ក្រសួងវប្បធម៌ ពិចារណាកោះហៅអ្នកយកកុមារថតរឿងស្នេហា មានខ្លឹមសារទាក់ទងនឹងផ្លូវភេទទៅអប់រំ

ជាតិ

សិល្បះ

ក្រសួងវប្បធម៌ ពិចារណាកោះហៅអ្នកយកកុមារថតរឿងស្នេហា មានខ្លឹមសារទាក់ទងនឹងផ្លូវភេទទៅអប់រំ

28, Jul 2022 , 9:29 am

រូបភាព

លោក ចំរើន វ៉ាន់ថា ទីប្រឹក្សាអមក្រសួងវប្បធម៌ និងវិចិត្រសិល្បៈ កំពុងពិចារណាហៅក្រុមផលិតរឿងមិនសមរម្យនោះ ទៅអប់រំណែនាំ។

ដោយ: ប៉ូ សាគុន

ភ្នំពេញ៖ មហាជនបានកំពុងរិះគន់វីដេអូខ្លី ដែលយកកុមារទៅថតរឿងស្នេហា និងមានខ្លឹមសារទាក់ទងនឹងផ្លូវភេទ។ លោក ប៉ុក បូរក្ស ប្រធាននាយកដ្ឋានភាពយន្ត ថា រឿងនោះមានខ្លឹមសារប្រាស់ចាកពីការអប់រំពិតមែន។ ឯលោក ចំរើន វ៉ាន់ថា ទីប្រឹក្សាអមក្រសួងវប្បធម៌ និងវិចិត្រសិល្បៈ កំពុងពិចារណាថានឹងហៅក្រុមនោះ ទៅអប់រំណែនាំឬយ៉ាងណា ព្រោះបើពិនិត្យលើអង្គហេតុ ពិបាកដាក់បន្ទុក។

ក្នុងពេលថ្មីៗនេះ សាធារណជន មានការប្រតិកម្មខ្លាំង ចំពោះវីដេអូមួយចំនួន ដែលត្រូវបានផលិតដោយក្រុមមនុស្សមួយក្រុម។ វីដេអូទាំងនោះ បានឱ្យកុមារសម្ដែងរឿងបែបស្នេហា ក៏មានដែរឈុតដែលបង្ហាញខ្លឹមសារពាក់ព័ន្ធនឹងផ្លូវភេទ ដោយខុសនឹងវ័យដែលកុមារគួរសម្ដែង។ មហាជនយល់ថា ការធ្វើបែបនោះនឹងជះឥទ្ធិពលអាក្រក់ដល់សង្គម ពិសេសយុវជននិងកុមារ។

លោក ចំរើន វ៉ាន់ថា ទីប្រឹក្សាអមក្រសួងវប្បធម៌ និងវិចិត្រសិល្បៈ បានប្រាប់សារព័ត៌មានថ្មីៗថា បើមើលទៅចរិតរបស់សាច់រឿង ពិតជាដូចអ្វីដែលសាធារណជនបានរិះគន់មែន។ ប៉ុន្តែបើពិនិត្យទៅលើអង្គហេតុ លោកមើលឃើញថា ពិបាកនឹងដាក់បន្ទុកលើរឿងនោះ។ ពិបាកដាក់បន្ទុក ក៏ព្រោះវីដេអូនោះមិនបានប្រើពាក្យពេចន៍ដែលមានន័យចំ ប៉ុន្តែវាជាន័យធៀប ហើយក៏មិនបានបង្ហាញរូបភាពអាសអាភាសដែរ។

លោក ចំរើន វ៉ាន់ថា ពន្យល់បន្ថែម៖«បើមើលជាចរិត គឺដូចការរឹះគន់មែនហើយ ប៉ុន្តែបើពិនិត្យជារួមលើអង្គហេតុ ពិបាកដាក់បន្ទុក។ គាត់ប្រើពាក្យប្រៀបធៀប ហើយមិនមានរូបភាពអាសអាភាសឡើយ។ ពេលខ្លះគាត់ធ្វើទៅ ដោយការយល់មិន ឬអាចមានបំណងធ្វើបែបនោះតែម្ដង។ ខ្ញុំកំពុងពិចារណាថា គួរហៅគាត់មកអប់រំ ឬយ៉ាងណា? ក្រសួងធ្លាប់ផ្សព្វផ្សាយ និងអប់រំច្រើន ហើយប្រមុខរដ្ឋាភិបាលក៏ធ្លាប់លើកពីបញ្ហាការប៉ះពាល់វប្បធម៌ជាតិដែរ»។

