បាត់ដំបង៖ អង្គការហ្វារពន្លឺសិល្បៈ ស្ថិតក្នុងក្រុងបាត់ដំបង ខេត្តបាត់ដំបង ជាថ្នាល់បណ្ដុះសិល្បករ ទាំងយុវជន និងកុមារ លើជំនាញសិល្បគំនូរ និងសៀកជាដើម។ នៅទីនេះ អង្គការបានផ្ដល់ឱកាសឱ្យកុមារា និងកុមារីមួយចំនួនហ្វឹកហាត់សៀក។

ដើម្បីជ្រាបច្បាស់សូម អញ្ជើញ លោក-អ្នក ទស្សនាវីដេអូខាងក្រោមដូចតទៅ៖

 

 

អង្គការហ្វារពន្លឺសិល្បៈ ជាអង្គការក្រៅរដ្ឋាភិបាលមួយ ត្រូវបានបង្កើតឡើងនៅឆ្នាំ១៩៩៤ ដោយស្ថាបនិក៩រូប ដែលធ្លាប់រស់នៅក្នុងជំរំ សាយធូ (Site Two)។ អង្គការហ្វារពន្លឺសិល្បៈដែលមានមូលដ្ឋាននៅក្រុងបាត់ដំបង បានផ្ដល់ឱកាស និងបណ្ដុះបណ្ដាលកុមារ និងយុវជន ផ្នែកសិល្បៈ និងចំណេះដឹងទូទៅ។

 

នៅទីនេះសិស្សអាចរៀនជំនាញសិល្បៈជាច្រើនដូចជា  សៀក តន្ត្រី របាំ គូរគំនូរ គំនូរជីវចល សូនរូប  និងសិល្បៈផ្នែកកាយសម្ព័ន្ធដទៃទៀត។ ក្នុងបរិវេណអង្គការហ្វារពន្លឺសិល្បៈ មានអគារមួយ ដែលមានដំបូលបែបរចនាបថខ្មែរ ដោយសង់ទាបជាប់នឹងដី ព្រមទាំងមានគំនូរនាដកាត្រឹមក នោះគឺជាសាលាសៀក។

 

នៅវេលាម៉ោងប្រមាណជា១១ព្រឹក នៅក្រោមអគារសាលាសៀកនេះ មានបន្លឺសំឡេងភ្លេង ដែលត្រូវបានប្រគំដោយអ្នករៀនសៀកមួយក្រុម។ មានយុវជន និងកុមារប្រមាណជាង២០នាក់ កំពុងហ្វឹកហ្វឺនសៀក។  ហង្សសុផល លីនទ្រី ជាកុមារមួយរូប ក្នុងចំណោមកុមារប្រុសស្រីជាច្រើនរូបផ្សេងទៀត កំពុងហាត់សៀក។ លីនទ្រី បានមកហ្វឹកហាត់សៀកនៅទីនេះជាង៣ខែ ក្រោយប្ដូរទីលំនៅពីខេត្តបន្ទាយមានជ័យ។ និយាយសម្ដីលះៗច្បាស់ៗ លីនទ្រី ប្រាប់អ្នកសារព័ត៌មានថ្មីៗ ពីមូលហេតុខ្លួនមករៀនសៀកដូច្នេះ៖ «ពីព្រោះខ្ញុំចូលចិត្តតាំងពីយូរហើយ តែកាលមុនខ្ញុំចង់រៀនដែរ តែមិនដឹងរៀននៅណា។ និយាយទៅវាជាចំណូលចិត្តខ្ញុំតែម្ដង។ ហើយមួយឆ្នាំៗ មានកម្មវិធីច្រើន មានអាហារសម្រន់ និងប្រាក់ឧបត្ថម្ភផ្សេងៗ»។

កុមារា ហង្សសុផល លីនទ្រី។
 

មានអាយុ១៣ឆ្នាំ និងកំពុងសិក្សានៅថ្នាក់ទី៦ កុមារា លីនទ្រី តែងចំណាយពេល៤ម៉ោង ក្នុងមួយថ្ងៃ ក្នុងការហ្វឹកហាត់ បន្ទាប់ពីបញ្ចប់ម៉ោងសិក្សានៅសាលារៀន។ កុមារារូបនេះ ពេញចិត្ត ជាមួយការហ្វឹកហាត់របស់គេណាស់ និងមិនដែលចង់បោះបង់ចោលឡើយ បើទោះបីការហ្វឹកហាត់ ត្រូវជួបគ្រោះថ្នាក់ក៏ដោយ។

 

លីនទ្រីបន្តទៀតថា ការមកហ្វឹកហាត់នេះ ដំបូងឪពុកម្ដាយខ្លួន មានការស្ទាក់ស្ទើរ ដោយមានការព្រួយបារម្ភ ពីសុវត្ថិភាពខ្លួន ប៉ុន្តែដោយចិត្តស្រឡាញ់ និងយល់ឃើញថាការសម្ដែងសៀក អាចជួយផ្គត់ផ្គង់ការរស់នៅរបស់ខ្លួននាពេលអនាគត។

 

លីនទ្រី សុំការអនុញ្ញាតពីអាណាព្យាបាលខ្លួន រហូតពួកគាត់យល់ព្រម។  លីនទ្រី រៀបរាប់ដូច្នេះ៖ «(រៀនសៀក)មានប្រយោជន៍ មានអី សម្រាប់ថ្ងៃខាងមុខ អាចរៀនចប់មកសម្ដែង។ យើងកុំទុកវេលាចោល យើងរៀន ឱ្យមានចំណេះដឹង ពេលមានការសម្ដែងអ៊ីចឹង យកមកសម្ដែង យកថវិកា»។

 

សំ ណារ៉ុង ជាកុមារាមួយរូបទៀត ដែលកំពុងហ្វឹកហាត់សៀក ក្នុងអង្គការហ្វារពន្លឺសិល្បៈ។ ប្រមាណពីរឆ្នាំហើយ ដែលកុមារា ណារ៉ុង បានហាត់រៀនសៀក បន្ទាប់ពីការសិក្សាចំណេះដឹងទូទៅនៅសាលារៀន។ ជាសិស្សកំពុងសិក្សាថ្នាក់ទី៦ ណារ៉ុង ប្រាប់ថា មូលហេតុដែលខ្លួនមករៀនសៀក ដោយសារខ្លួនចូលចិត្តផ្នែកសៀកនេះ។