បើតាមលោក ជា វ៉ាន់ដេត​ បន្ទាប់ពីប្រកាសស្តីពី«គុណភាពសេវាទូរគមនាគមន៍» អនុវត្តបាន១០ខែ​ហើយនោះ បើប្រតិបត្តិករទូរគមនាគមន៍ណាមួយ មិនអនុវត្តតាមស្តង់ដារអប្បបរមានៃសេវាទូរសព្ទ និងអ៊ិនធឺណិតដែលបាន​កំណត់ទេ ប្រតិបត្តិករទូរគមនាគមន៍នោះ នឹងត្រូវទទួលរងពិន័យ។ 

 

ក្នុងសន្និសីទកាសែតស្ដីពី«សមិទ្ធផលសម្រេចបានរយៈពេល៥ឆ្នាំរបស់ក្រសួងប្រៃសណីយ៍ និងទូរគមនាគមន៍» នៅទីស្តីការគណៈរដ្ឋមន្ត្រី នាថ្ងៃទី៤សីហា លោក ជា វ៉ាន់ដេត មានប្រសាសន៍ដូច្នេះ៖ «យើងមានប្រកាសហ្នឹង ហើយយើងទុក១០ខែ ឱ្យប្រតិបត្តិករ ទាំងសេវាអ៊ិនធឺណិត ទាំងសេវាទូរសព្ទ រៀបចំកែសម្រួលបណ្តាញរបស់ខ្លួន​ ដើម្បីឆ្លើយតបទៅនឹងតម្រូវការស្តង់ដារនៃសេវាអ៊ិនធឺណិត និងសេវាទូរសព្ទ តាមរយៈប្រកាសនេះ»។​

 

 

ដើម្បីឱ្យប្រកាសអនុវត្តឱ្យបានដោយជោគជ័យ លោក ជា វ៉ាន់ដេត អំពាវនាវឱ្យពលរដ្ឋប្រើប្រាស់កម្មវិធីវាស់ស្ទង់ សេវាអ៊ិនធឺណិត និងសេវាទូរសព្ទ(App MPTC Speed Test)របស់ក្រសួងប្រៃសណីយ៍ និងទូរគមនាគមន៍។ រដ្ឋមន្ត្រីក្រសួងប្រៃសណីយ៍រូបនេះបានបញ្ជាក់ថា ៖«កាលណាពលរដ្ឋប្រើប្រាស់កម្មវិធីនេះ គឺដឹងតែម្តង ថាយើងប្រើសេវាទូរសព្ទនៅក្នុងកម្រិតក្រោមស្តង់ដារ ឬក្រោមស្តង់ដារ។ ក្រោមស្តង់ដារ បានន័យថាសេវា អត់មាន ឬក៏រអាក់រអួល»។

​

ប្រកាសស្តីពី«គុណភាពសេវាទូរគមនាគមន៍» ដែលលោ ជា វ៉ាន់ដេត ដាក់ឱ្យប្រតិបត្តិករទូរគមនាគមន៍ទាំងអស់អនុវត្តនោះ ចាប់តាំងពីថ្ងៃទី១៧កក្កដា ឆ្នាំ២០២២ ដោយយតម្រូវឱ្យមាន ការកែលំអនិងពង្រឹងគុណភាពចម្បងនៃការផ្តល់សេវាកម្ម គុណភាពសំឡេង ល្បឿនទាញយកទិន្នន័យ ល្បឿនបញ្ជូនទិន្នន័យ លែតថិនស៊ី និងភាពអាចទុកចិត្តបាននៃសេវាទូរគមនាគមន៍...ជាដើម។​

 

ខ្លឹមសារក្នុងប្រកាសខាងលើបានបញ្ជាក់ថា​ រយៈពេលផ្គង់ផ្គង់នៃការភ្ជាប់បណ្តាញដំបូងចំពោះសេវាទូរសព្ទចល័ត ដែលដំណើរការដោយបច្ចេកវិទ្យា2G/3G/4G  ត្រូវតូចជាង១ម៉ោង ៩៥ភាគរយ(ត្រូវ<១ម៉ោងសម្រាប់អត្រា៩៥ភាគរយ)។ ចំពោះលទ្ធភាពប្រើប្រាស់បណ្តាញស្នូលនៃទូរសព្ទចល័តត្រូវធំជាង ឬស្មើនឹង៩៩,៥០ភាគរយនៃរយៈពេលដំណើការបណ្តាញស្នូល។​ អត្រាហៅចេញជោគជ័យរបស់ទូរសព្ទចល័តត្រូវធំឬស្មើនឹង៩៨ភាគរយនៃចំនួននៃការហៅចេញ។ ​រយៈពេលភ្ជាប់ការហៅចេញរបស់ទូរសព្ទចល័ត ត្រូវតូចជាង៦វិនាទីសម្រាប់អត្រា៥០ភាគរយ និងតូចជាង៨វិនាទីសម្រាប់អត្រា៩៥ភាគរយ នៃការហៅចេញ។ 
 

