ករណីស្លាប់របស់កូនផ្សោតកម្រនេះ ត្រូវបានពលរដ្ឋប្រទះឃើញអណ្ដែតស្លាប់ នៅថ្ងៃទី០៧ ខែសីហា នៅចម្ងាយប្រមាណ២០០ម៉ែត្រ ពីអន្លង់ផ្សោតកាំពី ក្នុងខេត្តក្រចេះ។ លោក សេង ទៀក ប្រធានអង្គការ WWF ប្រចាំកម្ពុជា ប្រាប់ ThmeyThmey25 ថា កូនផ្សោតស្លាប់នេះ មានអាយុប្រមាណ៦សប្ដាហ៍ ទម្ងន់ ១៣គីឡូក្រាម និងប្រវែង ១០២សង់ទីម៉ែត្រ។ 
 

ជុំវិញការស្លាប់របស់កូនផ្សោតមួយនេះ ប្រធានអង្គការ WWF រូបនេះ មិនទាន់ដឹងពីមូលហេតុពិតប្រាកដនៅឡើយនោះទេ ។ 

 

លោកពន្យល់បន្ថែមដូច្នេះ៖ «កូនផ្សោតដែលទើបនឹងស្លាប់ហ្នឹង យើងនឹងយកបេះដូងវាទៅពិនិត្យមើល ពីកត្តាមួយដែលសំខាន់ ដែលអាចមកពីការឆក់។ យើងយកសំណាក់ទៅពិនិត្យមើល ថាតើវាអាចចេញមកពីការឆក់ ឬក៏អត់?»។ 
 

គួរជម្រាបផងដែរថា ក្នុងឆ្នាំ២០២២នេះ មានផ្សោតសរុបចំនួន៧ក្បាលហើយដែលប្រទះស្លាប់ ក្នុងនោះ ៤ក្បាលជាកូនផ្សោត(រាប់ទាំងស្លាប់ថ្មី) ខណៈចំនួនកើតថ្មីក្នុងឆ្នាំ២០២២ មានតែចំនួន៥ក្បាលប៉ុណ្ណោះ។ លទ្ធផលនៃជំរឿនសត្វផ្សោតទន្លេមេគង្គក្នុងឆ្នាំ២០២០ ដោយរដ្ឋបាលជលផលនិង អង្គការ WWF បានបង្ហាញថាមានសត្វផ្សោតចំនួនត្រឹមតែ៨៩ក្បាលប៉ុណ្ណោះ ដែលកំពុងរស់នៅក្នុង ទន្លេមេគង្គកម្ពុជា។ ចំណែកទិន្នន័យចុងក្រោយនឹងត្រូវបង្ហាញនៅឆ្នាំ២០២៣ខាងមុខ៕