អាជ្ញាធរមីន បានប្រកាសភូមិវាល ស្រុកគងពិសី ជាភូមិអស់មីនដំបូងគេក្នុងខេត្តកំពង់ស្ពឺ។ អភិបាលខេត្តកំពង់ស្ពឺ មើលឃើញថាការបោះសម្អាតយុទ្ធភណ្ឌមិនទាន់ផ្ទុះ ក្នុងមូលដ្ឋានខ្លួន បានការពារជីវិតពលរដ្ឋអាចយកដីបម្រើផ្នែកកសិកម្ម និងទេសចរណ៍។
អាជ្ញាធរមីន បានប្រកាសពីភាពជោគជ័យរបស់ខ្លួនក្នុងការបោសសម្អាតមីន ក្នុងភូមិវាល ឃុំស្រង់ ស្រុកគងពិសី ខេត្តកំពង់ស្ពឺនៅថ្ងៃទី២៣ ខែកក្កដា។តាមរយៈសកម្មភាពខាងលើនេះ បានប្រែក្លាយភូមិវាលជាភូមិអស់មីនដំបូងគេក្នុងខេត្តកំពង់ស្ពឺ។ ការបោសសម្អាតមីនក្នុងភូមិវាល ក្រោមជំនួយពីអង្គការខ្មែរថែមអន្តរជាតិ។
ចំណែកអាជ្ញាធរមីនកម្ពុជា បានប្រគល់ភារកិច្ច ទៅមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសំអាតមីន និងកាកសំណល់សង្គ្រាម។ សកម្មភាពខាងលើនេះ អនុវត្តចាប់ពីថ្ងៃទី១៤ដល់ថ្ងៃទី ១៧ ខែមិថុនា ឆ្នាំ២០២២ លើចម្ការមីន២ទីតាំង ទំហំ ៤៩,៨៥ម៉ែត្រការ៉េ។
លោក វ៉ី សំណាង អភិបាលខេត្តកំពង់ស្ពឺ បានលើកឡើងថា សកម្មភាពបោសសម្អាតមីនក្នុងភូមិវាលនេះ កម្លាំងជំនាញបានរកឃើញមីនប្រឆាំងមនុស្សចំនួន ៧គ្រាប់, សំណល់ជាតិផ្ទុះពីសង្គ្រាម៤គ្រាប់ និង អំបែង ចំនួន ២២០បំណែក។
ជុំវិញការបោសសម្អាតមីនក្នុងភូមិវាល ខេត្តកំពង់ស្ពឺនេះ លោក វ៉ី សំណាងប្រាប់ ThmeyThmey25 តាមទូរស័ព្ទថាដូច្នេះ៖ «នៅពេលដែលគេប្រកាសថា(ភូមិវាល)ជាភូមិអស់មីនអាជ្ញាធរសប្បាយចិត្តណាស់ ព្រោះយើងនឹងមានផ្ទៃដីបង្កបង្កើនផលនិងផ្ទៃដីសម្រាប់បងប្អូនយើងគាត់អាចយកធ្វើអ្វីក៏បានដែរ»។
លោកបន្ថែមទៀត លើសពីវិស័យទេសចរណ៍ និងការពារជីវិតមនុស្ស សម្រាប់ខេត្តកំពង់ស្ពឺការសម្អាតមីននេះ នឹងធ្វើឱ្យដីទាំងនោះអាចផ្ដល់ផលប្រយោជន៍ដល់ពលរដ្ឋ ក្នុងការប្រើប្រាស់ជាដីកសិកម្មកសិឧស្សាហកម្ម ជាដើម។
យោងតាមរបាយការណ៍ ពីអភិបាលខេត្តកំពង់ស្ពឺ នៅខេត្តកំពង់ស្ពឺ
មានចម្ការមីន ៤០៦ចម្ការ,ចម្ការគ្រាប់បែក គ្រាប់បែកចង្កោម ៨៥ចម្ការនិងចម្ការសំណល់ជាតិផ្ទុះសង្គ្រាម ៦៥ចម្ការ សរុបផ្ទៃដីជាង ៦៦លាន ម៉ែត្រការ៉េនៅតាមក្រុង-ស្រុក ចំនួន៨។
ចាប់ពីឆ្នាំ១៩៧៩ ដល់ខែកក្កដា ឆ្នាំ២០២២ នៅទូទាំងខេត្តកំពង់ស្ពឺ ចម្ការមីនចម្ការគ្រាប់បែក គ្រាប់បែកចង្កោម និងសំណល់ជាតិផ្ទុះពីសង្គ្រាមមានចំនួន ១៦៨ចម្ការត្រូវបានបោសសម្អាតរួចរាល់ លើផ្ទៃដីសរុបជាង១៣លានម៉ែត្រការ៉េ ឬស្មើនឹង ២០,៤១ភាគរយ។ក្នុងសកម្មភាពបោសសម្អាតនេះ មន្ត្រីជំនាញរកឃើញមីនប្រឆាំងមនុស្សចំនួន ២ ២២៧គ្រាប់មីនតោនចំនួន ១១គ្រាប់ និងសំណល់ជាតិផ្ទុះពីសង្គ្រាម ៣ ២៤៧គ្រាប់។
ជាមួយគ្នានេះ លោក វ៉ី សំណាង ក៏បានអំពាវនាវដល់ពលរដ្ឋត្រូវបង្កើនការប្រុងប្រយ័ត្នខ្ពស់ ចំពោះបញ្ហាយុទ្ធភណ្ឌមិនទាន់ផ្ទុះជាង៨០ភាគរយផ្សេងទៀត ដែលមិនទាន់បោសសម្អាត ក្នុងមូលដ្ឋានខេត្តកំពង់ស្ពឺនេះ៕