ភ្នំពេញ៖ អង្គការតម្លាភាពកម្ពុជា បានសម្ពោធដាក់ឱ្យប្រើប្រាស់ជាផ្លូវការ កម្មវិធីទូរសព្ទដៃ «មតិយើង» ដើម្បីឱ្យពលរដ្ឋផ្តល់ព័ត៌មានត្រឡប់ ដាក់ពាក្យបណ្ដឹង និងវាយតម្លៃសេវាសាធារណៈនៅតាមមូលដ្ឋានរបស់ខ្លួន ដោយសម្ងាត់។ សហការផលិតឡើងដោយក្រសួងមហាផ្ទៃ អង្គការតម្លាភាពកម្ពុជា និងអង្គការអាក់សិនអេតកម្ពុជា កម្មវិធី«មតិយើង» មានគោលដៅចូលរួមចំណែកធ្វើឱ្យសេវាសាធារណៈនៅកម្ពុជា កាន់តែមានតម្លាភាព បរិយាប័ន្ន និងគណនេយ្យភាព ជាពិសេសឆ្លើយតបនឹងតម្រូវការយេនឌ័រ។
កម្មវិធីទូរសព្ទដៃ «មតិយើង» ដែលជាឧបករណ៍ថ្មីមួយ អនុញ្ញាតឱ្យប្រជាពលរដ្ឋផ្តល់មតិ យោបល់ និងដាក់ពាក្យបណ្ដឹង អំពីសេវាសាធារណៈនៅថ្នាក់ក្រោមជាតិ ក្នុងប្រទេសកម្ពុជា ត្រូវបានដាក់សម្ពោធឱ្យប្រើប្រាស់ជាផ្លូវការ នៅថ្ងៃទី២៨ កក្កដានេះ។ កម្មវិធី«មតិយើង» ត្រូវបានសហការផលិតឡើងដោយក្រសួងមហាផ្ទៃ អង្គការតម្លាភាពកម្ពុជា និងអង្គការអាក់សិនអេតកម្ពុជា ដែលជាយន្តការសម្ងាត់ ងាយស្រួលប្រើ និងឥតគិតថ្លៃ សម្រាប់សាធារណជនក្នុងការដាក់បណ្ដឹង ស្វែងរកជំនួយ សាកសួរព័ត៌មាន និងវាយតម្លៃសេវាសាធារណៈ នៅតាមមូលដ្ឋានរបស់ខ្លួន។ គោលបំណង នៃការផលិតកម្មវិធីទូរស័ព្ទដៃនេះ គឺដើម្បីចូលរួមចំណែកក្នុងការធ្វើឱ្យសេវាសាធារណៈនៅកម្ពុជា កាន់តែមានតម្លាភាព បរិយាប័ន្ន និងគណនេយ្យភាពបន្ថែមទៀត ជាពិសេសសេវាសាធារណៈដែលឆ្លើយតបនឹងតម្រូវការយេនឌ័រ។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា (កណ្តាល) ក្នុងពិធីសម្ពោធដាក់ឱ្យប្រើប្រាស់កម្មវិធីទូរសព្ទដៃ«មតិយើង» នៅថ្ងៃទី២៨កក្កដា ឆ្នាំ២០២២។ ©️Kimheang Tuon-TI Cambodia
លោក ប៉ិច ពិសី នាយកប្រតិបត្តិ អង្គការតម្លាភាពកម្ពុជា បានមានប្រសាសន៍ថា ការដាក់ឱ្យដំណើរការជាផ្លូវការកម្មវិធីទូរស័ព្ទដៃ «មតិយើង» គឺជាការបោះជំហានដ៏សំខាន់មួយទៀត ឆ្ពោះទៅរកសេវាសាធារណៈប្រកបដោយប្រសិទ្ធភាព នៅប្រទេសកម្ពុជា។ លោក ប៉ិច ពិសី មានប្រសាសន៍បន្ថែមដូច្នេះ៖« ដោយសារអត្រាខ្ពស់នៃការប្រើប្រាស់ទូរស័ព្ទឆ្លាតវៃ និងអ៊ីនធឺណិតនៅក្នុងប្រទេស ការផលិត និងអនុវត្តកម្មវិធីទូរស័ព្ទដៃនេះ គឺជាឱកាសដ៏ល្អប្រសើរជាងពេលណាៗទាំងអស់។ កម្មវិធីទូរស័ព្ទដៃនេះ នឹងផ្តល់ជូនប្រជាពលរដ្ឋ ជាពិសេសយុវជននូវវេទិកាដ៏ទំនើប ប៉ុន្តែសាមញ្ញ ងាយស្រួលប្រើក្នុងការប្រាស្រ័យ ទំនាក់ទំនងនូវកង្វល់ និងតម្រូវការរបស់ពួកគាត់ជាមួយនឹងអ្នកផ្តល់សេវាសាធារណៈ ដែលនឹងនាំឱ្យមានភាពប្រសើរឡើងនៃអភិបាលកិច្ចល្អ និងការផ្តល់សេវាសាធារណៈកាន់តែឆាប់រហ័ស និងប្រកបដោយគណនេយ្យភាពនៅក្នុងប្រទេស។»។
