ជាតិ
នយោបាយជាតិ
ប្តូរមេប៉េអឹមនៅប៉ៃលិន តាកែវ កំពង់ធំ កំពត កែប កោះកុង ត្បូងឃ្មុំ និងឧត្តរមានជ័យ
សម្តេចឧបនាយករដ្ឋមន្ត្រី ទៀ បាញ់ និងលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស
×![]()
ដោយ: រួបរួម
សម្តេចឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ កាលពីថ្ងៃទី១៩ ខែសីហា បានចេញប្រកាសស្តីពីការតែងតាំងផ្លាស់ប្តូរមុខតំណែងនាយទាហាននៃកងយោធពលខេមរភូមិន្ទ មានចាប់តាំងពីនាយយសេនាធិការរង និងមេបញ្ជាការកងរាជអាវុធហត្ថនៅបណ្តាខេត្តចំនួន៨។
លោក ម៉ែន ស៊ីប៊ន នាយសេនាធិការរងបញ្ជាការដ្ឋានកងរាជអាវុធហត្ថលើផ្ទៃប្រទេស ត្រូវបានតែងតាំងជាអនុប្រធានក្រុមការងារស្រាវជ្រាវជំនាញយោធា ក្រុមស្រាវជ្រាវយុទ្ធសាស្ត្រយោធាថ្នាក់អគ្គបញ្ជាការដ្ឋាន។ ស្របពេលជាមួយគ្នា មេបញ្ជាការប៉េអឹមនៃបណ្តាខេត្តចំនួន៦ បានផ្លាស់ប្តូរតំណែងទៅជា សមាជិកនៃក្រុមស្រាវជ្រាវនេះ ដែលរួមមាន លោក វ៉ា សារិទ្ធ (ពីត្បូងឃ្មុំ), លោក វ៉ាន់ ណាឡុង (ពីប៉ៃលិន), លោក ពុទ្ធ សារ៉ាន (ពីឧត្តរមានជ័យ), លោក ហង្ស ថុល (ពីកំពង់ធំ), លោក ថុង ណារ៉ុង (ពីកោះកុង) និងលោក ឡា ឡៃ (ពីតាកែវ)។
តាមប្រកាសដដែល លោក ងួន សុវណ្ណរ័ត្នន៍ ផ្លាស់ប្តូរតំណែងពីស្នងការរងនៃស្នងការដ្ឋានទំនាក់ទំនងកិច្ចការសាធារណៈ ទៅជាស្នងការរងនៃស្នងការដ្ឋានផែនការប្រតិបត្តិការ និងហ្វឹកហ្វឺន ខណៈតំណែងចាស់របស់លោកនៅស្នងការដ្ឋានទំនាក់ទំនងកិច្ចការសាធារណៈ ត្រូវជំនួនដោយលោក ខេង ទីតូ ពីតំណែងមេបញ្ជាការ បញ្ជាការដ្ឋានកងរាជអាវុធហត្ថខេត្តកែប។
សរុបមក ខេត្តចំនួន៨ មានការផ្លាស់ប្តូរមេបញ្ជាការប៉េអឹម ដោយ លោក កែវ សុផល ត្រូវផ្ទេរពីខេត្តកំពតទៅជាមេបញ្ជាការប៉េអឹមខេត្តប៉ៃលិន,លោក សេង មហា ឡើងតំណែងពីមេបញ្ជាការរង ទៅជាមេបញ្ជាការខេត្តតាកែវ, លោក មាស យ៉ត ពីនាយករងវិទ្យាស្ថានកងរាជអាវុធហត្ថ (កំបូល) ទៅជាមេបញ្ជាការប៉េអឹមខេត្តកំពង់ធំ។
នៅខេត្តកំពត លោក ចាប សុទ្ធាវុឌ្ឍន៍ ឡើងពីមេបញ្ជាការរងទៅជាមេបញ្ជាការ, លោក ហ៊ត សីហា ពីមេបញ្ជាការរងទៅជាមេបញ្ជាការខេត្តកែប, លោក តាំង ឈុនស្រេង ពីមេបញ្ជាការរង និងជានាយសេនាធិការបញ្ជាការដ្ឋានកងរាជអាវុធហត្ថខេត្តកោះកុង ទៅជាមេបញ្ជាការប៉េអឹមនៃខេត្តដដែលនេះ។
ស្របពេលជាមួយគ្នា លោក រ័ត្ន ចាន់ណា ឡើងតំណែងពីមេបញ្ជាការរងទៅជាមេបញ្ជាការប៉េអឹមខេត្តត្បូងឃ្មុំ ខណៈលោក លី ដារិទ្ធ ឡើងពីមេបញ្ជាការរងទៅជាមេបញ្ជាការប៉េអឹម ខេត្តឧត្តរមានជ័យ៕
© រក្សាសិទ្ធិដោយ thmeythmey.com
