ផ្ទុះខ្លាំង! មិនមែនជាការសម្ពោធភាពយន្តថ្មី ការចេញអាល់ប៊ុមចម្រៀងថ្មី ឬការបង្ហាញនូវសិល្បៈវប្បធម៌ណាមួយនោះឡើយ តែជារឿងហែកហួរគ្នាក្នុងគ្រួសារ ការលក់ផលិតផលក្លែមដោយរូបភាពស៊ិចស៊ី ហើយនិន្នាការដ៏គួរឲ្យកត់សម្គាល់មួយទៀតនោះ គឺការផលិតវីដេអូពីសកម្មភាពប្លែកៗ និងវីដេអូបោកបញ្ឆោត (Video Prank) ផ្សេងៗ ។ វីដេអូទាំងនោះ ជាទូទៅទទួលបាននូវការចូលទស្សនា (Views), ការចែករំលែក (Shares) និងការចុចសញ្ញាប្រតិកម្ម (Likes) ក្នុងចំនួនដ៏ច្រើន។ មិនជាបញ្ហាឡើយសម្រាប់វីដេអូដែលបម្រើឲ្យអារម្មណ៍សប្បាយរីករាយ ឬបង្កប់ន័យអប់រំ ប៉ុន្តែអ្នកបង្កើតមាតិកាមួយចំនួនបែរជាបង្ហាញការលេងសើចខុសរបៀប គ្មានសីលធម៌ ដោយមិនគិតពីផលប៉ះពាល់ដល់សង្គម។
កាត់ខ្សែអង្រឹង, បោកទូរសព្ទអ្នកដទៃតាមទីសាធារណៈ, ស៊ីស្បែកជើង, ស៊ីអាចម៌គោ, ខាំគ្រាប់បែក, បរិភោគសត្វល្អិត ឬអសិរពិស ជាដើម សុទ្ធតែស្ថិតក្នុងចំណោមវីដេអូដែលគេនិយមហៅថាផ្ទុះខ្លាំងនៅលើបណ្តាញសង្គម ជាពិសេសហ្វេសប៊ុក និង TikTok ដោយយោងតាមចំនួន Views, Likes, Shares។ គេមិនអាចដឹងពីចេតនាពិតប្រាកដរបស់អ្នកបង្កើតមាតិកា ដោយអ្នកខ្លះពិតជាធ្វើក្នុងបំណងបម្រើភាពសប្បាយរីករាយ តែអ្នកខ្លះទៀតមិនខ្វល់ខ្វាយនោះឡើយ ដោយគិតតែពីប្រជាប្រិយភាព និងការរកលុយតាមរយៈវីដេអូរបស់ខ្លួន។
Views, Likes, Shares គឺជាអ្វីៗទាំងអស់
វីដេអូស្តីពីសកម្មកាត់ខ្សែអង្រឹង ខណៈមនុស្សស្រីម្នាក់កំពុងគេងលក់ ទាក់ទាញការចូលទស្សនាជិតពីរលាន និងចែករំលែកតៗគ្នារាប់ពានដង តែក្នុងរង្វង់ប៉ុន្មានខែប៉ុណ្ណោះក្រោយការបង្ហោះនៅលើទំព័រហ្វេសប៊ុកមួយ។ ទោះបីវីដេអូនេះ កើតកើតចេញពីការសំដែងរបស់ភាគីទាំងសងខាងក៏ដោយ ប៉ុន្តែវាបានបង្ហាញពីការលេងសើចជ្រុលខុសទំនង ដោយគ្មានន័យអប់រំអ្វីទាល់តែសោះ។
«Video Prank ហាក់ដូចជាសុសសាយក្នុងសង្គម តែវីដេអូទាំងនោះហាក់បានបង្រៀនមនុស្សក្នុងសង្គម ឲ្យគ្មានសីលធម៌ និងសុជីវធម៌ ក្នុងការរស់នៅប្រចាំថ្ងៃ។ ឥទ្ធិពល Like, Share បានធ្វើឱ្យយុវជនមួយចំនួនធំ ក្លាយទៅជាឃាតកសីលធម៌ និងសុជីវធម៌របស់សង្គមទៅហើយ។ វីដេអូខ្លះ បានជះឥទ្ធិពលដល់ពួកក្មេងៗនៅជនបទ ដែលពួកគេស្ថិតនៅក្នុងវ័យចង់ដឹង ចង់ឮ និងចង់ឃើញ»។ នេះជាការបញ្ចេញមតិយោបល់របស់ម្ចាស់គណនីមួយឈ្មោះ Chanthouen ដែលបានចែករំលែកវីដេអូកាត់អង្រឹង។