លោក ងី ច័ន្ទ្រផល រដ្ឋលេខាធិការក្រសួងមហាផ្ទៃ បានចាត់ទុកការសម្ពោធដាក់ឱ្យប្រើប្រាស់កម្មវិធីទូរស័ព្ទដៃនេះ គឺជាការរួមចំណែកមួយនៅក្នុងការលើកកម្ពស់ និងជំរុញការអនុវត្តប្រព័ន្ធរដ្ឋបាលសាធារណៈ ឱ្យកាន់តែមានតម្លាភាព គណនេយ្យភាព និងភាពឆ្លើយតបទៅនឹងតម្រូវការរបស់ប្រជាពលរដ្ឋ។ សម្រាប់ លោក ងី ច័ន្ទ្រផល ការទទួលបានមតិ យោបល់របស់ប្រជាពលរដ្ឋ អំពីការផ្តល់សេវាសាធារណៈនៅថ្នាក់ក្រោមជាតិនេះ នឹងអាចជួយឱ្យការផ្តល់សេវាសាធារណៈ ន់តែមានភាពល្អប្រសើរ។
លោក ងី ច័ន្ទ្រផល រដ្ឋលេខាធិការក្រសួងមហាផ្ទៃ ផ្តល់សម្ភាសដល់អ្នកសារព័ត៌មាន ក្នុងពិធីដាក់សម្ពោធកម្មវិធីទូរសព្ទ«មតិយើង» នៅថ្ងៃទី២៨ ខែកក្កដា ឆ្នាំ២០២២។
នៅក្នុងពិធីសម្ពោធដាក់ឱ្យប្រើប្រាស់ជាផ្លូវការ កម្មវិធី«មតិយើង»នៅថ្ងៃនេះ លោក ស៊ វរិន អនុប្រធានលេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) និងជាអគ្គនាយករងអគ្គនាយដ្ឋានរដ្ឋបាល នៃក្រសួងមហាផ្ទៃ បានគូសបញ្ជាក់ថា ការរៀបចំកម្មវិធីទូរសព្ទដៃនេះ គឺជាការផ្តល់នូវជម្រើសថ្មីបន្ថែមទៀត ដល់ប្រជាពលរដ្ឋ ទៅលើមធ្យោបាយដែលមានស្រាប់ ក្នុងការផ្តល់ព័ត៌មាន ឬការដាក់ពាក្យបណ្តឹងតវ៉ានានា ដែលមានដូចជាប្រអប់សំបុត្រ ការជួបផ្ទាល់នៅការិយាល័យប្រជាពលរដ្ឋ និងតាមបណ្តាញសង្គមនានាជាដើម។ «កម្មវិធីនេះនឹងផ្តល់ភាពងាយស្រួលដល់ពលរដ្ឋ ក្នុងការទទួលព័ត៌មាន ការដាក់ពាក្យបណ្តឹង ចំពោះការមិនពេញចិត្តការផ្តល់សេវានៅរដ្ឋបាលថ្នាក់ក្រោមជាតិ និងអាចផ្តល់មតិយោបល់ កែលម្អនានាចំពោះការសេវាផងដែរ។»។ លោក ស៊ វរិន បញ្ជាក់បន្ថែមដូច្នេះ។
លោក ស៊ វរិន អនុប្រធានលេខាធិការដ្ឋានគ.ជ.អ.ប និងជាអគ្គនាយករងអគ្គនាយដ្ឋានរដ្ឋបាល នៃក្រសួងមហាផ្ទៃ ក្នុងពិធីដាក់សម្ពោធកម្មវិធីទូរសព្ទ«មតិយើង» នៅថ្ងៃទី២៨ ខែកក្កដា ឆ្នាំ២០២២។ ©️Kimheang Tuon-TI Cambodia
