ដោយ៖ ហ៊ួយ ស៊ីវលី

អ្នកនាំពាក្យក្រសួងការបរទេសវៀតណាម នៅថ្ងៃទី៣ ខែសីហា បានអំពាវនាវឱ្យ ភាគីពាក់ព័ន្ធនៅច្រកសមុទ្រតៃវ៉ាន់រក្សាភាពអត់ធ្មត់ ដើម្បីបង្ការជម្លោះកុំឱ្យរីកធំ។ បើតាមអ្នកនាំពាក្យរូបនេះ វៀតណាមបន្តទទួលស្គាល់ «គោលនយោបាយចិនតែមួយ»។

 

ដំណើរ​ទស្សនកិច្ច​របស់​ប្រធានសភាតំណាង​អាមេរិក លោកស្រី ណាន់ស៊ី ផេឡូស៊ី ​នៅ​តៃវ៉ាន់ បានបង្កអោយ​ភាពតានតឹងរវាងអាមេរិក និងចិនកាន់តែកើនឡើងយ៉ាងខ្លាំង ដោយក្រុងប៉េកាំងចាត់ទុកទស្សនកិច្ចនេះ បង្កឱ្យមានអស្ថិរភាពនៅលើច្រកសមុទ្រតៃវ៉ាន់។ ស្របពេលមានបញ្ហាចម្រូងចម្រាសបែបនេះ វៀតណាម ដែលជាប្រទេសជិតខាង បានអំពាវនាវឱ្យភាគីពាក់ព័ន្ធទាំងអស់មានភាពអត់ធ្មត់។ 

 

«វៀតណាម មានបំណងចង់អោយភាគីពាក់ព័ន្ធទាំងអស់មានភាពអត់ធ្មត់ ដោយមិនបង្កើនភាពតានតឹងនៅច្រកសមុទ្រតៃវ៉ាន់ ដែលវាជាការរួមចំណែកវិជ្ជមានដល់ការរក្សាសន្តិភាព និងស្ថិរភាព ព្រមទាំងពង្រឹងកិច្ចសហប្រតិបត្តិការ និងការអភិវឌ្ឍន៍ក្នុងតំបន់ និងពិភពលោក»។ លោកស្រី Le Thi Thu Hang អ្នកនាំពាក្យក្រសួងការបរទេសវៀតណាម បានសង្កត់ធ្ងន់បែបនេះ នៅថ្ងៃទី៣ ខែសីហា ដោយបន្ថែមថា វៀតណាមបន្តគោរព​គោល​នយោបាយ​ចិន​តែ​មួយ ​ដែល​ទទួល​ស្គាល់​ហុងកុង ម៉ាកាវ និង​តៃវ៉ាន់​ជា​ផ្នែក​មួយ​របស់​ចិន។ 

 

ស្របពេលមានទស្សនកិច្ច លោកស្រី ផេឡូស៊ី នៅតៃវ៉ាន់ ចិនបានចាប់ផ្តើមធ្វើសមយុទ្ធយោធានៅជុំវិញប្រជុំកោះតៃវ៉ាន់ ដែលក្រុងតៃប៉ិ ចាត់ទុកជាការបំពានអធិបតេយ្យរបស់ខ្លួន៕