លោក ហួន សុរង្សី ប្រធាននាយកដ្ឋានកិច្ចការសិប្បកម្ម ទទួលបន្ទុកការងារស្រែអំបិល បានឱ្យដឹងថា ឆ្នាំ២០២២នេះ កម្ពុជាផលិតអំបិលបានប្រមាណ ៤ម៉ឺនតោន សម្រាប់ផ្គត់ផ្គង់ទីផ្សារ ខណៈរដ្ឋាភិបាលមានគោលការណ៍អនុញ្ញាតឱ្យស្ដុកអំបិលបម្រុង ៦ម៉ឺនតោន ដែលនាំចូលមកពីប្រទេសឥណ្ឌា។ លោក សុរង្សី បញ្ជាក់ថា ទោះបីការផលិតទទួលបានត្រឹមតែ ៤ម៉ឺនតោន តែកម្ពុជាពុំទាន់មានសញ្ញាខ្វះខាតអំបិលនោះទេ។
  

លោកបន្តថា ចំនួនអំបិលដែលប្រើប្រាស់ប្រចាំឆ្នាំប្រហែល ១០ម៉ឺនតោន ដោយក្នុងនោះអំបិលធម្មជាតិ សម្រាប់យកទៅបរិភោគមានប្រមាណ ៥ម៉ឺនតោន និងអំបិលប្រើប្រាស់ក្នុងវិស័យឧស្សាហកម្ម ជាង ៣ម៉ឺនតោន។ វិស័យឧស្សាហកម្ម រួមជាមួយវិស័យកសិកម្ម ត្រូវការអំបិលចន្លោះពី ១ម៉ឺនតោន ទៅ ២ម៉ឺនតោន សម្រាប់ប្រើប្រាស់លើការផលិតត្រីប្រហុកជាដើម។ 
 

ប្រធាននាយកដ្ឋានកិច្ចការសិប្បកម្ម ទទួលបន្ទុកការងារស្រែអំបិលរូបនេះ បានលើកឡើងថា ៖ «អ៊ឹចឹងមកដល់ម៉ោងនេះ អំបិលមិនទាន់មានសញ្ញាខ្វះខាតទេ ដោយរាល់ថ្ងៃនេះ ប្រើអំបិលចាស់អត់ទាន់អស់ទេ តែរដ្ឋាភិបាលអនុញ្ញាតឱ្យស្តុកអំបិលបម្រុង ៦ម៉ឺនតោន ដែលនាំចូលពីឥណ្ឌានេះ ពុំទាន់បានប្រើប្រាស់ទេ គឺគ្រាន់តែយកមកស្តុកដើម្បីត្រៀមខ្លាចមានការខ្វះខាត»។ 

បើតាមលោក ហួន សុរង្សី ក្រៅពីអំបិលគ្រោងនាំចូល៦ម៉ឺនតោននេះ កម្ពុជាក៏មានអំបិលបម្រុងទុក៤ពាន់តោនផងដែរ។
 

លោក ហួន សុរង្សី បានបន្ថែមថា ឧបសគ្គនៃការផលិតអំបិល មានកត្តាមួយចំនួនដូចជា បញ្ហាអាកាសធាតុ ធ្លាក់ភ្លៀងច្រើនពេក ដែលជាទូទៅកម្ពុជាប្រមូលផលអំបិលចាប់ពីដើមឆ្នាំ រហូតដល់ខែមិថុនា និងខែបន្តបន្ទាប់ទៀត ប្រមូលបានក្នុងកម្រិតតិចតួច។ បញ្ហាប្រឈមមួយទៀត គឺកង្វះកម្លាំងពលកម្ម៕