ក្រោយដំណើរទស្សនកិច្ចនៅតៃវ៉ាន់ ប្រធានសភាតំណាងអាម៉េរិក លោកស្រី ណាន់ស៊ី ផេឡូស៊ី បានបន្តដំណើរទៅកូរ៉េខាងត្បូង និងជប៉ុន។ លោកស្រី ផេឡូស៊ី បានទៅដល់កូរ៉េខាងត្បូងនៅថ្ងៃទី៤ ខែសីហា ដើម្បីគាំទ្រដល់​ការប្រឹងប្រែងទប់ទល់ប្រឆាំងនឹងកូរ៉េខាងជើង និងប្ដេជ្ញាសម្រេចឱ្យបានការលុបបំបាត់នុយ​ក្លេ​អ៊ែរកូរ៉េខាងជើង។

 

បើតាមសេចក្ដីថ្លែងការណ៍រួមមួយ លោកស្រី ផេឡូស៊ី បានជួបជាមួយប្រធានរដ្ឋសភាកូរ៉េ​ខាងត្បូង លោក Kim Jin Pyo នៅទីក្រុងសេអ៊ូល ដោយអ្នកទាំងពីរបានលើកឡើងពីការ​ព្រួយបារម្ភចំពោះការគំរាមកំហែងពីឥទ្ធិពលនុយក្លេអ៊ែរនិងមីស៊ីល របស់កូរ៉េខាងជើង។ លើសពីនេះ លោក Kim និង លោកស្រី ផេឡូស៊ី បានយល់ព្រមគាំទ្រការរំសាយអាវុធនុយ​ក្លេអ៊ែរកូរ៉េខាងជើង និងស្វែងរកសន្តិភាពនៅលើឧបទ្វីបកូរ៉េ។ 

 

លោក Jo Yong Sam អគ្គនាយកនៃនាយកដ្ឋានព័ត៌មាន របស់ក្រសួងការបរទេសកូរ៉េខាង​ជើង បានរិះគន់ខ្លាំងៗទៅលើ លោកស្រី ផេឡូស៊ី ជុំវិញដំណើរទស្សនកិច្ចនៅព្រំដែនកូរ៉េ​ខាងជើង និងការពិភាក្សាអំពីការរារាំង ប្រឆាំងនឹងកូរ៉េខាងជើង។ 

 

«លោកស្រី ផេឡូស៊ី ជាអ្នកបំផ្លាញសន្តិភាព និងស្ថិរភាពអន្តរជាតិដ៏អាក្រក់បំផុតម្នាក់ ដោយបានធ្វើឱ្យប្រជាជនចិនខឹងសម្បារយ៉ាងខ្លាំង ក្រោយដំណើរទស្សនកិច្ចរបស់លោក​ស្រីទៅតៃវ៉ាន់»។ លោក Jo Yong Sa លើកឡើងបែបនេះក្នុងសេចក្ដីថ្លែងការណ៍មួយរបស់​ទីភ្នាក់ងារព័ត៌មាន KCNA។ 

 

សារព័ត៌មានរដ្ឋ KCNA បានបន្ថែមថា ការលើក​ឡើងរបស់លោកស្រី ផេឡូស៊ី គឺជាផ្នែក​មួយនៃគម្រោងរបស់អាម៉េរិក​ ដើម្បីបង្កើនភាពតានតឹងនៅក្នុងឧបទ្វីបកូរ៉េ ហើយលោកស្រី​កំពុង​ព្យាយាម​បង្ហាញ​ពី​គោល​នយោបាយ​​របស់​អាម៉េរិក​ប្រឆាំង​នឹង​កូរ៉េ​ខាង​ជើង តែ​គាំទ្រ​ការ​បង្កើនឥទ្ធិពលយោធារបស់ខ្លួន។

 

គួរបញ្ជាក់ថា ក្រោយដំណើរទស្សនកិច្ចប្រទេសអាស៊ីចំនួន៤ និងកោះតៃវ៉ាន់ លោកស្រី ណាន់ស៊ី ផេឡូស៊ី បានរងការរិះគន់យ៉ាងខ្លាំង និងរងទណ្ឌកម្មពីចិន។ ក្រៅពីនេះ បណ្ដា​ប្រទេសដូចជា កូរ៉េខាង​ជើង អ៊ីរ៉ង់ ស៊ីរី រុស្ស៊ី និងអាជ្ញាធរប៉ាលេស្ទីន ក៏បានរិះគន់លោកស្រី​ពីដំណើរទស្សនកិច្ចនេះដែរ៕