ជាតិ
សង្គមជាតិ
រដ្ឋ ចំណាយអស់៧៤៤លានដុល្លារហើយ ផ្តល់ជូនពលរដ្ឋក្រីក្រនិងងាយរងគ្រោះ ក្នុងអំឡុងកូវីដ-១៩
×
ដោយ៖ វ៉ន ស៊ីចេន
ភ្នំពេញ៖ រដ្ឋ បានចំណាយថវិកាអស់៧៤៤,៦០លានដុល្លារហើយ ផ្តល់ឲ្យពលរដ្ឋក្រីក្រ និងពលរដ្ឋងាយរងគ្រោះដោយសារកូវីដ-១៩។ នេះបើតាមសេចក្តីជូនដំណឹងរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា ចេញថ្ងៃទី២៦ កក្កដា ឆ្នាំ២០២២។
យោងតាមលទ្ធផលនៃការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលកូវីដ១៩ដោយគិតចាប់ពីថ្ងៃទី២៥ មិថុនា ឆ្នាំ២០២០ រហូតដល់ថ្ងៃទី២៤ កក្កដា ឆ្នាំ២០២២ រដ្ឋាភិបាលកម្ពុជាបានចំណាយថវិការសរុប៧៤៤,៦០លានដុល្លារ ទៅដល់ប្រជាពលរដ្ឋក្រីក្រ និងងាយរងគ្រោះជិត៧សែននាក់។ ក្រសួងសង្គមកិច្ច អតីតយុទ្ធជន និងយុវនីតិសម្បទា បានអំពាវនាវឲ្យប្រជាពលរដ្ឋទៅបើកប្រាក់ឧបត្ថម្ភរបស់ខ្លួននៅក្នុងខែកក្កដានេះ នៅតាមបញ្ជរវីង ដោយមិនចាំបាច់ទៅសាលាឃុំ-សង្កាត់ជាថ្មីឡើយ ចំពោះគ្រួសារក្រីក្រដែលបានផ្ទៀងផ្ទាត់រួចហើយកាលពីខែមិថុនា។
ចំណែកឯគ្រួសារក្រីក្រ និងងាយរងគ្រោះ ដែលមានប័ណ្ណសមធម៌មានសុពលភាព ហើយមិនទាន់បានទៅផ្ទៀងផ្ទាត់កាលពីខែមិថុនា និងគ្រួសារក្រីក្រដែលទើបទទួលបានប័ណ្ណសមធម៌ថ្មី ចាំបាច់ត្រូវទៅផ្ទៀងផ្ទាត់នៅសាលាឃុំសង្កាត់ មុននឹងទទួលបានការបើកប្រាក់ឧបត្ថម្ភពីរដ្ឋាភិបាលសម្រាប់ខែកក្កដានេះ។ នេះបើតាមក្រសួងសង្គមកិច្ចដដែល។
សូមរម្លឹកថា រដ្ឋាភិបាលកម្ពុជាបានប្រកាសដាក់ឲ្យអនុវត្តកម្មវិធីឧបត្ថម្ភសាច់ប្រាក់ជួយដល់ប្រជាពលរដ្ឋក្រីក្រ និងងាយរងគ្រោះក្នុងអំឡុងពេលនៃជំងឺកូវីដ១៩នេះ កាលពីថ្ងៃទី ២៤ មិថុនា ឆ្នាំ ២០២០។ នៅក្នុងដំណាក់កាលទី១នេះ មានប្រជាពលរដ្ឋប្រមាណជា៥៣ម៉ឺនគ្រួសារ ស្មើនឹងប្រជាពលរដ្ឋជាង២លាននាក់ដែលត្រូវបានចាត់ទុកថា ជាពលរដ្ឋក្រីក្រនិងងាយរងគ្រោះ។
ដោយឡែក នៅក្នុងដំណាក់កាលទី២នេះ រដ្ឋាភិបាលកម្ពុជាតាមរយៈក្រសួងផែនការបានចាត់ទុកគ្រួសារក្រីក្រនិងងាយរងគ្រោះប្រមាណជាង១៩ម៉ឺននាក់ ស្មើនឹងជាង៥ម៉ឺនគ្រួសារបន្ថែមទៀត ដែលនឹងត្រូវទទួលបានប្រាក់ឧបត្ថម្ភពីរដ្ឋាភិបាលកម្ពុជា។ ប៉ុន្តែក្នុងនោះ ក្រសួងផែនការក៏បានរកឃើញពលរដ្ឋជាង៤ពាន់គ្រួសារ បានបន្លំខ្លួនធ្វើជាក្រីក្រ ដើម្បីបានទទួលប្រាក់ឧបត្ថម្ភពីរដ្ឋាភិបាលនេះផងដែរ៕
Tag:
កូវីដ-១៩
ឧបត្ថម្ភដល់ពលរដ្ឋក្រីក្រ
© រក្សាសិទ្ធិដោយ thmeythmey.com