ខាងក្រោមនេះ គឺជាប្រភេទត្រីស្ថិតនៅក្នុងលំដាប់ ORDER: OSTEOGLOSSIFORMES ដែលមានពីរអម្បូរ (Family) គឺ Osteoglossidae និង Notopteridae។ ប៉ុន្តែ «មច្ឆាខ្មែរ» សូមដកស្រង់យកលក្ខណៈរូបរាង ទ្រង់ទ្រាយ ឬសណ្ឋាន នៃត្រីនៅក្នុងអម្បូរ Osteoglossidae​ ដែលមានតែមួយពួក​គឺ Scleropages ចេញពីសៀវភៅ៖ ​«មគ្គុទ្ទេសក៍ស្តីពី ប្រភេទត្រីរស់នៅក្នុងដែនទឹកសាបនៃប្រទេសកម្ពុជា» បង្ហាញគឺ «ត្រីនាគ ឬត្រីតាពត»​។ 

 

«ត្រីនាគ ឬត្រីតាពត» មានឈ្មោះវិទ្យាសាស្ត្រ (Scleropages formosus) និងឈ្មោះជាភាសាអង់គ្លេស Asian bonytongue ។ ត្រីនាគ មានប្រវែងដងខ្លួនសរុបតូចជាង៦០សង់ទីម៉ែត្រ មានរង្វះមាត់ធំ និងងើយឡើងលើ ដែលបង្កលក្ខណៈងាយស្រួលក្នុងការចាប់ចំណីនៅស្រទាប់លើ។ ត្រីប្រភេទនេះ មានរស់នៅក្នុងអន្លង់ជ្រៅៗ ក្នុងស្ទឹងដែលមានទឹកហូរចេញពីតំបន់ភ្នំ មានផ្ទាំងថ្មធំៗ ដែលស្ទឹងទាំងនោះ អាចសាងសង់វារីអគ្គិសនីបាន ដូចជានៅក្នុងខេត្តកោះកុង។ 

 

ត្រីនាគអាស៊ីមួយប្រភេទនេះ ត្រូវបានគេទទួលស្គាល់យ៉ាងទូលំទូលាយថា ជានិម្មិតរូបមួយ តំណាងឱ្យការអភិរក្សនៅលើពិភពលោក។ ក្នុងប៉ុន្មានឆ្នាំចុងក្រោយនេះ ការគំរាមកំហែងចំពោះពួកវា បានកើនគួរឱ្យកត់សម្គាល់ តាមរយៈការចាប់កូនរបស់ធ្វើអាជីវកម្ម និងការបាត់បង់ទីជម្រក។ បច្ចុប្បន្ននេះ ត្រីនាគ ជាប្រភេទត្រី «រងគ្រោះថ្នាក់ជិតផុតពូជ» នៅក្នុងបញ្ជីក្រហម IUCN Red List៕