ជាតិ
សេដ្ឋកិច្ច
ABC នឹងជំរុញធនាគារនៅកម្ពុជា ក្លាយជាគំរូនៃការអនុវត្តគោលការណ៍ហិរញ្ញវត្ថុ ក្នុងតំបន់អាស៊ាន លោក Raymond Sia Say Guan ប្រធាន ABC កំពុងថ្លែងក្នុងសន្និសីទស្តីពី«គ្រឹះស្ថានធនាគារ និងហិរញ្ញវត្ថុ» កាលពីថ្ងៃទី១៩សីហា ឆ្នាំ២០២២។ រូប៖ ABC
× សមាគមធនាគារនៅកម្ពុជា(ABC) កំពុងប្រែក្លាយគោលការណ៍ស្តីពីហិរញ្ញវត្ថុ ឱ្យទៅជាសកម្មភាពភាពជាក់ស្តែង ដើម្បីជួយធនាគារនៅកម្ពុជាឱ្យក្លាយជាគំរូ ក្នុងការអនុវត្តគោលការណ៍ហិរញ្ញវត្ថុប្រកបដោយនិរន្តរភាព នៅក្នុងតំបន់អាស៊ាន។ នេះបើតាមលោក Raymond Sia Say Guan ប្រធានសមាគមធនាគារនៅកម្ពុជា ។
ហិរញ្ញវត្ថុប្រកបដោយនិរន្តរ៍ គឺមានសារៈសំខាន់យ៉ាងខ្លាំង សម្រាប់អនាគតនៃកំណើនរបស់វិស័យធនាគារ។ លោក Raymond Sia Say Guan ថ្លែងបែបនេះនៅក្នុងសន្និសីទស្តីពី«គ្រឹះស្ថានធនាគារ និងហិរញ្ញវត្ថុ» កាលពីថ្ងៃទី១៩សីហា ឆ្នាំ២០២២។ ប្រធានABC រូបនេះបន្តនិយាយថា៖ «កំណើន និងនិរន្តរ៍ហិរញ្ញវត្ថុ អាចនឹងកើតឡើងព្រមគ្នា ហើយយើងចាំបាច់ត្រូវតែចង់ចាំ មានវិន័យ និងត្រូវខិតខំប្រឹងប្រែងរួមគ្នា ដើម្បីធានាថា កំណើនហិរញ្ញវត្ថុនៅតែបន្តមាន ប៉ុន្តែមិនធ្វើឱ្យប៉ះពាល់ដល់និរន្តរ៍ភាពនៃកំណើននោះឡើយ»។
ជុំវិញនៃកំណើនធនគារនិងហិរញ្ញវត្ថុប្រកដោយនិរន្តរ៍ភាពនេះ លោក គិត សុវណ្ណរិទ្ធិ អគ្គនាយករងត្រួតពិនិត្យ ធនាគារជាតិនៃកម្ពុជា(NBC) បានលើកឡើងថា គ្រប់តួអង្គធនាគារក៏ត្រូវមានសធម៌ និងការទទួលខុសត្រូវចំពោះអតិថិជនរបស់ខ្លួន ផងដែរ។ លោកបន្តនិយាយដូច្នេះ៖ «និរន្តរ៍ភាពនេះ គឺត្រឹមតែធ្វើឱ្យយើងមានកំណើនប៉ុណ្ណោះទេ តែវាថែមទាំងឱ្យយើងមានគណនេយ្យភាព ឬប្រតិបត្តិការប្រកបដោយសធម៌ ចំពោះអ្នកអតិថិជនរបស់យើងដែលអ្នកប្រើប្រាស់សេវាហិរញ្ញ»។
កាលពីថ្ងៃទី២៩ ខែមីនា ឆ្នាំ២០១៩ លោកស្រី ជា សិរី អគ្គនាយកបច្ចេកទេសនៃNBC បានប្រកាសដាក់ឱ្យអនុវត្តផ្លូវការនូវគោលការណ៍ហិរញ្ញវត្ថុប្រកបដោយចីរភាពកម្ពុជា។ គោលការណ៍ហិរញ្ញវត្ថុប្រកបដោយចីរភាពកម្ពុជានេះ ត្រូវបានបង្កើតក្នុងគោលដៅជំរុញការចូលរួមគាំទ្រពីសំណាក់បណ្ដាធនាគារ និងគ្រឹះស្ថានហិរញ្ញវត្ថុ ក្នុងការបង្កើតគោលនយោបាយផ្ដល់ហិរញ្ញប្បទាន ដែលលើកកម្ពស់ការថែរក្សាបរិស្ថាន វប្បធម៌ និងបរិយាប័ន្នហិរញ្ញវត្ថុ ដែលជាកត្តាចម្បងក្នុងការសម្រេចបាននូវកំណើនសេដ្ឋកិច្ចប្រកបដោយចីរភាព។
រូបពីសមាគមធនាគារនៅកម្ពុជា
គិតត្រឹមចុងឆមាសទីមួយ ឆ្នាំ២០២២ គ្រឹះស្ថានធនាគារ និងហិរញ្ញវត្ថុ ដែលស្ថិតនៅក្នុងប្រព័ន្ធធនាគារនៅកម្ពុជា មាន ៥៨ គឺជាធនាគារពាណិជ្ជ, ៩ជាធនាគារឯកទេស និងការិយាល័យតំណាងចំនួន៦។ ក្រៅពីនេះ កម្ពុជា មានគ្រឹះស្ថានមីក្រូហិរញ្ញវត្ថុទទួលប្រាក់បញ្ញើចំនួន៥ និង គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើចំនួន៨១។
ដោយឡែក ទ្រព្យសកម្មរបស់គ្រឹះធនាគារនៅកម្ពុជា បានកើន១៦,៣ភាគរយ ដល់ ៦៤,៦ពាន់លានដុល្លារ ។ ក្នុងនោះ ឥណទានអតិថិជន កើន២២ភាគរយ ដល់ ៤២,២ពាន់លានដុល្លារ ដែលមានចំនួន១,៤លានគណនី។ នេះបើយោងតាមរបាយការណ៍ប្រចាំឆមាសទីមួយ និងទិសដៅការងារឆមាសទី២ ឆ្នាំ២០២២ របស់ធនាគារជាតិនៃកម្ពុជា៕
Tag:
សមាគមធនាគារនៅកម្ពុជា
ហិរញ្ញវត្ថុ
© រក្សាសិទ្ធិដោយ thmeythmey.com