ឈើជាង៨០០០ ដើម ត្រូវបានដាំក្នុងព្រៃសង្ឃរុក្ខាវ័ន ដើម្បីស្ដារគម្របព្រៃនៅឧត្តរមានជ័យ

ជាតិ

ឈើជាង៨០០០ ដើម ត្រូវបានដាំក្នុងព្រៃសង្ឃរុក្ខាវ័ន ដើម្បីស្ដារគម្របព្រៃនៅឧត្តរមានជ័យ

23, Jul 2022 , 8:59 pm

រូបភាព

ដោយ:

ឧត្តរមានជ័យ៖ គណៈកម្មការនៃព្រៃសង្ឃសហគមន៍រុក្ខាវ័នបង្ហាញថា បច្ចុប្បន្នផ្ទៃវាល ព្រៃសង្ឃរុក្ខាវ័ន មានជាង៥០ហិកតា ដែលត្រូវការដាំដើមឈើបន្ថែម។ មកដល់ពេលនេះ ឈើ ៨០០០ដើម ត្រូវបាន ដាំនៅព្រៃសង្ឃរុក្ខាវ័ន ដើម្បីស្ដារគម្រកព្រៃឈើ ដែលអាចក្លាយជម្រកមនុស្ស សត្វ និង អុកស៊ីសែនសម្រាប់ភពផែនដីនាអនាគត។

លោក សារ ថ្លៃ ប្រធានបណ្ដាញសហគមន៍ព្រៃឈើខេត្តឧត្តរមានជ័យ បានប្រាប់សារព័ត៌មានThmeyThmey25 ថា ព្រៃសង្ឃសហគមន៍រុក្ខាវ័ន មានព្រៃឈើចម្រុះចំនួន៤ប្រភេទផ្សេងៗគ្នាតាមតំបន់ ដោយព្រៃតំបន់ខ្លះមានភាពសឹករេចរឹលតម្រូវឱ្យដាំដើមឈើបន្ថែម ដើម្បីបំពេញគម្របព្រៃឈើ និងទុកជាជម្រកសត្វ។

លោក សារ ថ្លៃ លើកឡើងដូច្នេះ៖ « ព្រៃសង្ឃរុក្ខាវ័ន មានកន្លែងខ្លះជាទីវាល ខ្លះព្រៃស្រោង ខ្លះព្រៃរបោះ។ ធាតុពិតនៅទីនេះមានទីវាលមិនតិចជាង៥០ហិកតាទៀតទេដែលត្រូវដាំកូនឈើបន្ថែម ឬត្រូវអភិវឌ្ឍអ្វីមួយដើម្បីស្ដារព្រៃ។ លើសពីនេះ ការដាំកូនឈើប្រណីតលាយជាមួយឈើហូបផ្លែជាង៥០០ដើមក្នុងឆ្នាំ២០២២ ជាវិធីសាស្រ្តល្អបំផុត ដែលអាចឱ្យសហគមន៍ទទួលផលបានលឿន ជំរុញដល់ស្ថេរភាពនៃការអភិរក្សព្រៃ និងសត្វនៅទីនេះ»។

រូបពីលើ ផ្ទៃដី៥ហិកតាដែលដាំកូនឈើនៅឆ្នាំ២០២២ ក្នុងព្រៃសង្ឃសហគមន៍រុក្ខាវ័ន

ប្រធានបណ្ដាញសហគមន៍ព្រៃឈើខាងលើបានបញ្ជាក់ថា បច្ចុប្បន្នសហគមន៍កំពុងរៀបចំគម្រោងដើម្បីដំណើរការ ការអភិវឌ្ឍសេវាទេសចរណ៍បែបធម្មជាតិ ដែលអាចជួយរកចំណូលបន្ថែមទៅក្នុងសហគមន៍ និងពលរដ្ឋនៅជុំវិញ។

« សម្រាប់ដំណើរការនៃ គម្រោងអភិវឌ្ឍកន្លែងនេះ ឱ្យក្លាយជាកន្លែងទេសចរណ៍ ប្រហែលជា៣ទៅ៤ឆ្នាំទៀត អាចនឹងដំណើរការហើយ ដោយសារបច្ចុប្បន្ន ក្រុមការងារកំពុងសិក្សាពីភូមិសាស្រ្តតំបន់សក្ដានុពល ដែលអាចច្នៃបន្ថែម ដើម្បីសម្រួលដល់ការកម្សាន្តរបស់ភ្ញៀវនៅពេលមកដល់សហគមន៍»។ នេះជាការលើកឡើងរបស់ លោក សារ ថ្លៃ។

