កីឡាអន្តរជាតិ
អន្តរជាតិ
Nadal បោះបង់ការប្រកួតវគ្គពាក់កណ្តាលផ្តាច់ព្រ័ត្រ Wimbledon ដោយសាររបួស
× ដោយសារបញ្ហារបួស Rafa Nadal នៅថ្ងៃទី៧ ខែកក្កដា សម្រេចចិត្តដកខ្លួនចេញពីការប្រកួតវគ្គពាក់កណ្តាលផ្តាច់ព្រ័ត្រ Wimbledon ទល់នឹងកីឡាករអូស្ត្រាលី Nick Kyrgios។ Kyrgios ត្រូវឡើងទៅវគ្គផ្តាច់ព្រ័ត្រពានរង្វាន់កម្រិត Grand Slam នៅប្រទេសអង់គ្លេសនេះដោយស្វ័យប្រវត្តិ។
«ខ្ញុំត្រូវតែដកខ្លួនចេញពីការប្រកួតវគ្គ១/២ផ្តាច់ព្រ័ត្រ ដោយសារខ្ញុំឈឺចុកចាប់ក្នុងពោះ»។ នេះជាការអះអាងរបស់ Nadal កីឡាករវាយកូនបាល់ដ៏ល្បីល្បាញ ដែលគ្រងជើងឯក Grand Slam ច្រើនជាងគេ ២២លើក។ នេះបើតាមការផ្សាយរបស់ទីភ្នាក់ងារព័ត៌មាន Reuters។
កីឡាករអេស្ប៉ាញ វ័យ៣៦ឆ្នាំ បន្ថែមថារូបគេមិននឹកស្មានថាខ្លួនអាចឈ្នះពីរប្រកួតទាំងមានបញ្ហារបួសនេះផង។ «សម្រាប់ខ្ញុំ អ្វីដែលសំខាន់បំផុតគឺសុភមង្គល ជាជាងការឈ្នះពាន ទោះបីគ្រប់គ្នាដឹងថាខ្ញុំខំប្រឹងប៉ុណ្ណាក៏ដោយ ព្រោះខ្ញុំមិនអាចប្រថុយជីវិតនឹងការលេងកីឡាបានឡើយ។ ខ្ញុំសោកស្តាយខ្លាំងណាស់ ហើយខ្ញុំត្រូវការពេលពីរទៅបីខែដើម្បីព្យាបាលជំងឺនះ»។
មុនចូលរួមប្រកួត Wimbledon ឆ្នាំ ២០២២ Nadal បានឈ្នះក្នុងព្រឹត្តិការណ៍ Australian Openនិង French Open ក្នុងឆ្នាំនេះរួចហើយ និងឈ្នះទាំងមានរបួសផងដែត។
ការដកខ្លួនរបស់ Nadal មានន័យថា Kyrgios ក្លាយជាជនជាតិអូស្ត្រាលីដំបូងគេ ដែលឈានដល់វគ្គផ្ដាច់ព្រ័ត្រកីឡាវាយកូនបាល់ផ្នែកបុរស នៅគ្រប់ការប្រកួតនៅអង់គ្លេស ចាប់តាំងពី កីឡាករ Mark Philippoussis ធ្វើបានលើកដំបូងក្នុងឆ្នាំ ២០០៣។
ម្ចាស់ការពារតំណែងជើងឯក Novak Djokovic និងកីឡាករអង់គ្លេស Cameron Norrie ត្រូវប៉ះគ្នានៅវគ្គពាក់កណ្តាលផ្តាច់ព្រ័ត្រ ដើម្បីប្រជែងគ្នាទៅជួប Kyrgios នៅវគ្គផ្តាច់ព្រ័ត្រ៕
Tag:
Wimbledon
Rafa Nadal
© រក្សាសិទ្ធិដោយ thmeythmey.com