ជំងឺកូវីដ-១៩ ត្រូវបាន​ក្រសួងសុខាភិបាលរកឃើញជាបន្តបន្ទាប់ឡើងវិញ ចាប់ពីថ្ងៃទី២៨ ខែមិថុនា ឆ្នាំ២០២២ ។ នៅពេលនោះ មានមនុស្សចំនួន ១០នាក់ត្រូវបានរកឃើញថាវិជ្ជមានជំងឺកូវីដ-១៩ ជាករណីឆ្លងក្នុងសហគមន៍។ 
 

ផ្អែកទៅលើទិន្នន័យស្ថានភាពប្រចាំថ្ងៃរបស់ ក្រសួងសុខាភិបាល ក្នងខែកក្កដាវិញ ការរកឃើញអ្នកវិជ្ជមានកូវីដ-១៩ ហាក់មិនថមថយនោះឡើយ ពោលគឺនៅដើមខែកក្កដា ត្រូវបានរកឃើញមានអ្នកឆ្លងចំនួន ៨នាក់ និងឡើងជាបន្តបន្ទាប់រហូតដល់ជិត៥០នាក់។ 
 

យោងតាមសេចក្ដីប្រកាសព័ត៌មានប្រចាំថ្ងៃរបស់ក្រសួងសុខាភិបាល អ្នកវិជ្ជមានកូវីដ-១៩ ត្រូវបានបញ្ជាក់ដោយ PCR ហើយស្ទើរតាំងស្រុងជាករណីឆ្លងក្នុងសហគមន៍។ ម្យ៉ាងទៀតករណីដែលរកឃើញជាបន្តបន្ទាប់នេះ ត្រូវបានក្រសួងសុខាភិបាលបញ្ជាក់ថា ភាគច្រើនជាករណីស្នើសុំវិញ្ញាបនបត្រចេញទៅក្រៅប្រទេស។ 
 

ជុំវិញករណីឆ្លងកូវីដ-១៩នេះ កាលពីដើមខែកក្កដា នាពិធី​អបអរទិវាមច្ឆជាតិ ១កក្កដា នៅស្រុកភ្នំស្រុក ខេត្តបន្ទាយមានជ័យ នាយករដ្ឋមន្ត្រី ហ៊ុន សែន បានអំពាវនាវឱ្យពលរដ្ឋ​នាំគ្នាទៅចាក់វ៉ាក់សាំង ខណៈ​បច្ចុប្បន្ន កម្ពុជាមាន​ប្រមាណ​១០,៤លានដូសក្នុងស្តុក ហើយ​២០លាន​ដូសទៀតនឹងមកដល់។ 
 

គួរជម្រាបផងដែរថា គិតត្រឹមថ្ងៃទី៣០ ខែកក្កដា ឆ្នាំ២០២២នេះ កម្ពុជាមានករណីឆ្លងកូវីដ-១៩សរុបចំនួន ១៣៦ ៧៨៩នាក់, ជាសះស្បើយចំនួន ១៣៣ ៥១៧នាក់ និងករណីស្លាប់ចំនួន ៣ ០៥៦នាក់៕