ចំពោះគុណភាពសំឡេងរបស់ទូរសព្ទចល័ត​ត្រូវ 2G/GSM, 3G/HSPA+ ត្រូវធំជាង៣នៃកម្រិតនៃពេញចិត្តសម្រាប់អត្រា៩០ភាគរយ និង4G/VoLTE គឺត្រូវធំជាង៤ នៃកម្រិតនៃពេញចិត្តសម្រាប់អត្រា ៩០ភាគរយ។ ចំពោះ លែតថិនស៊ី(Latency) នៃសេវាអ៊ិនធឺណិតចល័ត ត្រូវតូចជាង៥០មីលីវិនាទី សម្រាប់កម្រិតថ្នាក់ជាតិ, តូចជាង៧០មីលីវិនាទីសម្រាប់តំបន់អាស៊ីប៉ាស៊ីហ្វិក,​ តូចជាង២០០មីលីវិនាទី សម្រាប់តំបន់អឺរ៉ុប និងត្រូវតូចជាង៣០០មីលីវិនាទីសម្រាប់តំបន់អាម៉េរិក។ 

 

ការបើកមើលវីដេអូអនឡាញនៃសេវាអ៊ិនធឺណិតចល័តនៅរាជធានីនិងក្រុងក្នុងខេត្ត រួមទាំងតំបន់ប្រជុំជនតាមស្រុក ចំពោះអត្រានៃការបើកមើលវីដេអូអនឡានដោយជោគជ័យគឺត្រូវធំជាង ៩៥ភាគរយនៃចំនួនវីដេអូដែលបានបើកសរុប, អត្រាចូលទៅដំណើរការវីដេអូធំជាង១០នាទី គឺត្រូវតូចជាង៥ភាគរយនៃចំនួនសរុបនៃរយៈពេលចូលទៅដំណើរវីដេអូ។ សម្រាប់សមាមាត្រនៃរយៈពេលបង្អាក់ដំណើរការវីដេអូ គឺត្រូវតូចជាង៥ភាគរយនៃរយៈពេលសរុបនៃការដំណើរការវីដេអូ។ 

 

ការបើកមើលវីដេអូអនឡាញនៃសេវាអ៊ិនធឺណិតចល័តនៅតំបន់ជនបទតាមស្រុកវិញ អត្រានៃការបើកមើលវីដេអូអនឡានដោយជោគជ័យគឺត្រូវធំជាង ៨៥ភាគរយនៃចំនួនវីដេអូដែលបានបើកសរុប, អត្រាចូលទៅដំណើរការវីដេអូធំជាង១០នាទី ត្រូវតូចជាង១០ភាគរយនៃចំនួនសរុបនៃរយៈពេលចូលទៅដំណើរវីដេអូ និងសមាមាត្រនៃរយៈពេលបង្អាក់ដំណើរការវីដេអូ គឺត្រូវតូចជាង១០ភាគរយនៃរយៈពេលសរុបនៃការដំណើរការវីដេអូ។ នេះបើយោងតាមប្រកាសស្តីពី«គុណភាពសេវាទូរគមនាគមន៍»។

 

យោងតាមទិន្នន័យរបស់ក្រសួងប្រៃសណីយ៍  និងទូរគមនាគមន៍ បច្ចុប្បន្ន កម្ពុជាមានប្រតិបត្តិករក្នុងវិស័យទូរគមនាគមន៍ចំនួន ៦៩។ ក្នុងនោះ មាន៥ ជាប្រតិបត្តិករទូរសព្ទចល័ត, មាន៣៨ ជាប្រតិបត្តិករផ្តល់សេវាអ៊ីនធឺណិត(ISP) និង៥ទៀត ជាប្រតិបត្តិករហេដ្ឋារចនាសម្ព័ន្ធខ្សែកាបអុកទិកលើគោក និងក្រោមបាតសមុទ្រ។ ទិន្នន័យដដែលបានបង្ហាញថា  អ្នកប្រើប្រាស់សេវាទូរសព្ទចល័តនៅកម្ពុជា មានជាង១៣លាននាក់, អ្នកប្រើសេវាអ៊ីនធឺណិតចល័តមាន ជាង១៧លាននាក់, សេវាទូរសព្ទអចល័ត មានជិត៤ម៉ឺននាក់ និងសេវាអ៊ិនធឺណិតអចល័ត មានជាង៣១ម៉ឺននាក់៕