អន្តរជាតិ
ចិនថា ការរាលដាលជំងឺកូវីដ-១៩ ធ្វើឱ្យអត្រាកំណើតទារក និងអ្នករៀបការកាន់តែធ្លាក់ចុះ រូបថត Xinhua
× គណៈកម្មការសុខាភិបាលជាតិចិន (NHC) បានអះអាងថា ការរីករាលដាលជំងឺកូវីដ-១៩ បានរួមចំណែកធ្វើឱ្យអត្រាអ្នករៀបការថ្មីក្នុងប្រទេស និងអត្រាកំណើតទារកធ្លាក់ចុះទាបយ៉ាងខ្លាំង ដោយសារការចិញ្ចឹមបីបាច់កូនត្រូវការលុយច្រើន តែប្រជាជនចិនពិបាករកលុយ។
កំណត់ត្រាកំណើតទារករបស់ចិនប៉ុន្មានឆ្នាំចុងក្រោយនេះ បានធ្លាក់ចុះយ៉ាងខ្លាំង។ គណៈកម្មការសុខាភិបាលជាតិចិន (NHC) អះអាងថា ប្រជាជនចិននឹងចាប់ផ្ដើមធ្លាក់ចុះនៅឆ្នាំ២០២៥។ ដោយសារបញ្ហាហិរញ្ញវត្ថុពេលមានការរីករាលដាលជំងឺកូវីដ-១៩ ស្ត្រីចិនភាគច្រើនពន្យាពេលរៀបការ និងយកកូនដែលធ្វើឱ្យធ្លាក់ចុះអត្រាកំណើតទារក និងអត្រារៀបការ។
«វីរុសកូរ៉ូណាបង្កជំងឺកូវីដ-១៩ មានផលប៉ះពាល់ជាក់ស្ដែងទៅលើការរៀបការ និងកំណើតទារករបស់ប្រជាជនមួយចំនួន»។ គណៈកម្មាការសុខាភិបាលជាតិចិនបានប្រាប់ទីភ្នាក់ងារព័ត៌មាន Reuters បែបនេះតាមរយៈសារមួយនៅថ្ងៃទី២២ ខែសីហា។
ក្រៅពីបញ្ហាហិរញ្ញវត្ថុ យុវជនជំនាន់ថ្មីនិយមផ្លាស់លំនៅទៅរស់នៅទីក្រុងហើយចំណាយពេលវេលាកាន់តែច្រើនលើការសិក្សា និងបរិយាកាសការងារមានសម្ពាធខ្ពស់ ដែលសុទ្ធតែជាចំណែកធ្វើឱ្យធ្លាក់ចុះអត្រារៀបការ និងអត្រាកំណើតទារកដែរ។
ជាមួយគ្នានេះ គោលនយោបាយគ្មានកូវីដរបស់ចិនដើម្បីលុបបំបាត់ការផ្ទុះឡើងជំងឺកូវីដ-១៩ ក៏អាចបណ្តាលឱ្យប៉ះពាល់ដល់ឱកាស និងបំណងមានកូនរបស់ប្រជាជនទៀតផង។ នេះដោយសារ វិធានការនេះ បានគ្រប់គ្រងការរស់នៅ និងរឹតត្បិតការជួបជុំរបស់ប្រជាជនយ៉ាងតឹងរ៉ឹង។
តាមការព្យាករណ៍ កំណើតទារកថ្មីក្នុងឆ្នាំ២០២២ របស់ចិន បានធ្លាក់ចុះដល់កម្រិតទាបខ្លាំងបំផុតមិនធ្លាប់មាន គឺទាបជាង ១០លាននាក់ ខណៈកាលពីឆ្នាំ២០២១ មាន១០,៦លាននាក់ដែលទាបជាងអត្រាទារកឆ្នាំ២០២០ ចំនួន១១,៥ភាគរយឯណោះ។
សូមបញ្ជាក់ថា អត្រាលទ្ធភាពមានកូនរបស់ប្រជាជនចិនមានត្រឹម ១,១៦នាក់ប៉ុណ្ណោះក្នុងឆ្នាំ២០២១ ដែលជាអត្រាទាបបំផុតមួយក្នុងពិភពលោក និងទាបជាងអត្រាស្តង់ដាកំណត់ដោយអង្គការនៃកិច្ចសហប្រតិបត្តិការ និងអភិវឌ្ឍសេដ្ឋកិច្ច (OECD) ផងដែរ ដែលបានកំណត់ត្រឹមអត្រា ២,១នាក់ដើម្បីរក្សាស្ថិរភាពប្រជាជន៕
© រក្សាសិទ្ធិដោយ thmeythmey.com