែលបានជួយសម្រួលការដឹកជញ្ជូនទំនិញកសិកម្មថៃ ទៅក្នុងទីផ្សារចិនផងដែរ។ 

 

មិនតែប៉ុណ្ណោះ លោកមេដឹកនាំថៃ បានសរសើរពីទំនាក់ទំនងយ៉ាងជិតស្និទ្ធរវាងក្រុងប៉េកាំង-ក្រុងបាងកក និងសាទរពីខួបលើកទី១០ នៃភាពជាដៃគូយុទ្ធសាស្រ្តគ្រប់ជ្រុងជ្រោយ។ អ្នកនាំពាក្យរដ្ឋាភិបាលថៃ បានបន្តថា ប្រមុខរដ្ឋាភិបាលថៃ និងប្រមុខការទូតចិន បានឯកភាពជាគោលការណ៍ ដើម្បីពង្រឹងទំនាក់ទំនងបន្ថែមទៀត។ 

 

ចំណែកលោកវ៉ាង វិញ បានអះអាងថា ចិន និងថៃ មានការអភិវឌ្ឍទំនាក់ទំនងយ៉ាងល្អ និងមានស្ថិរភាព។ ដោយចាត់ទុកមិត្តភាពប្រទេសទាំងពីរជាគ្រួសារតែមួយ ប្រមុខការទូតចិន បានបន្ថែមថា​ ភាគីទាំងពីរ បានឯកភាពកំណត់ការកសាងសហគមន៍ថៃ-ចិន ដែលមានអនាគតរួមគ្នា និងរៀបចំជាមុនសម្រាប់អនាគតប្រកបដោយវិបុលភាព ស្ថិរភាព និងចីរភាព។

 

សូមបញ្ជាក់ថា ចិន ឈរនៅលំដាប់ទីពីរ បន្ទាប់ពីជប៉ុននៅក្នុងលំហូរវិនិយោគដោយផ្ទាល់ពីបរទេស ក្នុងឆ្នាំ២០២១។ ចិនមានទំហំវិនិយោគប្រមាណ ១ពាន់លានដុល្លារ សម្រាប់ ១១២គម្រោង ខណៈជប៉ុន បានវិនិយោគនៅថៃប្រមាណ ២,២ពាន់លានដុល្លារ លើ ១៧៨គម្រោង។ សិង្ហបុរីឈរនៅលេខរៀងទី៣ ដោយមានទំហំប្រមាណ ៨២៣លានដុល្លារ លើ៩៦គម្រោង៕