កាលពីរសៀលថ្ងៃទី៨ ខែកក្កដា សហព័ន្ធកីឡាបាល់ទាត់អាស៊ាន (Asean Football Federation ឬហៅកាត់ AFF) ចេញលិខិតឆ្លើយតបទាំងសោកស្ដាយ ដល់សហព័ន្ធកីឡាបាល់ទាត់កម្ពុជា (Football Federation of Cambodia ឬហៅកាត់ FFC) ដោយសារកំហុសអាជ្ញាកណ្ដាល ក្នុងការមិនទទួលស្គាល់គ្រាប់បាល់របស់កម្ពុជា នៅនាទី៧៦ ក្នុងការប្រកួតជាមួយជម្រើសជាតិឡាវ កាលពីថ្ងៃទី៧ ខែកក្កដា នៃពានរង្វាន់ AFF U-19 Championship ក្នុងកីឡដ្ឋាន Madya Senayan នៅប្រទេសឥណ្ឌូណេស៊ី។

 

នៅនាទី៧៦ កីឡាករ ហាវ សុខនេត្រ បានស៊ុតបញ្ចូលទី ឡាវ តែគ្រាប់បាល់នោះមិនត្រូវបានទទួលស្គាល់ទេ ដោយត្រូវរបាទី រួចធ្លាក់មកក្រោម ដោយសម្លឹងមើលពីចម្ងាយមិនអាចដឹងថាចូលទីនោះទេ។ ក្រោយពេលមើលVDO សារឡើងវិញទើបឃើញថាគ្រាប់បាល់នោះចូលទៅក្នុងទីហើយ ដោយផុតខ្សែគំនូសឈរខាងក្នុងរបស់អ្នកចាំទី តែបន្ដិច។
 

យោងតាមច្បាប់ទី៥ (អាជ្ញាកណ្តាល) ចំណុចទី២ (ការសម្រេចចិត្តរបស់អាជ្ញាកណ្តាល) នៅក្នុងច្បាប់នៃការប្រកួតកីឡាបាល់ទាត់ (Laws of the Game) ការសម្រេចចិត្តរបស់អាជ្ញាកណ្ដាលគឺជាការសម្រេចចុងក្រោយដោយមិនអាចផ្លាស់ប្តូរបន្ទាប់ពីចប់ការប្រកួតបានទេ។

 

ក្រោយបញ្ចប់ការប្រកួត FFC បានរៀបចំលិខិតតវ៉ាចំពោះការកាត់សេចក្ដីរបស់អាជ្ញាកណ្ដាល លោក Aprisman Aranda។ បន្ទាប់ពីទទួលបានបណ្ដឹងតវ៉ា AFF បានចេញលិខិតឆ្លើយតបទាំងមានការសោកស្ដាយ ចំពោះកំហុសបច្ចេកទេសនេះ។ មន្ដ្រីសហព័ន្ធបាល់ទាត់កម្ពុជាមួយរូប មិនបញ្ចេញឈ្មោះបានប្រាប់ថា៖« នឹងមានការពិន័យដល់អាជ្ញាកណ្ដាលរូបនោះ ចំពោះកំហុសនេះ ប៉ុន្ដែចំពោះការអនុវត្ដបែបណានោះ យើងមិនអាចដឹងបានទេ ព្រោះជាបញ្ហាផ្ទៃក្នុងរបស់ស្ថាប័ន។»។
 

កាលប្រកួតនៅថ្ងៃទី៧ ខែកក្កដា កម្ពុជា ចាញ់ឡាវ ២-១។ ឡាវ មាន៦ពិន្ទុ ឈរលេខ១ បណ្ដោះអាសន្ននៅក្នុងពូល B ខណៈកម្ពុជា ក្រោយចាញ់ឡាវ ឈរលេខ៣ និងប្រឈមមុខក្នុងការធ្លាក់ចេញត្រឹមវគ្គចែកពូលនេះ។ ប្រសិន គ្រាប់បាល់នៅនាទី៧៦ បានរាប់បញ្ចូល កម្ពុជា អាចតាមស្មើ ឡាវ នឹងអាចឈលេខ២ នៅក្នុងពូល។ ការប្រកួតចុងក្រោយ របស់ U-19 កម្ពុជា នៅថ្ងៃទី១១ ខែកក្កដា ជាមួយ ទីម័រខាងកើត៕