ងាកមកវីដេអូបញ្ឆោតមួយទៀត គឺជាការបោកទូរសព្ទអ្នកដទៃតាមទីសាធារណៈ ដែលជាស្នាដែរបស់ម្ចាស់មាតិកា (Vlogger) ម្នាក់ឈ្មោះ ធារ៉ា។ វីដេអូនេះ មានការចូលទស្សនាខ្ទង់លានដង និងចែករំលែករាប់ម៉ឺនដងផងដែរ។ ក្នុងចំណោមការបញ្ចេញមតិយោបល់ជាង៥០០០ គណនីឈ្មោះ Lee Hong បានសរសេរថា៖ «ថ្វីដ្បិតថា វាជាការ prank របស់អ្នកប៉ុន្តែអ្នកត្រូវចាំថា របស់គេវាមានតម្លៃជាងអា11pro របស់អ្នក។ ពេលខ្លះវាជាកាដូរបស់ម៉ាក់ប៉ាទិញឱ្យ ហើយត្រូវអ្នកយកមកបោកចោល»។
មិនត្រឹមតែវីដេអូ Prank នោះ ប៉ុន្តែក៏មានវីដេអូមួយចំនួនទៀតដែរ ដូចជា ស៊ីអាចម៌គោ ស៊ីស្បែកជើង និងស៊ីសំបកទុរេនជាមួយអំបិលម្ទេស ក៏ជាការខាំទំពាសត្វល្អិត សត្វអសិរពិស ដែលសុទ្ធសឹងតែជាវីដេអូ បង្ហាញទង្វើគ្មានសីលធម៌ ហើយបង្អួតក្នុងបណ្ដាញសង្គមផងដែរ។ វីដេអូទាំងអស់នេះ ផ្ទុះការចាប់អារម្មណ៍ខ្លាំង ក្រោយការបង្ហោះភ្លាមៗ។
លោកស្រី ហ៊ុន ស៊ីណាត ប្អូនស្រីសម្តេចនាយករដ្ឋមន្ត្រី ហ៊ុន សែន ក៏តែងតែរិះគន់ផងដែរ ចំពោះការបង្ហោះវីដេអូមួយចំនួន ដើម្បីយក Views, Likes, Shares។ ទាក់ទងនឹងវីដេអូនារីម្នាក់ខាំស្បែកជើងជ្រលក់អំបិលម្ទេស លោកស្រី ស៊ីណាត ចាត់ទុកថា ជាទង្វើអសីលធម៌ក្នុងសង្គម ដែលជះផលអាក្រក់ដល់តម្លៃជាតិ។
«សូមកុំខ្វល់តែចំនួន Views និង Likes ហើយបង្អាប់ជាតិសាសន៍ខ្លួនដូច្នេះ។ ខ្ញុំឃើញថៃចុះព័ត៌មាន ហើយយើងនេះរហូតដល់ប្រទេសកម្ពុជាមួយទាំងមូល មិនដែលអត់ស៊ីរហូតដល់ស៊ីស្បែកជើង»។ នេះជាការសម្តែងការហួសចិត្ត របស់លោកស្រី ស៊ីណាត ដោយស្នើដល់ស្ថាប័នពាក់ព័ន្ធ ចាត់វិធានការតាមផ្លូវច្បាប់។
អាងអីសុំទោស
កន្លងមក ម្ចាស់វីដេអូមិនតិចនោះឡើយ ដែលរងការព្រមានពីអាជ្ញាធរ។ ជាក់ស្តែង កាលពីដើមខែមេសា កន្លងមក ស្នងការដ្ឋាននគរបាលខេត្តកណ្តាល បានហៅបុរសម្នាក់ រហស្សនាម «គ្រូតឿ» ទៅអប់រំ និងធ្វើកិច្ចសន្យា បញ្ឈប់រាល់សកម្មភាពទាំងឡាយណា ដែលអសីលធម៌នៅលើបណ្ដាញសង្គម។
ការព្រមាននេះ បានកើតឡើង បន្ទាប់ពីគ្រូតឿ បានថតវីដេអូបង្ហោះតាមបណ្ដាញសង្គម ដោយមានសកម្មភាពស៊ីអាចម៌គោ និងទង្វើប្លែកៗ ដែលអសីលធម៌ជាច្រើន។ លោក ឈឿន សុចិត្ត ស្នងការនគរបាលខេត្តកណ្ដាល បានបញ្ជាក់ថា ៖«បើមនុស្សមិនមែនចេះស៊ីអាចម៌គោនោះទេ។ បើមនុស្សចេះស៊ីអាចម៌គោ ចប់ហើយ។ គាត់ចង់បាន Like ចង់បាន share ចង់ល្បី តែគាត់មិនគិតថា វាប៉ះពាល់ដល់សណ្ដាប់ធ្នាប់សាធាណៈ។ អ៊ីចឹងយើងហៅគាត់មកនេះ គ្រាន់តែណែនាំឱ្យគាត់ ធ្វើអីឱ្យមានសេចក្ដីថ្លៃថ្នូរជាមនុស្ស»។
