១០ប្រទេសក្នុងតំបន់អាស៊ីអាគ្នេយ៍ បានយល់ស្របក្នុងការបង្កើតការប្រកួតអាស៊ានប៉ារ៉ាហ្គេម (Asean Para Games)។ ១០ប្រទេស ជាស្ថាបនិកបង្កើតព្រឹត្តិការណ៍នោះ រួមមាន កម្ពុជា, ព្រុយណេ, មីយ៉ាន់ម៉ា, ឥណ្ឌូណេស៊ី, ឡាវ, ម៉ាឡេស៊ី, ហ្វីលីពីន, សិង្ហបុរី, ថៃ និង វៀតណាម។ 
 

នាថ្ងៃទី២៨ មេសា ឆ្នាំ២០០១ ប្រទេសទាំងអស់ យល់ស្របធ្វើព្រឹត្តិការណ៍នេះ ២ឆ្នាំម្ដង បន្ទាប់ពីការប្រកួតកីឡាអាស៊ីអាគ្នេយ៍ ឬស៊ីហ្គេម (Southeast Asean Games ឬ Sea Games)។ នោះ មានន័យថា ប្រទេសដែលធ្វើជាម្ចាស់ផ្ទះស៊ីហ្គេម ក៏ត្រូវរ៉ាប់រងធ្វើជាម្ចាស់ផ្ទះការប្រកួតអាស៊ានប៉ារ៉ាហ្គេមផងដែរ បន្ទាប់ពីរៀបចំព្រឹត្តិការណ៍ស៊ីហ្គេម រួចរាល់។
 

អមជាមួយព្រឹត្តិការណ៍កីឡាជនពិការនេះ សមាជិកអាស៊ានទាំងអស់ ក៏បានបង្កើតសហព័ន្ធកីឡាអាស៊ានប៉ារ៉ា (Asean Para Sports Federation ឬ APSF) ដើម្បីត្រួតពិនិត្យ និងជួយសម្រួលដល់កិច្ចការរដ្ឋបាលក្នុងការរៀបចំការប្រកួត និងនីតិវិធីកីឡាជនពិការផ្សេងៗ នាថ្ងៃទី២៣ ខែតុលា ឆ្នាំ២០០១។ យោងទៅលើការផ្សាយលើគេហទំព័ររបស់ APSF លោក Zainal Abu Zarin ត្រូវបានជ្រើសជាប្រធានអាណត្ដិទី១ រហូតដល់ឆ្នាំ២០១៥ ទើបលោក Osoth Bhavilai គណៈកម្មាធិការប៉ារ៉ាឡាំពិកជាតិថៃ កាន់តំណែងបន្ដ។
 

១- សហព័ន្ធ ជួយពង្រឹង​ និងជំរុញនូវការអនុវត្ត សកម្មភាពកីឡាដល់ជនពិការភាព ដោយមិនមានការរើសអើង។
 

២- សហព័ន្ធ ជួយពង្រឹង និងជំរុញឲ្យមាន កម្មវិធីអប់រំ ស្រាវជ្រាវ ការអភិវឌ្ឍ សកម្មភាពអប់រំពីក្បួនច្បាប់កីឡា និងការថែរក្សាសុខភាព។
 

៣- សហព័ន្ធ ជួយពង្រឹងបន្ថែម នូវចំណងមិត្តភាព សាមគ្គីភាព និងភាតរភាព តាមរយៈសកម្មភាពកីឡារបស់ជនពិការ។
 

៤- សហព័ន្ធ រៀបចំការប្រកួតរបស់ខ្លួន បន្ទាប់ពីព្រឹត្តិការណ៍ស៊ីហ្គេម ដែលនេះជាគោលដៅមួយ ក្នុងការបង្កើត APSF។
 

៥- សហព័ន្ធ រៀបចំការប្រកួត និងព្រឹត្តិការណ៍ផ្សេងៗទៀត ដែលទាក់ទងទៅនិងការអភិវឌ្ឍបច្ចេកទេស គម្រោង និងវិទ្យាសាស្ដ្រកីឡា។
 

៦- សហព័ន្ធ បង្កើតឡើង ដើម្បីទទួលបានបច្ចេកវិទ្យាព័ត៌មាន សម្រាប់ពង្រឹងបន្ថែមទៀតនូវគោលបំណង និងគោលដៅរបស់សហព័ន្ធ APSF។
 

ការប្រកួតព្រឹត្តិការណ៍អាស៊ានប៉ារ៉ាហ្គេមលើកទី១ នៅប្រទេសម៉ាឡេស៊ី នាឆ្នាំ២០០១ ដែលមានអត្ដពលិកជាង៦០០នាក់ចូលរួម ពីបណ្ដាលប្រទេស១០ ជាសមាជិកអាស៊ាន។ ដោយឡែក ទីម័រខាងកើត បានចូលរួមប្រកួត​ ចាប់ពីឆ្នាំ២០០៣ ដែលជាព្រឹត្តិការណ៍អាស៊ានប៉ារ៉ាហ្គេមលើកទី២ នៅប្រទេសវៀតណាម។  ក្នុងចំណោមប្រទេសទាំង១០ ដែលជាស្ថាបនិកនោះ គឺមានកម្ពុជា ព្រុយណេ និងឡាវ មិនទាន់បានធ្វើជាម្ចាសផ្ទះនៅឡើយទេ។ ដោយឡែក កម្ពុជា នឹងធ្វើជាម្ចាស់ផ្ទះប្រកួតអាស៊ានប៉ារ៉ាហ្គេមលើកទី១២ នៅថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ បន្ទាប់ពីចប់ការប្រកួតស៊ីហ្គេមលើកទី៣២ ដែលធ្វើឡើងចាប់ពីថ្ងៃទី៥ ខែ១៧ ខែឧសភា ឆ្នាំ២០២៣៕