ផ្នែកជាច្រើនរបស់ចិន ជាពិសេសតំបន់ភាគខាងត្បូង បានប្រឈមបញ្ហាគ្រោះរាំងស្ងួតយ៉ាងខ្លាំង ខណៈកម្រិតទឹកទន្លេនៅក្នុងតំបន់មួយចំនួនបានធ្លាក់ចុះយ៉ាងខ្លាំង ដែលបញ្ហានេះ ធ្វើឱ្យប៉ះពាល់ដល់ស្ថានីយផលិតថាមពល ដែលដើរដោយចរន្តទឹក។ ដោយខ្វះចរន្តអគ្គិសនី ទីក្រុងមួយចំនួនដូចជា ក្រុងសៀងហៃ និងក្រុងលូចូវ ដាក់ចេញវិធានមួយចំនួន ដើម្បីកាត់បន្ថយការប្រើប្រាស់ថាមពល។ 

 

មិនត្រឹមតែប៉ុណ្ណោះ បញ្ហាគ្រោះរាំងស្ងួតយ៉ាងខ្លាំង និងកង្ខះទឹក ក៏បង្កជាក្ដីបារម្ភជុំវិញផលប៉ះពាល់លើដំណាំនាពេលខាងមុខ។ ស្ថាប័នរបស់ចិនចំនួន៤ នៅថ្ងៃទី២៣ ខែសីហា បានចេញសេចក្តីជូនដំណឹងមួយ ដោយជំរុញឱ្យចាត់វិធានការការពារដំណាំ រួមទាំងប្រើប្រាស់ទឹកឱ្យបានត្រឹមត្រូវ និងការបង្កើតទឹកភ្លៀង។ នៅតំបន់ខ្លះ កម្តៅយ៉ាងហក់ឡើងដល់ ៤៥អង្សាសេ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

តាមទិន្នន័យរបស់ក្រសួងធនធានទឹកចិន នៅក្នុងរដូវក្តៅ ទន្លេយ៉ាងសេ ដែលជាទន្លេដ៏វែងបំផុតនៅក្នុងទ្វីបអាស៊ី នៅស្ថិតនៅភាគខាងត្បូងចិន មានកម្រិតទឹកទាបបំផុត បើគិតចាប់តាំងពីឆ្នាំ១៩៦១ មក។

 

«ការវិវដ្ដនៃភាពរាំងស្ងួត រួមជាមួយអាកាសធាតុក្តៅខ្លាំង បានបង្កឱ្យមានផលប៉ះពាល់យ៉ាងខ្លាំងដល់ដំណាំនៅរដូវស្លឹកឈើជ្រុះ»។ សេចក្តីថ្លែងការណ៍របស់នាយកដ្ឋានរដ្ឋចិនចំនួន៤ បានបញ្ជាក់បែបនេះ ។ រដូវស្លឹកឈើជ្រុះនៅចិនចាប់ផ្តើមពីខែកញ្ញា ដល់ខែតុលា។ 

 

ដោយសារតែអាកាសធាតុក្តៅខ្លាំង រួមទាំងភ្លើងឆេះព្រៃផង ប្រជាជនច្រើនជាង ១៥០០នាក់ នៅតំបន់ជុំវិញក្រុង Chongqing ត្រូវបានជម្លៀសចេញ៕