មានករណីច្រើនទៀតដែលបានកើតឡើង ហើយម្ចាស់មាតិកា គ្រាន់តែចេញមុខផ្សាយផ្ទាល់ ឬថតវីដេអូថ្មី ដើម្បីបង្ហាញការសោកស្តាយ និងសុំទោសទាក់ទងនឹងវីដេអូអសីលធម៌របស់ខ្លួន។ អ្នកខ្លះបានលុបវីដេអូដើមចេញ អ្នកខ្លះបន្តរក្សាទុក។ ប៉ុន្តែទោះបីជាមានការលុបចេញយ៉ាងណាក៏ដោយ ក៏វីដេអូទាំងនោះ ត្រូវទាញយក (Download) ហើយបង្ហោះបន្តដោយបុគ្គលដទៃ។
ឥទ្ធិពលដល់ក្មេងៗ ដែលអាចត្រាប់តាមទង្វើអាក្រក់
ត្រីមួយត្រក ស្អុយមួយស្អុយទាំងអស់? ពេលខ្លះ មិនអាចជៀសផុតនោះឡើយសម្រាប់អ្នកដែលប្រកបរបរ អាជីព ឬធ្វើសកម្មភាពដូចគ្នា ក្នុងករណីមានក្រុមណាមួយប្រព្រឹត្តអំពើមិនប្រក្រតី ដោយតែងតែមានការវាយតម្លៃជារួមថា អ្នកបង្កើតមាតិកា ឬអ្នកធ្វើវីដេអូ Prank សុទ្ធតែបំពុលសង្គម។ ទោះបីជាយ៉ាងណាក៏ដោយ អ្វីៗមិនដូចគ្នានោះឡើយ ព្រោះយើងក៏សង្កេតឃើញមានការផលិតវីដេអូបែបអប់រំ ការសម្តែងរឿងខ្លី ដំណើរកម្សាន្ត ការធ្វើម្ហូប, ការញ៉ាំអាហារ និងសកម្មភាពសប្បុរសធម៌ ជាច្រើនផងដែរ ហើយវីដេអូទាំងនោះ សុទ្ធតែទទួលបាននូវការគាំទ្រ និងសរសើរលើកទឹកចិត្ត។
ជាអ្នកជំនាញក្នុងវិស័យបច្ចេកវិទ្យា លោក ជី សុផាត ក៏ជាអ្នកបង្កើតមាតិកាម្នាក់នៅលើបណ្តាញសង្គមផងដែរ។ លោកទទួលស្គាល់ថា ការផលិតវីដេអូប្លែកៗ វីដេអូបែបបញ្ឆោត ពិតជាទាក់ទាញការចូលទស្សនា ប៉ុន្តែវាបង្កផលប៉ះពាល់ផ្នែកសីលធម៌ ជាពិសេសដល់ក្មេងៗ។
«កាត់ខ្សែទូរសព្ទ បោកទូរសព្ទ សុទ្ធតែជាទង្វើអសីលធម៌ ដែលយុវជនមិនគួរជ្រើសរើសយកទៅលេងសើចនោះឡើយ។ ខ្ញុំដឹងថាហ្នឹងជាការ Prank ប៉ុន្តែពេលខ្លះ ទូរសព្ទ ឬឧបករណ៍ប្រើប្រាស់ណាចាស់ៗក៏ដោយ វាមិនត្រឹមតែប៉ះពាល់ដល់រូបភាពនោះទេ តែវាអាចនឹងប៉ះពាល់ដល់ឯកសារបុគ្គលក្នុងទូរសព្ទ»។ នេះជាការគូសបញ្ជាក់របស់លោក សុផាត។ លោក បន្តថា បើប្រភេទវីដេអូបែបនោះ ទទួលបានការចាប់អារម្មណ៍ច្រើនពីអ្នកទស្សនា ដូច្នេះវានឹងញាំងឲ្យមានមនុស្សផ្សេងបង្កើតបែបនោះច្រើន ហើយមិនយល់ថាវាខុស ឬប៉ះពាល់នោះទេ។
អ្នកជំនាញបច្ចេកវិទ្យារូបនេះ រៀបរាប់ប្រាប់សារព័ត៌មានថ្មីៗតាមទូរសព្ទ ថា នៅកម្ពុជាមិនទាន់មានការបែងចែកច្បាស់លាស់លើមាតិកា រវាងក្មេង និងមនុស្សចាស់ឡើយ ដូច្នេះរាល់វីដេអូដែលផលិតឡើងសុទ្ធតែមានឥទ្ធិពល បើទោះបីវាជាការសម្តែងក៏ដោយ។