ចំណែកលោក ប៉ុក បូរក្ស ប្រធាននាយកដ្ឋានភាពយន្ត បានប្រាប់សារព័ត៌មានថ្មីៗថា វីដេអូដែលត្រូវបានសាធារណជនរិះគន់នោះ ពិតជាមានខ្លឹមសារប្រាស់ចាកសីលធម៌ មិនឆ្លុះបញ្ចាំងពីការអប់រំពិតមែន បើទោះបីជាវីដេអូនោះ បានសរសេរចំណងជើងថាជាវីដេអូអប់រំក្ដី។ លោកថាការផលិតវីដេអូបែបនោះ នឹងផ្ដល់ផលប៉ះពាល់ខ្លាំង ព្រោះការផ្សាយតាមបណ្ដាញផ្សព្វផ្សាយសង្គម មានភាពទូលំទូលាយ។

លោក ប៉ុក បូរក្ស ពន្យល់បន្ថែម៖«ខ្លឹមសារនិងរូបភាព ភាគច្រើនមានន័យប្រាស់ចាកពីសីលធម៌ និងប្រពៃណីខ្មែរ ដែលសង្គមអាចទទួលយកបាន។ នៅក្នុងប្រព័ន្ធផ្សព្វផ្សាយសង្គម យើងពិបាកក្នុងការគ្រប់គ្រង ហើយវាជះឥទ្ធិពលខ្លាំងទៅក្នុងសង្គម ពិសេសយុវជន និងកុមារដែលគាត់បានមើលរឿងខ្លីហ្នឹង។ ក្នុងករណីនេះយើងនឹងសុំគោលការណែនាំ ដើម្បីកោះហៅគាត់មកអប់រំ (អាចឱ្យកែតម្រូវ ឬលុបចោលវីដេអូនោះតែម្ដង ប្រសិនបើរូបនោះធ្ងន់ធ្ងរធ្វើឱ្យប៉ះពាល់ដល់សង្គមខ្លាំង»។

លោក ប៉ុក បូរក្ស ប្រធាននាយកដ្ឋានភាពយន្ត

ប្រធាននាយកដ្ឋានភាពយន្តរូបនេះបន្ថែមថា ពាក់ព័ន្ធនឹងការផលិតខ្សែភាពយន្ត ក្រសួងវប្បធម៌មានគោលការណែនាំ ដោយបានកំណត់កម្រិតនៃការទទួលយកបានរបស់សង្គម។ កំណត់កម្រិតដែលអាចអនុញ្ញាតឱ្យក្មេងតូចអាចមើលបាន ឬវីដេអូបែបណា ដែលក្មេងអាយុ១៥-១៨ អាចមើលបាន។

លោក បូរក្ស ក៏បានរំលឹកផងដែរថា កន្លងមកក្រសួងវប្បធម៌ និងវិចិត្រសិល្បៈ និងក្រសួងកិច្ចការនារី បានសហការគ្នារៀបចំសិក្ខាសាលាអប់រំ ពាក់ព័ន្ធនឹងការផលិតវីដេអូ ផ្សាយតាមប្រព័ន្ធផ្សព្វផ្សាយសង្គមខ្លះហើយ ដើម្បីទប់ស្កាត់កុំឱ្យមានការផលិតវីដេអូ ឬមាតិកា ដែលនាំឱ្យប៉ះពាល់ដល់សេចក្ដីថ្លៃថ្នូររបស់វប្បធម៌ជាតិ។

លោក បូរក្ស បានសង្កត់ធ្ងន់ថា ក្រសួងមិនចង់គ្រប់គ្រងការផលិតវីដេអូ ឬការបង្កើតមាតិកានៅតាមបណ្ដាញផ្សព្វផ្សាយសង្គម ដូចការផ្សាយនៅតាមទូរទស្សន៍ និងនៅតាមរោងកុនឡើយ ព្រោះការផលិតមួយចំនួន ក៏មានខ្លឹមសារល្អដែរ។ ប៉ុន្តែនៅតែមានអ្នកផលិតមួយចំនួន បានធ្វើឱ្យមានផលប៉ះពាល់ដល់វប្បធម៌ជាតិ និងសីលធម៌សង្គម។