លោក អូត ឡាទីន ជាមន្ត្រីសម្របសម្រួលគម្រោងសមាគមបណ្ដាញយុវជនកម្ពុជាដែលហៅថា (CYN) បានលើកឡើងថា សមាគមន៍បណ្ដាញយុវជនកម្ពុជាបានកំពុងជំរុញលើកទឹកចិត្តដល់យុវជនចូលរួមការពារនិងថែរក្សាធនធានធម្មជាតិនៅក្នុងប្រទេសកម្ពុជា។ លោកបង្ហាញថាសកម្មភាពនៃការចូលរួមដោយផ្ទាល់របស់យុវជន នៅក្នុងព្រៃសង្ឃសហគមន៍រុក្ខាវ័នជាការបណ្ដុះស្មារតីនៃការគិត និងស្វែងយល់ពីផលប្រយោជន៍បានមកពីធនធានធម្មជាតិបញ្ហាកំពុងប្រឈម ចន្លោះដែលត្រូវបំពេញបន្ថែមនៅពេលបន្ទាប់តាមរយៈការមើលឃើញដោយផ្ទាល់ភ្នែក។

លោក សារ ថ្លៃ ប្រធានបណ្ដាញសហគមន៍ព្រៃឈើខេត្តឧត្តរមានជ័យ

« យើងឃើញថាយុវជនជាអ្នកបន្តវេនដ៏សំខាន់ ដូច្នេះពួកយើងត្រូវជំរុញ ឱ្យគាត់ចូលរួមសកម្មនៅក្នុងដំណើរការនៃការការពារធនធានធម្មជាតិ ដើម្បីឱ្យគាត់មានឱកាសបានសិក្សាស្វែងយល់ និងចូលទាំង គំនិត កំលាំង ចំណេះដើម្បីអាចដោះស្រាយ បញ្ហាទាក់ទងនឹងធនធានធម្មជាតិ។ ពេលខ្លះពួកគាត់ អាចចុះទៅល្បាតជាមួយសហគមន៍ និងអាចចែករំលែកគ្នាទៅវិញទៅមក»។ នេះជាការលើកឡើងរបស់ ឡាទីន។

លោក សុន ប៊ុយជាយុវជនម្នាក់ចូលរួមក្នុងកម្មវីធីដាំកូនឈើនៅព្រៃសង្ឃសហគមន៍រុក្ខាវ័នបានបង្ហាញភាពរីករាយនៅពេលបានក្លាយជាផ្នែកមួយជួយស្ដារជម្របព្រៃក្នុងទឹកដីខេត្តឧត្តរមានជ័យ។ជាមួយគ្នានេះ យុវជនខាងលើបានបង្ហាញថា សកម្មភាពនៃការចូលរួមរបស់យុវជននៅក្នុងព្រៃសង្ឃសហគមន៍ជាសកម្មភាពមួយក្នុងការចូលរួមបង្កើនធនធាននៅក្នុងប្រទេសកម្ពុជា កាន់តែសម្បូរបែប។

អូត ឡាទីន ជាមន្ត្រីសម្របសម្រួលគម្រោងសមាគមបណ្ដាញយុវជនកម្ពុជា ( CYN)

លោក សុន ប៊ុយ រៀបរាប់ថា៖ « នេះជាលើកទី១ដែលខ្ញុំបានមកដាំកូនឈើនៅក្នុងព្រៃសង្ឃរុក្ខាវ័ន។ ជាមួយគ្នានេះខ្ញុំគិតថាយុវជនទាំងអស់គួរចូលរួមសកម្មភាពផ្សេងក្នុងកិច្ចការពារព្រៃ ការដាំកូនឈើការផ្សព្វផ្សាយពីធនធានធម្មជាតិនៅក្នុងប្រទេសកម្ពុជា ដើម្បីជាប្រយោជន៍រួម»។

ព្រៃសង្ឃសហគមន៍រុក្ខាវ័នមានផ្ទៃដី ៣០២៥៤ហិកតាស្ថិតនៅស្រុកអន្លង់វែង ស្រុកចុងកាល់ ក្រុងសំរោង ខេត្តឧត្ដរមានជ័យ។ព្រៃសហគមន៍សង្ឃរុក្ខវ័ន្តបានក្លាយជាតំបន់ការពារដែនជម្រកសត្វព្រៃសង្ឃរុក្ខាវ័ននៅឆ្នាំ២០១៨ ការណ៍នេះក៏ដោយសារមានការតស៊ូការពារតាំងពីឆ្នាំ២០០១ របស់អតីតព្រះសង្ឃលោក ប៊ុន សាលួត និងសមាជិកសហគមន៍ផ្សេងៗទៀតដែលស្រឡាញ់ព្រៃ និងធនធានធម្មជាតិ ។ព្រៃឈើក្នុងសហគមន៍នេះ អាចជាព្រៃចុងក្រោយនៅក្នុងខេត្តឧត្តរមានជ័យ ដែលនៅសេសសល់ព្រៃឈើ និងសត្វព្រៃប្រភេទកម្រ ដូចជាខ្ទីង ទន្សោង និងប្រភេទផ្សេងជាច្រើនទៀត៕