លោក ជី សុផាត អ្នកជំនាញក្នុងវិស័យបច្ចេកវិទ្យា និងជាអ្នកបង្កើតមាតិកាលើបណ្ដាញសង្គម
លោក ជី សុផាត ណែនាំដូច្នេះថា៖«ខ្ញុំក៏អាចនឹងឃើញខ្លឹមសារទាំងអស់ហ្នឹងដែរ។ អ្វីដែលខ្ញុំធ្វើ គឺខ្ញុំ Report Page នោះឱ្យភ្នាក់ងារហ្វេសប៊ុកបានឃើញ។ ខ្ញុំមិនព្យាយាមទៅឆ្លើយឆ្លង ចែករំលែកនោះទេ។ បើរបៀបនៃការចែករំលែករបស់ខ្ញុំ គឺខ្ញុំធ្វើបែបផ្សេង នេះក្នុងនាមខ្ញុំដែលធ្លាប់មើល ឬក៏ប្រតិបត្តិក្នុងការចូលរួមអភិវឌ្ឍខ្លឹមសារ ឬក៏កិច្ចការដែលល្អ។ ព្រោះមុខងារ Report នៅក្នុងហ្វេសប៊ុក ជាកន្លែងជូនដំណឹងទៅម្ចាស់ក្រុមហ៊ុន ឬកម្មវិធីទាំងអស់ហ្នឹងដូចជា Facebook Youtube ឬក៏ Twitter ជាដើម»។
ចំណែកឯ កញ្ញា លាង សុភ័ក្រផល្លគុណ ដែលជាអ្នកប្រើប្រាស់បណ្ដាញសង្គមមួយរូប ក៏មើលឃើញពីកំណើននៃការផលិតវីដេអូក្នុងបណ្ដាញសង្គមនាពេលបច្ចុប្បន្ន មានទាំងហ្វេសប៊ុក TikTok និង Instagram ជាដើម។ និន្នាការផលិតវីដេអូនេះ បានផ្ដល់ភាពងាយស្រួលដល់អ្នកប្រើប្រាស់ ម្ចាស់អាជីវកម្ម និងផ្ដល់ឱកាសដល់យុវជន អ្នកចូលចិត្តការផលិតវីដេអូផងដែរ។
កញ្ញា លាង សុភ័ក្រផល្លគុណ អ្នកប្រើប្រាស់បណ្ដាញសង្គម
ផល្លគុណ ប្រើប្រាស់បណ្ដាញសង្គមច្រើន ព្រោះទាំងការងារ និងការកម្សាន្តគឺនៅលើបណ្ដាញសង្គម ពិសេសហ្វេសប៊ុកនោះឯង។ យុវតីវ័យ២២ឆ្នាំរូបនេះ ធ្លាប់បានមើលវីដេអូច្រើនប្រភេទលើបណ្ដាញសង្គម ហើយក្នុងចំណោមនោះ មានមួយចំនួនចូលចិត្ត និងខ្លះយល់ថា មិនគប្បី និងប៉ះពាល់ផងដែរ។ ផល្លគុណ គិតថា មិនមែនតែគេនោះឡើយ ប៉ុន្តែប្រហែលអ្នកដទៃក៏យល់ដូចគ្នាផងដែរ។
កញ្ញា សុភ័ក្រផល្លគុណ លើកឡើងបែបនេះ៖ «វីដេអូលើហ្វេសប៊ុកហ្នឹងខ្ញុំយល់ថា វាមានឥទ្ធិពល។ បើនិយាយពីផលប្រយោជន៍ វាធ្វើឱ្យមនុស្សមួយចំនួនអាចបង្ហាញទេពកោសល្យ គំនិតថ្មីៗ ទៅមនុស្សផ្សេងៗបាន។ បើនិយាយពីផលប៉ះពាល់ ខ្ញុំសុំលើកឧទាហរណ៍វីដេអូប្រភេទ Prank មួយចំនួន ដែលគាត់ធ្វើដោយមិនគិតពីផលប៉ះពាល់ ឥទ្ធិពល គោលបំណងច្បាស់លាស់ទៅអ្នកមើល វាអាចជះឥទ្ធិពលដល់សង្គម ពិសេសក្មេងៗ ព្រោះយើងដឹងហើយក្មេងៗអាយុចាប់ពី១០ឆ្នាំឡើង កាន់ទូរសព្ទចុចមើលគ្រប់គ្នាហើយ។ អ៊ីចឹង វាមិនមែនជាគំរូល្អទេ ដែលក្មេងៗឃើញវីដេអូទាំងអស់ហ្នឹង ពួកគាត់អាចនឹងយកគំរូតាម កាយវិការមិនសមរម្យណាមួយពីហ្នឹង»៕