Jadon Sancho ស៊ុតបាល់បញ្ចូលទីគ្រាប់ឱ្យក្រុមបិសាចក្រហមនាំមុខ Liverpool មុននៅនាទី១៦ នាជំនួបលីគកំពូលអង់គ្លេសសប្តាហ៍ទី៣ នៅរាត្រីថ្ងៃទី២២ ខែសីហា។ តាមរយៈយុទ្ធសាស្ត្រថ្មីរបស់លោក Erik ten Hag ដោយមិនដាក់ Maguire និង Ronaldo នៅជម្រើសដំបូង បានធ្វើឱ្យ Man Utd ល្អប្រសើរជាងពីរប្រកួតដំបូងពេលចាញ់ Brighton & Hove Albion និង Brentford យ៉ាងអាម៉ាស់ ។
 

Man Utd នៅតែរក្សាទម្រង់លេងបានល្អ តាមរយៈការគ្រប់គ្រងបាល់ និងវាយសម្រុកទៅលើក្រុមហង្សក្រហម បើទោះនាំមុខ១គ្រាប់ហើយក្តី។ ចូលដល់វគ្គទី២ បិសាចក្រហមបានបន្ថែមគ្រាប់នាំមុខ១គ្រាប់ទៀត ដែលធ្វើបានដោយ Marcus Rashford នៅនាទី៥៣។
 

ចូលដល់នាទី៨១ ក្រុមលោក Jurgen Klopp តាមបានមួយគ្រាប់វិញ ដោយខ្សែប្រយុទ្ធឆ្នើមរបស់ខ្លួន Mohamed Salah។ ចប់ការប្រកួតម្ចាស់ផ្ទះ Man Utd ឈ្នះ Liverpool ២-១។

នេះជាជ័យជម្នះដំបូងរបស់ Man Utd ក្រោមការដឹកនាំរបស់អ្នកចាត់ការថ្មីសញ្ជាតិហូឡង់នៅ Premier League ស្របពេល Liverpool នៅមិនទាន់ស្គាល់ឈ្នះនៅឡើយ ក្រោយស្មើពីរប្រកួតដំបូង និងចាញ់នៅប្រកួតទី៣នេះ។
 

៣ពិន្ទុដំបូងនេះ បានជួយម្ចាស់ជើងឯកលីគកំពូលអង់គ្លេស២០សម័យ គេចផុតពីបាតតារាង ដើម្បីឡើងទៅកាន់លេខរៀងទី១៤ វិញ។ Liverpool ធ្លាក់ទៅចំណាត់ថ្នាក់ទី១៦ ក្រោយរកបាន២ពិន្ទុ៕