«សំខាន់គឺការអប់រំណែនាំឱ្យបានច្រើន។ ក្នុងករណីការផលិតមួយចំនួន ដែលមានការលើសលួស និងមានការប៉ះពាល់ខ្លាំង យើងនឹងកោះហៅផលិតករ ឬអ្នកទទួលខុសត្រូវក្នុងការផលិតហ្នឹង មកអប់រំណែនាំ។ ប្រហែលកន្លងទៅ ការផ្សព្វផ្សាយមិនទាន់បានទូលំទូលាយ ព្រោះពីមួយថ្ងៃទៅមួយថ្ងៃមានអ្នកផលិតថ្មីជានិច្ច ដែលធ្វើឱ្យខុសឆ្គង។ យើងនឹងព្យាយាមផ្សព្វផ្សាយបន្ថែមទៀត»។ នេះជាការបញ្ជាក់បន្ថែមរបស់លោក ប៉ុក បូរក្ស។

ប្រធាននាយកដ្ឋានភាពយន្តរូបនេះ បានលើកឡើងបន្ថែមថា រាល់ការធ្វើអ្វីមួយតែងតែមានមុខពីរ ហើយការផលិតវីដេអូ ឬភាពយន្តក៏ដូចគ្នា។ លោក បូរក្ស អះអាងថា វីដេអូដែលឆ្លងកាត់ការពិនិត្យ និងដើរតាមគោលការរបស់ក្រសួង កម្រនឹងខុសណាស់ ព្រោះក្រសួងបានបញ្ជាក់យ៉ាងច្បាស់ថាអ្វីទៅជាភាពអាក្រាត អ្វីទៅជាភាពស៊ីចស៊ី និងអ្វីទៅជាភាពទទួលយកបានរបស់សង្គម។

លោកបន្ថែម៖«រឿងនោះគាត់គិតថាជារឿងអប់រំ ប៉ុន្តែសង្គមមិនអាចទទួលយកបាន ថាជារឿងអប់រំឡើយ ព្រោះរូបភាពបានបង្ហាញទៅផ្លូវអាក្រក់បាត់ទៅហើយ។ នេះគឺជាការមិនអាចទទួលយកបាន និងអសីលធម៌។ ខ្ញុំសង្ឃឹមថាពួកគាត់និងកែប្រែ នៅពេលទទួលបានការអប់រំ។ កន្លងទៅផលិតករមួយចំនួន ដែលទទួលបានការអប់រំហើយ គាត់បានព្យាយាមអនុវត្តបានត្រឹមត្រូវច្រើន»។

កន្លងមកលោក ចំរើន វ៉ាន់ថា ធ្លាប់បានប្រាប់សារព័ត៌មានថ្មីៗអំពីការបង្កើត “ក្រមប្រតិបត្តិវប្បធម៌" ដែលក្រមនេះមានអំណាចគ្របដណ្ដប់លើសាធារណជនណា ដែលនៅក្រៅចង្កោមអ្នកសិល្បៈ ហើយធ្វើសកម្មភាពប៉ះពាល់ដល់តម្លៃសិល្បៈ វប្បធម៌ និងប្រពៃណីជាតិ។

ប៉ុន្តែក្នុងបទសម្ភាសចុងក្រោយជាមួយសារព័ត៌មានថ្មីៗ ក្នុងអំឡុងខែកក្កដានេះ លោក ចំរើន វ៉ាន់ថា បានបញ្ជាក់ថា “ក្រមប្រតិបត្តិវប្បធម៌"នោះ ទំនងជាពុំអាចចេញទៅរួច ព្រោះការកោះហៅសាធារណជនណាមួយ ដែលបានប្រព្រឹត្តកំហុស ពុំមែនជាអំណាចរបស់ក្រសួងវប្បធម៌ និងវិចិត្រសិល្បៈឡើយ។ ទីប្រឹក្សាអមក្រសួងវប្បធម៌រូបនេះអះអាងថា ការស្វែងរកអត្តសញ្ញាណបុគ្គលណាម្នាក់ តាមរយៈបណ្ដាញសង្គមមានការពិបាក គឺត្រូវការសមត្ថកិច្ចជំនាញទើបអាចធ្វើទៅរួច។

«ពីមុនយើងបានគិតថា យើងបង្កើតក្រមនេះ។ ប៉ុន្តែក្រោយពីយើងពិភាក្សាគ្នា យើងពិបាកនឹងអនុវត្តន៍ ព្រោះក្រសួងវប្បធម៌ មិនមានអំណាចអ្វីទៅកោះហៅគេទេ យើងនៅតែត្រូវការក្រសួងពាក់ព័ន្ធ ដែលមានអំណាចតាមតួនាទីរបស់គាត់ ដើម្បីសហការគ្នា។ បើទោះបីជាក្រមនេះ ពុំទាន់អាចចេញបានក៏ដោយ ក៏ក្រសួងវប្បធម៌ នៅតែធ្វើការជាមួយក្រសួងពាក់ព័ន្ធនានាដដែល នៅពេលសាធារណជនណា បង្ហាញសកម្មភាពប៉ះពាល់ដល់សេចក្ដីថ្លៃថ្នូរ របស់សិល្បៈវប្បធម៌ជាតិ»។ នេះជាការបញ្ជាក់របស់លោក ចំរើន វ៉ាន់ថា។

