រមណីយដ្ឋានទេសចរណ៍ទូទាំងប្រទេសបានបើកទទួលភ្ញៀវឡើងវិញ នៅឆ្នាំ២០២២នេះ ខណៈនិន្នាការដើរកម្សាន្តនៅតំបន់ទេសចរណ៍ផ្សងព្រេង នៅតែមានសន្ទុះខ្លាំង។ ជារៀងរាល់ចុងសប្តាហ៍ទេសចរ ដែលភាគច្រើនជាយុវវ័យ បានធ្វើដំណើរជាក្រុមៗ ទៅបោះតង់នៅខ្នងផ្សា។
 

បើតាមរបាយការណ៍ពីមន្ទីរទេសចរណ៍ខេត្តកំពង់ស្ពឺ ៦ខែ ឆ្នាំ២០២២នេះ ទេសចរទៅខ្នងផ្សា កើនឡើងជាង២ពាន់នាក់បើធៀបនឹងរយៈពេលដូចគ្នានៃឆ្នាំ ២០២១។ ក្នុងរបាយការណ៍លម្អិតថា ទេសចរទៅខ្នងផ្សា នាឆមាសទី១ ឆ្នាំ២០២២នេះ មាន៨ ០២៥នាក់​ ក្នុងនោះទេសចរបរទេស ចំនួន១០៥នាក់។ 
 

កំណើនទេសចរទៅខ្នងផ្សា កើនឡើងនៅឆមាសទី១នេះ  ដោយសារចង់បញ្ចេញអារម្មណ៍តប់ប្រមល់ និងស្រូបយកអាកាសធាត់ធម្មជាតិ ក្រោយខកខានដើរកម្សាន្ត២ឆ្នាំ ព្រោះតែការរីករាលដាលជំងឺកូវីដ-១៩ ។ យ៉ាងណាមិញភ្ញៀវទេសចរទៅខ្នងផ្សាក្នុងខែមិថុនា កន្លងមក ហាក់ថមថយបន្តិចព្រោះបញ្ហាអាកាសធាតុ។
 

សូមជម្រាបដែរថា រយៈពេល៦ខែឆ្នាំ២០២២នេះ ខេត្តកំពង់ស្ពឺទទួលបានទេសចរ ២៩៤ ៨៤៨នាក់ ក្នុងនោះទេសចរអន្តរជាតិ ១០៩ ៩៧៨នាក់។ ចំណែកតំបន់ទេសចរណ៍ផ្សងព្រេងភ្នំឱរ៉ាល់ ទទួលបានទេសចរ៣៥៥នាក់ ក្នុងនោះទេសចរអន្តរជាតិ ៧៥នាក់ នា៦ខែនេះ៕