មុនចូលរួមកិច្ចប្រជុំថ្នាក់រដ្ឋមន្រ្តីការបរទេសអាស៊ានលើកទី៥៥ លោក ស៊ែហ្គេយ៍ ឡាវរ៉ូវ រដ្ឋមន្រ្តីការបរទេសរុស្ស៊ី បានធ្វើទស្សនកិច្ចនៅមីយ៉ាន់ម៉ា។ ប្រមុខការទូតរូបនេះ បានជួបជាមួយរដ្ឋមន្រ្តីការបរទេសនៃរដ្ឋាភិបាលយោធាមីយ៉ាន់ម៉ា លោក Wunna Maung Lwin និងមេដឹកនាំ។ នេះបើតាមការបញ្ជាក់របស់អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova នៅថ្ងៃទី២ ខែសីហា។ 

 

លោកស្រី Zakharova បានបន្ថែមថា ការពិភាក្សាលើកិច្ចសហប្រតិបត្តិការសន្តិសុខ និងការពារ អាចជារបៀបវារៈមួយនៅក្នុងចំណោមប្រធានបទផ្សេងទៀត។ 

 

សូមបញ្ជាក់ថា ទោះបីរបប​យោធា​មីយ៉ាន់ម៉ា​បាន​រង​ទណ្ឌកម្ម​ពី​ប្រទេស​លោកខាងលិច​ជាច្រើនក៏ដោយ ក៏ទំនាក់ទំនងរវាងមីយ៉ាន់ម៉ានិងរុស្សីនៅតែមានភាពល្អប្រសើរដដែល ហើយនៅដើមខែនេះ ក្រសួងការពារជាតិរុស្ស៊ីបាននិយាយថា រុស្សីនឹងពង្រឹងកិច្ចសហប្រតិបត្តិការលើវិស័យការពារជាតិឱ្យកាន់តែស៊ីជម្រៅ បន្ទាប់ពីប្រមុខរបបយោធាលោក មីន អ៊ុងឡាំង បានធ្វើដំណើរទៅកាន់ទីក្រុងម៉ូស្គូ៕