សូមរំលឹកផងដែរថា កាលពីថ្ងៃទី១៩ ខែមីនា ឆ្នាំ២០២២ ក្រុមប្រឹក្សាពិន័យ និងលើកសរសើរ ត្រូវបានបង្កើតឡើង ដើម្បីពិនិត្យ វាយតម្លៃ និងសម្រេចលើការដាក់ពិន័យ ឬផ្ដល់ការលើកសរសើរ ចំពោះសកម្មភាពទាំងឡាយណា ពាក់ព័ន្ធនឹងសិល្បៈ ប្រពៃណី ទំនៀមទម្លាប់ និងសីលធម៌សង្គម សំដៅចូលរួមលើកស្ទួយអត្តសញ្ញាណវប្បធម៌ សេចក្ដីថ្លៃថ្នូរ និងកិត្យានុភាពជាតិ។

រូបភាពនេះត្រូវបានស្រង់ចេញពីឈុតមួយ ក្នុងរឿងខ្លី ដែលត្រូវបានមហាជនរិះគន់

ក្រុមលេខាធិការដ្ឋាន នៃក្រុមប្រឹក្សាពិន័យ និងលើកសរសើរ មានភារកិច្ចពិនិត្យតាមដាន ប្រមូលព័ត៌មាននិងសកម្មភាពទាំងឡាយ ដែលនាំឱ្យប៉ះពាល់ដល់សិល្បៈ ប្រពៃណី ទំនៀមទម្លាប់ល្អរបស់ជាតិ និងសីលធម៌សង្គម។ ពិនិត្យសិក្សាលើអង្គហេតុ អង្គច្បាប់ និងលើកយោបល់ជូនក្រុមប្រឹក្សាពិន័យ និងលើកសរសើរ ដើម្បីពិនិត្យ វាយតម្លៃ និងសម្រេច។ រៀបចំសំណុំឯកសារជូនក្រុមប្រឹក្សាពិន័យ និងលើកសរសើរ ដើម្បីពិនិត្យនិងសម្រេចក្នុងការដាក់ពិន័យ ឬការលើកសរសើរ។

អប់រំ ណែនាំ ទប់ស្កាត់ និង/ឬដាក់ពិន័យ ចំពោះអ្នកដែលបានធ្វើសកម្មភាពនាំឱ្យប៉ះពាល់ដល់សិល្បៈ ប្រពៃណី ទំនៀមទម្លាប់ល្អរបស់ជាតិ និងសីលធម៌សង្គម តាមការសម្រេចរបស់ក្រុមប្រឹក្សាពិន័យ និងលើកសរសើរ។ ផ្ដល់លិខិតសរសើរ និង/ឬគ្រឿងឥស្សរិយយស លើកទឹកចិត្តជូនអ្នកដែលបានធ្វើសកម្មភាព រួមចំណែក លើកកម្ពស់សិល្បៈ ប្រពៃណី ទំនៀមទម្លាប់ល្អរបស់ជាតិ និងសីលធម៌សង្គម តាមការសម្រេចរបស់ក្រុមប្រឹក្សាពិន័យនិងលើកសរសើរ។

សហការនិងសម្របសម្រួលជាមួយភាគីពាក់ព័ន្ធ ក្នុងការប្រមូលព័ត៌មាន ការវិភាគ ការវាយតម្លៃ ការអប់រំផ្សព្វផ្សាយ និងការអនុវត្ត។ តាមដាននឹងដោះស្រាយវិវាទផ្សេងៗ ពាក់ព័ន្ធសកម្មភាពសិល្បៈ ប្រពៃណី ទំនៀមទម្លាប់ និងសីលធម៌សង្គម។ ធ្វើរបាយការណ៍ អំពីសភាពការណ៍ និងវឌ្ឍនភាពការងារ ជូនក្រុមប្រឹក្សាពិន័យ និងលើកសរសើរ។ បំពេញការងារផ្សេងៗទៀត ដែលប្រធានក្រុមប្រឹក្សាពិន័យ និងលើកសរសើរប្រគល់ជូន៕