អន្តរជាតិ
នយោបាយអន្តរជាតិ
ឈានជើងជាន់ទឹកដីតៃវ៉ាន់ភ្លាម ប្រធានសភាអាម៉េរិក អះអាងថាទស្សនកិច្ចខ្លួន ជាការគាំទ្រប្រជាធិបតេយ្យ រូបពី AFP
× ឈានជើងជាន់ទឹកដីតៃវ៉ាន់ភ្លាម នៅយប់ថ្ងៃទី២ ខែសីហា លោកស្រី ណាន់ស៊ី ផេឡូស៊ី បានចេញសេចក្តីថ្លែងការណ៍មួយ ដោយអះអាងថា ទស្សនកិច្ចតំណាងសភារបស់អាម៉េរិកនៅតៃវ៉ាន់បញ្ជាក់ពីការប្តេជ្ញារបស់ខ្លួន ក្នុងការគាំទ្រប្រជាធិបតេយ្យរបស់តៃវ៉ាន់។
សេចក្តីថ្លែងការណ៍មួយចេញលើវេបសាយរបស់ប្រធានសភាតំណាងអាម៉េរិកនៅថ្ងៃទី២ ខែសីហា បានបញ្ជាក់ថា៖ «ទស្សនកិច្ចតំណាងសភារបស់យើងនៅតៃវ៉ាន់ បញ្ជាក់ពីការប្តេជ្ញារបស់អាម៉េរិក ក្នុងការគាំទ្រប្រជាធិបតេយ្យរបស់តៃវ៉ាន់»។
មិនតែប៉ុណ្ណោះ សេចក្តីថ្លែងការណ៍ដដែលបានបន្ថែមថា ទស្សនកិច្ចនេះ មិនផ្ទុយនឹងគោលនយោបាយរបស់អាម៉េរិក ដែលមានចំពោះតៃវ៉ាន់ឡើយ ហើយអាម៉េរិកបន្តជំទាស់សកម្មភាពឯកតោភាគី ក្នុងការផ្លាស់ប្តូរស្ថានភាពបច្ចុប្បន្ន។ មិនតែប៉ុណ្ណោះ តំណាងសភាអាម៉េរិក នឹងជជែកជាមួយតៃវ៉ាន់ជុំវិញប្រធានបទលើផលប្រយោជន៍រួម ការពង្រឹងយុទ្ធសាស្ត្រសេរី និងបើកចំហក្នុងតំបន់ឥណ្ឌូ-ប៉ាស៊ីហ្វិកជាដើម។
ក្រសួងការបរទេសចិន ក្នុងថ្ងៃទី២ ខែសីហា បានថ្កោសទោសយ៉ាងខ្លាំង ចំពោះដំណើរទស្សនកិច្ចរបស់ប្រធានសភាតំណាងនៅតៃវ៉ាន់។ បើតាមក្រសួងការបរទេស ក្រុងប៉េកាំង បានដាក់ពាក្យតវ៉ារួចហើយជាមួយក្រុងវ៉ាស៊ីនតោន។ នេះជាទស្សនកិច្ចរបស់មន្ត្រីអាម៉េរិកមានឋានៈខ្ពស់មួយ ទៅតៃវ៉ាន់លើកដំបូងចាប់តាំងពីឆ្នាំ ១៩៩៧។ កាលឆ្នាំនោះ លោក Newt Gingrich ប្រធានសភាតំណាងអាម៉េរិក ក៏បានធ្វើទស្សនកិច្ចនៅតៃវ៉ាន់ដែរ៕
© រក្សាសិទ្ធិដោយ thmeythmey.com