ស្របពេលដែល យន្តការដោះស្រាយលើបណ្តឹងរបស់ពលរដ្ឋ តាមរយៈកម្មវិធីថ្មីនេះនៅមិនទាន់មានការសិក្សា វាយតម្លៃជាក់លាក់នៅឡើយនោះ លោក ស៊ វរិន ស្នើឱ្យក្រុមការងារបច្ចេកទេស និងអ្នកពាក់ព័ន្ធ បន្តសហការគ្នាដើម្បីពន្លឿនយន្តការ វាយតម្លៃដំណើរការដោះស្រាយបញ្ហាជូនពលរដ្ឋ ដើម្បីឈានទៅពង្រីកតំបន់គោលដៅអនុវត្តកម្មវិធីនេះ នៅថ្ងៃអនាគត។ ទន្ទឹមនឹងនេះ អគ្គនាយករងអគ្គនាយដ្ឋានរដ្ឋបាល នៃក្រសួងមហាផ្ទៃ ក៏ស្នើឱ្យមានការពន្លឿន ការពិភាក្សាអំពីការផ្ទេរបច្ចេកវិទ្យា នៃការគ្រប់គ្រងកម្មវិធីទូរសព្ទដៃ«មតិយើង»ដើម្បីធានានិរន្តរភាព នៅពេលដែលគម្រោងត្រូវបានបញ្ចប់ផងដែរ។
សូមជម្រាបថា កម្មវិធីទូរស័ព្ទដៃ «មតិយើង» គឺជាផ្នែកមួយនៃក្របខ័ណ្ឌកិច្ចសហប្រតិបត្តិការ រវាងក្រសួងមហាផ្ទៃ អង្គការតម្លាភាពកម្ពុជា និងអង្គការអាក់សិនអេតកម្ពុជា ដែលផ្តល់មូលនិធិដោយសហភាពអឺរ៉ុប និងរដ្ឋាភិបាលប្រទេសស៊ុយអែត ដើម្បីជួយសម្របសម្រួលក្នុងការប្រមូលព័ត៌មានត្រឡប់របស់ប្រជាពលរដ្ឋ និងការឆ្លើយតបរបស់អ្នកផ្តល់សេវាសាធារណៈ ដែលនឹងលើកកម្ពស់អភិបាលកិច្ចថ្នាក់មូលដ្ឋាន និងការផ្ដល់សេវាសាធារណៈប្រកបដោយគណនេយ្យភាព និងឆ្លើយតបតាមតម្រូវការយេនឌ័រ។
©️Kimheang Tuon-TI Cambodia
គិតត្រឹមដើមឆ្នាំ២០២២ កំណែចុងក្រោយនៃកម្មវិធីទូរស័ព្ទដៃ «មតិយើង» ត្រូវបានផលិតឡើង និងដាក់ឱ្យប្រើប្រាស់សាកល្បងដោយជោគជ័យ នៅតាមរដ្ឋបាលថ្នាក់ក្រោមជាតិក្នុងតំបន់គោលដៅនៃគម្រោង នៃប្រទេសកម្ពុជា រួមមាន៖ អង្គភាពច្រកចេញចូលតែមួយ និងការិយាល័យប្រជាពលរដ្ឋថ្នាក់រាជធានី/ខេត្តចំនួន៣ ការិយាល័យច្រកចេញចូលតែមួយ និងការិយាល័យប្រជាពលរដ្ឋថ្នាក់ក្រុង/ស្រុកចំនួន៨ និងរដ្ឋបាលឃុំ/សង្កាត់ចំនួន៣០។ ស្ថាប័នទាំង៣ បាននិងកំពុងធ្វើការរួមគ្នា ដើម្បីពង្រឹងសមត្ថភាពមន្ត្រីសាធារណៈ របស់ក្រសួងមហាផ្ទៃ និងមន្ត្រីផ្តល់សេវាថ្នាក់ក្រោមជាតិ នៅតាមអង្គភាព/ការិយាល័យច្រកចេញចូលតែមួយ និងការិយាល័យប្រជាពលរដ្ឋ ព្រមទាំងរដ្ឋបាលឃុំ-សង្កាត់ ក្នុងតំបន់គោលដៅ ទៅលើការផ្ដល់សេវាសាធារណៈ ដែលប្រកបដោយគណនេយ្យភាព និងឆ្លើយតបតាមតម្រូវការយេនឌ័រ ព្រមទាំងការកសាងសមត្ថភាពរបស់យុវជន ជាពិសេសស្ត្រីវ័យក្មេង និងផ្តល់វេទិកាឱ្យពួកគេ បានចូលរួមក្នុងកិច្ចសន្ទនា និងការតាមដានការផ្តល់សេវាសាធារណៈនៅតាមតំបន់គោលដៅរបស់គម្រោងផងដែរ។
ក្របខ័ណ្ឌកិច្ចសហប្រតិបត្តិការនេះ ក៏ផ្តល់អាទិភាពចំពោះការរៀបចំឱ្យមាននូវកិច្ចពិភាក្សាពហុភាគីនៅថ្នាក់ក្រោមជាតិ និងថ្នាក់ជាតិ ដើម្បីដោះស្រាយកង្វល់ និងមតិយោបល់របស់ប្រជាពលរដ្ឋលើការផ្តល់សេវាសាធារណៈ និងសម្រួលដល់ការឆ្លើយតបគោលនយោបាយទៀតផង៕