ទស្សនកិច្ចរបស់លោកស្រី ណាន់ស៊ី ផេឡូស៊ី នៅតៃវ៉ាន់ធ្វើឱ្យចិនក្ដៅស្លឹកត្រចៀកយ៉ាងខ្លាំង។ រដ្ឋបាលលោក ចូ បៃឌិន ដែលត្រូវដឹងថា មិនយល់ស្របនឹងទស្សនកិច្ចនេះ ប្រឹងបកស្រាយជំហររបស់អាម៉េរិកចំពោះគោលនយោបាយចិនតែមួយ ដែលមិនផ្លាស់ប្ដូរដោយសារទស្សនកិច្ចនេះឡើយ ខណៈដែលចិនក៏សម្ញែងអានុភាពយោធារបស់ខ្លួនតាមរយៈការធ្វើសមយុទ្ធដ៏កក្រើកសមុទ្រជុំវិញកោះតៃវ៉ាន់។

 

ប៉ុន្មានថ្ងៃមុនទស្សនកិច្ចរបស់ប្រធានសភាតំណាងរាស្រ្តនៅតៃវ៉ាន់ មេដឹកនាំចិន ក៏ស្នើដោយផ្ទាល់ទៅកាន់លោក បៃឌិន ឱ្យទប់ស្កាត់ទស្សនកិច្ចនេះ។ កាសែត Th Washington Post ចុះផ្សាយនៅថ្ងៃទី២០ ខែសីហា ដោយស្រង់សម្ដីមន្ត្រីអាម៉េរិក ថា ប្រធានាធិបតីចិន ស៊ី ជិនភីង បានជជែកតាមទូរសព្ទជាមួយលោក បៃឌិន នៅថ្ងៃទី២៨ ខែកក្កដា ហើយក៏ប្រាប់លោក បៃឌិន ឱ្យបញ្ឈប់គម្រោងទស្សនកិច្ចនេះតែម្ដង។

 

បើតាមប្រភពព័ត៌មានដដែល លោក បៃឌិន ឆ្លើយវិញថា​ លោកមិនអាចធ្វើតាមសំណើនេះឡើយ។ ប្រធានាធិបតីអាម៉េរិកពន្យល់សមភាគីចិនទៀតថា សភាអាម៉េរិក ជាស្ថាប័នឯករាជ្យពីរដ្ឋាភិបាល ហើយលោកស្រី ផេឡូស៊ី និងសមាជិកសភាផ្សេងទៀត មានការសម្រេចចិត្តដោយខ្លួនឯងលើទស្សនកិច្ចនៅបរទេស។ មន្រ្តីអាម៉េរិកនិយាយដែរថា លោក បៃឌិន ក៏ព្រមានលោក ស៊ី កុំធ្វើសកម្មភាពបង្កហេតុណាមួយ បើលោកស្រី ផេឡូស៊ី ទៅតៃវ៉ាន់មែន។

 

តាមពិតទៅ មិនមែនរដ្ឋាភិបាលអាម៉េរិក មិនបារម្ភសោះនឹងដំណើរលោកស្រី ផេឡូស៊ី ឡើយ។ មន្ទីរបញ្ចកោណ បញ្ជាការដ្ឋានយោធាប្រចាំឥណ្ឌូប៉ាស៊ីហ្វិក និងក្រុមប្រឹក្សាសន្តិសុខសេតវិមាន សុទ្ធតែបានបង្ហាញពីហានិភ័យនៃទស្សនកិច្ចនេះ តែចុងក្រោយលោកស្រីនៅតែទៅដដែល។ ក្នុងសេចក្ដីប្រកាសព័ត៌មានក្រោយទស្សនកិច្ច មន្រ្តីលំដាប់ទីបីរូបនេះ អះអាងថា​ លោកស្រីទៅតៃវ៉ាន់ដើម្បីគាំទ្រតៃវ៉ាន់ និងប្រជាធិបតេយ្យ៕